របាយការណ៍ជាច្រើនចុះផ្សាយកាលពីពេលមុននេះ បានអះអាងថា ស្មាតហ្វូនស៊េរីថ្មី Sony Xperia XZ Premium នឹងវាយលុកទីផ្សារនៅទ្វីបអ៊ឺរ៉ុប នៅដើមខែមិថុនាខាងមុខនេះ ដែលមានន័យថាស្មាតហ្វូននេះ នឹងបង្ហាញខ្លួនមុនដំបូងគេបំផុតនៅទឹកដីចក្រភពអង់គ្លេស។ យ៉ាងហោចណាស់ ក្រុមហ៊ុនចែកចាយមួយនៅចក្រភពអង់គ្លេសប្រកាសថា ក្រុមហ៊ុននឹងធានាទៅលើស្តុកនៃស្មាតហ្វូន Xperia XZ Premium និងគម្រោងជាច្រើនទៀតក្នុងការលក់ស្មាតហ្វូននេះ នៅខែក្រោយនេះ។ យោងទៅតាម Unlocked-mobile ស្មាតហ្វូនស៊េរីថ្មីនេះ អាចនឹងរកទិញបានផងដែរនៅថ្ងៃទី 22 ខែឧសភាសប្តាហ៍នេះ។
ស្មាតហ្វូន Sony Xperia XZ Premium ដាក់ឱ្យធ្វើការកម្មង់ទិញមុន (Pre-order) រួចរាល់ហើយនៅក្នុងចក្រភពអង់គ្លេស ហើយអតិថិជនដែលកម្មង់ទិញស្មាតហ្វូននេះនឹងទទួលបាននូវកាសស្តាប់ស៊េរីថ្មីដោយឥតគិតថ្លៃ។ ក្រុមហ៊ុនចែកចាយក៏ប្រកាសដែរថា ការកម្មង់ទិញមុនទាំងអស់ នឹងចាប់ផ្តើមដឹកជញ្ជូនភ្លាមនៅពេលស្តុកមកដល់។ នៅក្នុងចក្រភពអង់គ្លេស ស្មាតហ្វូនSony Xperia XZ Premium ដាក់លក់នៅក្នុងតម្លៃ 645 ផោន ឬស្មើរនឹង 830 ដុល្លារអាមេរិច។ ក្រុមហ៊ុនលក់រាយជាច្រើនទៀតនៅទូទាំងទ្វីបអ៊ឹរ៉ុប នឹងដាក់លក់ស្មាតហ្វូន Sony Xperia XZ Premium នៅក្នុងតម្លៃប្រហែលជា 750 អ៊ឺរ៉ូ ប៉ុន្តែស្មាតហ្វូននេះ នឹងមកដល់នៅក្នុងខែមិថុនាជាក់ជាមិនខាន៕
