ក្រុមហ៊ុន LG Electronics កំពុងមានគម្រោងក្នុងការបង្កើននូវការរៀបចំចំនួននៃកម្មវិធីប្រើប្រាស់នៅលើស្មាតហ្វូនស៊េរីថ្មីរបស់ខ្លួន LG G6 ។ ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ បានប្រកាសថា នៅខែក្រោយនេះ នៅលើ App Store របស់ខ្លួន នឹងមានកម្មវិធីរហូតដល់ទៅ 300 Apps ដែលអាចទ្រទ្រង់នៅលើអេក្រង់ 18:9 "Full Vision" display របស់ស្មាតហ្វូន LG G6 ដែលនៅក្នុងខណៈពេលនេះ វាមានកម្មវិធីប្រមាណជាជាង 200 Apps ប៉ុណ្ណោះ ដែលទ្រទ្រង់នៅលើ aspect ratio នេះដែលអាចរកមើលនៅក្នុង SmartWorld store របស់ក្រុមហ៊ុន ដូចនេះ ចំនួននៃកម្មវិធីនេះ នឹងមានការកើនឡើង 50% ដែលជាផ្នែកមួយនៃទីផ្សារឌីជីថលរបស់ក្រុមហ៊ុន LG ។
គួរបញ្ជាក់ថា ស្មាតហ្វូន Galaxy S8 និង Galaxy S8+ របស់ក្រុមហ៊ុនបច្ចេកវិទ្យា Samsung ក៏បំពាក់នូវអេក្រង់ ដែលមានកម្រិត aspect ratios ដូចគ្នាអញ្ចឹងដែរ ជាមួយនឹងការវិវត្តន៍ផ្លាស់ប្តូរចុងក្រោយរបស់ក្រុមហ៊ុន LG នៅពេលនេះ ត្រូវបានអ្នកវិភាគមួយចំនួនមើលឃើញថា ក្រុមហ៊ុន LG កំពុងតែប៉ុនប៉ងប្រកួតប្រជែងជាមួយនឹងក្រុមហ៊ុន Samsung ក៏ប៉ុន្តែបើតាមជំហរជាផ្លូវការរបស់ក្រុមហ៊ុន LG គឺមានគោលបំណងតែមួយគត់ គឺធ្វើយ៉ាងណាផ្តល់ឱ្យអតិថិជនរបស់ខ្លួនមានោភាពរីករាយក្នុងការទស្សនាខ្សែភាពយន្ត ការលេងហ្គេម និងជាច្រើនទៀតនៅលើស្មាតហ្វូន LG G6 តែប៉ុណ្ណោះ។
នៅក្នុងសេចក្តីថ្លៃងការណ៍របស់ក្រុមហ៊ុន LG មុននេះ បាននិយាយថា “បើប្រៀបធៀបជាមួយនឹងអេក្រង់ធម្មតា ដែលមានកម្រិត 16:9 aspect ratio អេក្រង់របស់ស្មាតហ្វូន LG G6 ជាមួយកម្រិត 18:9 មានទំហំធំជាង ដែលផ្តល់នូវបទពិសោធន៍នូវការផ្តោតអារម្មណ៍កាន់តែអស្ចារ្យក្នុងការទស្សនាវីដេអូ និងការលេងហ្គេម៕”