ក្រុមហ៊ុន Acer បានប្រារព្ធធ្វើនូវព្រឹត្តិការណ៍ដ៏ធំរបស់ខ្លួននៅទីក្រុងញ៉ូវយ៉កកាលពីដើមសប្តាហ៍នេះ។ ក្រុមហ៊ុន Acer បានប្រកាសបង្ហាញនូវផលិតផលបច្ចេកវិទ្យាថ្មីៗជាច្រើនដូចជាកុំព្យូទ័រ ស្មាតវ៉ច ឧបករណ៍បញ្ជាំងស្លាយ៍ (Projectors) ឧបករណ៍ Notebooks និងអេក្រង់ម៉ូនីទ័រស៊េរីថ្មី។ នៅក្នុងចំណោមផលិតផលដ៏ច្រើនសន្ធឹកសន្ធាប់ដែលក្រុមហ៊ុន Acer សម្ភោធបង្ហាញនៅសប្តាហ៍នេះ វាមានផលិតផលបច្ចេកវិទ្យាមួយដែលក្រុមហ៊ុនមិននិយាយលម្អិតច្រើននោះទេ។ មូលហេតុប្រហែលជាជាប់ពាក់ព័ន្ធទៅនឹងការពិតថា ឧបករណ៍បច្ចេកវិទ្យានេះគឺជាឧបករណ៍គំរូនៅឡើយ ឬក្រុមហ៊ុន Acer នៅមិនទាន់ច្បាស់ថាតើ ពេលណាដែលក្រុមហ៊ុនបច្ចេកវិទ្យា Acer នឹងដាក់លក់ឧបករណ៍បច្ចេកវិទ្យានេះនៅលើទីផ្សារនោះដែរ។
ឧបករណ៍បច្ចេកវិទ្យាមួយនេះមានឈ្មោះថា Acer Holo 360 ហើយវាមានកាមេរ៉ា 360 ដឺក្រេ ដែលដំណើរការប្រព័ន្ធប្រតិបត្តិការ Android ។ ផ្នែកខាងលើរបស់ឧបករណ៍នេះ អ្នកប្រើប្រាស់អាចខលបាន ដូចនេះឧបករណ៍ Holo 360 ក៏អាចប្រែក្លាយជាស្មាតហ្វូនបានផងដែរ នៅពេលដែលត្រូវការ។ បន្ថែមពីនេះទៀត ឧបករណ៍នេះមានអេក្រង់ Touchscreen និងប្រើប្រាស់ប្រព័ន្ធ LTE និង 4G LTE ដូចនេះ វាមិនមានព័ត៌មានច្រើននោះទេ អំពីឧបករណ៍ Holo 360 របស់ក្រុមហ៊ុន Acer ។ យ៉ាងណាមិញ យើងនៅមិនទាន់បានដឹងអំពីជំនាន់របស់ប្រព័ន្ធប្រតិបត្តិការ Android នេះ នៅឡើយទេ៕