ថ្ងៃនេះ ក្រុមហ៊ុន Samsung បានដាក់ឱ្យដំណើរការនូវមុខនាឡិកាឆ្លាតវៃថ្មីៗ ចំនួន 3 បន្ថែមទៀតទៅលើ Gear S3 របស់ខ្លួនគឺ Samsung Outdoor, Samsung Travel និង Samsung Sport។ សម្រាប់លោកអ្នកដែលចូលចិត្តការ ធ្វើដំណើរផ្សងព្រេង មុខនាឡិកាឆ្លាតវៃ Samsung Outdoor ភ្ជាប់ជាមួយនឹងមុខងារសែនស័រ Barometer, Altimeter ការវាស់អាកាសធាតុ និងពេលព្រះអាទិត្យរះ ឬលិច។ លោកអ្នកក៏អាចប្រើប្រាស់ Night Mode មានសមត្ថភាពក្នុងការកំណត់ទៅលើរយៈកំពស់ និងតួលេខរបស់បរិយាកាស (អេក្រង់នឹងឡើងពណ៌ក្រហមនៅពេលដែលតួលេខច្រើនលើសលប់)។
សម្រាប់អ្នកជំនួញ និងអ្នកធ្វើដំណើរទេសចរណ៍ មុខនាឡិកាឆ្លាតវៃ Samsung Travel ផ្តល់លក្ខណៈងាយស្រួលក្នុងការមើលម៉ោង ការចូលទៅលើមើលអត្រាប្តូរប្រាក់រហ័ស រួមជាមួយនឹងមុខងារ My Journey ដូច្នេះលោកអ្នកអាចរក្សាការតាមដានការធ្វើដំណើរតាមផ្លូវបានយ៉ាងងាយស្រួល។ ចំនែក មុខនាឡិកាឆ្លាតវៃ Samsung Sport ភ្ជាប់ជាមួយនឹងការកំណត់ម៉ោង (Stopwatch) ការវាស់ស្ទង់ល្បឿន (Speedometer), Altimeter, ការគ្រប់គ្រងចង្វាក់បេះដូច និងការចូលទៅដំណើរការមុខងារ My Journey ។ វាភ្ជាប់ជាមួយនឹងមុខងារជូនដំណឹងដើម្បីធានាថាលោកអ្នកមិនធ្វើសកម្មភាពលើសកម្រិតនោះទេ។
មុខនាឡិកាឆ្លាតវៃទាំង 3 នេះភ្ជាប់ជាមួយនឹង Themes ដ៏ស្រស់ស្អាតផ្សេងៗគ្នា (រហូតដល់ទៅ 6) ហើយលោកអ្នកអាចទាញយក (Download) បានតាមរយៈនាឡិកាឆ្លាតវៃ Gear S3 នៅលើ Samsung Gear App Store បាន។ គួរបញ្ជាក់ផងដែរថា ក្រុមហ៊ុន Samsung សហការគ្នាជាមួយនឹងមនុស្សល្បីល្បាញជាច្រើនផងដែរដើម្បីផលិតនូវមុខនាឡិកាថ្មីទាំង 3 នេះគឺលោក Bear Grylls (អ្នកធ្វើដំណើរផ្សងព្រេង) លោក Murad និងលោក Natalia Osmann (អ្នកថតរូបផ្សងព្រេង) និងលោក Robbie Maddison (អ្នកជិះកង់) រួមគ្នាក្នុងការបង្កើតវីដេអូផ្សព្វផ្សាយដ៏ស្រស់ស្អាត៕
