ស្មាតហ្វូនស៊េរីថ្មី KEYone របស់ក្រុមហ៊ុន BlackBerry ត្រូវបានគេនិយាយអំពីវាជាយូរមកហើយ។ យើងឃើញការប្រកាសបង្ហាញស្មាតហ្វូនស៊េរីថ្មីនេះ នៅក្នុងព្រឹត្តិ ការណ៍តាំងពិពរណ៍ CES ក្នុងខែមករា ហើយយើងក៏ឃើញវត្តមានរបស់ វាម្តងទៀតនៅក្នុងព្រឹត្តិការណ៍តាំងពិពរណ៍ MWC មួយខែក្រោយមកផងដែរ។ ក្រុមហ៊ុន BlackBerry បានត្រៀមខ្លួនរួចរាល់ហើយក្នុងការចែកចាយស្មាតហ្វូននេះ ទៅកាន់ដៃអតិថិជន អ្នកប្រើប្រាស់ ហើយកាលបរិច្ឆេទនៃការដាក់លក់ ក៏ទម្លាយឱ្យដឹងផងដែរ។ ប្រសិនបើលោកអ្នករង់ចាំក្នុងការប្រើប្រាស់ស្មាតហ្វូនដែលមាន Keyboard នោះ ក្រុមហ៊ុន BlackBerry ប្រកាសថា ស្មាតហ្វូន KEYone នឹងទៅដល់សហរដ្ឋអាមេរិច និងកាណាដានៅថ្ងៃទី 31 ខែឧសភាខាងមុខនេះ។
ខណៈពេលដែលក្រុមហ៊ុន BlackBerry កំពុងតែបិទបាំងនូវព័ត៌មានលម្អិតមួយចំនួននោះ យើងដឹងថា ស្មាតហ្វូន Unlocked GSM និង CDMA នឹងដាក់លក់ជាផ្លូវការនៅសហរដ្ឋអាមេរិចនៅថ្ងៃទី 31 ខែឧសភា ។ ស្មាតហ្វូននេះនឹងដាក់លក់តាមរយៈក្រុមហ៊ុនចែកចាយធំៗជាច្រើនដែលក្នុងនោះក៏មាន Sprint ផងដែរនៅក្នុងរដូវក្តៅខាងមុខនេះ។ សម្រាប់ព័ត៌មានលម្អិតជាច្រើនទៀតនឹងទម្លាយឱ្យដឹងនៅកៀកចុងខែឧសភានេះជាក់ជាមិនខាន។ នៅក្នុងប្រទេសកាណាដាវិញ ស្មាតហ្វូន BlackBerry KEYone នឹងដាក់លក់នៅ Bell, Bell MTS, Rogers, SaskTel និង TELUS Business ចាប់ផ្តើមពីតម្លៃ 199 ដុល្លារ (CAD) ជាមួយនឹងការធានារយៈពេល 2 ឆ្នាំនៅថ្ងៃទី 31 ខែឧសភាដូចគ្នា។ ការកម្មង់ទិញមុន (Pre-order) នឹងធ្វើនៅថ្ងៃទី 18 ខែឧសភានេះ ដោយជ្រើសរើសតែក្រុមហ៊ុនសហការប៉ុណ្ណោះ។
តើលោកអ្នកចង់ចុះឈ្មោះកម្មង់ទិញស្មាតហ្វូនស៊េរីថ្មីនេះនោះទេ? ស្មាតហ្វូន BlackBerry KEYone មានអេក្រង់ទំហំ 4.5 អ៊ីងកម្រិតភាពច្បាស់ 1620x1080 បន្ទះឈីប Snapdragon 625 កាមេរ៉ាខាងក្រោយទំហំ 12MP កាមេរ៉ាខាងមុខទំហំ 8 MP និងថាមពលថ្មទំហំ 3505mAh ។ ស្មាតហ្វូននេះប្រើប្រាស់នូវ Physical Keyboard ដែលភ្ជាប់ជាមួយនឹង Shortcuts និងសែនស័រនៃប្រព័ន្ធស្កែនក្រយ៉ៅដៃបង្កប់នៅលើ Space Bar ផងដែរ៕
