បន្ទាប់ពីមានវត្តមានកំពូលហ្វាប់ប្លែត Sony Xperia Z Ultra, Xperia XA Ultra ដែលជាអាវុធ កម្រិតមធ្យមសម្រាប់បុកទីផ្សារប្រគូតប្រជែង ឥលូវនេះ យើងទទួលបានព័ត៌មានដ៏គួរឲ្យចាប់អារម្មណ៍មួយទៀតពីទូរស័ព្ទស្មាតហ្វូន ប្រភេទហ្វាប់ប្លែតជំនាន់ថ្មីបំផុតរបស់ SONY នោះគឺម៉ូដែល Xperia X Ultra។ យើងសង្កេតឃើញថាចាប់តាំងពីដើមឆ្នាំ 2016 មកក្រុមហ៊ុនបច្ចេកវិទ្យាជប៉ុនមួយនេះ បានធ្វើការច្នៃប្រឌិតខ្ពស់នៅលើទូរស័ព្ទស្មាតហ្វូនត្រកូល Xperia X របស់ខ្លួនជំនួសត្រកូល Xperia Z។
សម្រាប់ទូរស័ព្ទជំនាន់ថ្មី Xperia X Ultra ត្រូវបានព័ត៌មានបង្ហើបប្រាប់ឲ្យដឹងថា “ទូរស័ព្ទនេះ នឹងមានបណ្តោយតួរខ្លួនស្រោបដោយកញ្ចក់អេក្រង់វែងជាមួយខ្នាតអេក្រង់ធំរហូតដល់ទៅ 21:9 aspect ratio នៅលើកញ្ចក់អេក្រង់ទំហំ 6.45” (គែមអេក្រង់ស្តើងដូចក្នុងរូប)។ Xperia X Ultra មានកំពស់អេក្រង់ខ្ពស់ជាង និងកម្រិត aspect ratio ធំជាង Galaxy S8 (18.5:9) និង LG G6 (18:9) ប៉ុន្តែវាអាចនឹងមានកម្រិតបង្ហាញត្រឹម Full-HD(1080x1920px) ដូចម៉ូដែលមុនៗរបស់ SONY ដែរគ្រាន់តែកញ្ចក់អេក្រង់របស់វាអាចនឹងធ្វើការបន្ថែមកម្រិតភិចសែលឲ្យខ្ពស់ជាងជំនាន់មុនៗ។
សម្រាប់គុណសម្បត្តិមួយចំនួនទៀតរបស់វា ត្រូវបានប្រភពទម្លាយថា “Xperia X Ultra នឹងប្រើប្រាស់បន្ទះឈីប Qualcomm Snapdragon 660 ជាមួយរ៉េមទំហំ 4GB, ម៉េមូរីក្នុងម៉ាស៊ីនទំហំ 64GB, បំពាក់កាមេរ៉ាក្រោយទំហំ 19MP និងខាងមុខទំហំ 13MP។ ស្មាតហ្វូនមួយនេះ ក៏នឹងដំណើរការដោយប្រតិបត្តិការ Android Nougat v7.0, មានថ្មទំហំ 3,050mAh ភ្ជាប់មកជាមួយនូវបច្ចេកវិទ្យាសាកថាមពលថ្មល្បឿនលឿន Quick Charge 3.0 ហើយក៏មានបំពាក់អាវគ្រោះការពារទឹក និងធូលីកម្រិត IP68 ថែមទៀតផង៕