តើលោកអ្នកនៅចងចាំឈ្មោះក្រុមហ៊ុនបច្ចេកវិទ្យា Nokia ទេ? ក្រុមហ៊ុន Nokia ហាក់ដូចជាកំពុងតែចង់វិលត្រឡប់មកប្រកួតប្រជែងនៅក្នុងទីផ្សារស្មាតហ្វូនពិភពលោករបស់ខ្លួនវិញនៅក្រោមការផលិតចែកចាយរបស់ក្រុមហ៊ុនថ្មីឈ្មោះថា HMD Global ។ ក្រុមហ៊ុន HMD Global ប្រកាសបង្ហាញនូវស្មាតហ្វូនជាច្រើនស៊េរីក្នុងព្រឹត្តិការណ៍ តាំងពិពរណ៍ MWC នៅក្នុងខែកុម្ភៈ ប៉ុន្តែមានតែស្មាតហ្វូនប៉ុន្មានស៊េរីប៉ុណ្ណោះ ដែលដាក់ឱ្យដំណើរការលក់នៅក្នុងខណៈពេលនេះ ហើយលោកអ្នកអាចរកទិញបានតែក្នុងប្រទេសចិនប៉ុណ្ណោះ។ នេះប្រហែលជាមានការយល់ព្រមរវាងក្រុមហ៊ុនបច្ចេកវិទ្យា HMD Global និងក្រុមហ៊ុនបច្ចេកវិទ្យា Nokia ក្នុងការពន្យារពេលលក់ស្មាតហ្វូនស៊េរីថ្មីៗជាច្រើននៅក្នុងរយៈពេលប៉ុន្មានខែនេះ។
យ៉ាងណាមិញ ស្ថានភាពនេះ ហាក់ដូចជានៅស្ងាត់ស្ងៀមដដែល។ កាលពីខែមីនា យើងគិតថា យើងពិតជាអាចទទួលបានស្មាតហ្វូនស៊េរីថ្មី Nokia 3, Nokia 5, Nokia 6 និង Nokia 3310 (2017) មកប្រើប្រាស់នៅក្នុងចក្រភពអង់គ្លេសនៅក្នុងខែឧសភា ប៉ុន្តែពេលនេះវាបានពន្យារពេលទៅដាក់លក់នៅក្នុងខែមិថុនាវិញ។ ដូចនេះប្រសិនបើលោកអ្នកកំពុងតែរស់នៅក្នុងចក្រភពអង់គ្លេស ហើយកំពុងតែចង់ប្រើប្រាស់ស្មាតហ្វូននេះខ្លាំងមែនទែននោះ សូមរង់ចាំមួយខែទៀត។
អ្វីដែលកាន់តែអាក្រក់ជាងនេះទៀតនោះ ស្មាតហ្វូន Nokia 3 និង Nokia 5 នឹងដាក់លក់ជាផ្លូវការនៅថ្ងៃទី 30 ខែមិថុនា ដែលជាថ្ងៃដាក់លក់ចុងក្រោយគេនៅក្នុងត្រីមាសទី 2 ក្នុងឆ្នាំនេះ។ ព័ត៌មាននេះ ត្រូវបានទម្លាយដោយក្រុមហ៊ុនលក់រាយអនឡាយ Clove ក្នុងចក្រភពអង់គ្លេសដែលចាប់ផ្តើមទទួលការកម្មង់ទិញស្មាតហ្វូននេះរួចរាល់ហើយ។
ទូរស័ព្ទ Nokia 3310 (2017) ត្រូវគេរំពឹងថា នឹងដាក់លក់ក្នុងពេលឆាប់ៗនេះ ប្រហែលជានៅពាក់កណ្តាលខែមិថុនា ខណៈពេលដែលស្មាតហ្វូន Nokia 6 ត្រូវគេដឹងត្រឹមថាដាក់លក់នៅក្នុងខែមិថុនា ប៉ុន្តែមិនច្បាស់ថានៅក្នុងថ្ងៃណានោះទេ។ ទោះជាយ៉ាងណាក៏ដោយ ក្រុមហ៊ុន Carphone Warehouse តែមួយគត់នឹងលក់ទូរស័ព្ទនេះ។ ដូចនេះ វាមានភាគរយតិចតួចណាស់ដែលស្មាតហ្វូន Nokia 6 នឹងដាក់លក់នៅក្នុងខែឧសភានេះ៕
