ថ្លែងនៅក្នុងសន្និសីទកាសែតមួយនៅទីក្រុងលីសបន (Lisbon) លោក Jens Heithecker នាយកប្រតិបត្តិរបស់ IFA និយាយថា ព្រឹត្តិការណ៍តាំងពិព័រណ៍ពាណិជ្ជកម្មគ្រឿងអេឡិចត្រូនិកប្រចាំឆ្នាំនៅក្នុងទីក្រុងប៊ែកឡាំង (ប្រារព្ធឡើងនៅក្នុងខែកញ្ញា) នឹងក្លាយជាកន្លែងល្អប្រសើរមួយសម្រាប់ក្រុមហ៊ុនបច្ចេកវិទ្យា Samsung ដាក់បង្ហាញហ្វាប់ប្លេតស៊េរីថ្មី Galaxy Note 8 របស់ខ្លួន។
លោក Jens Heithecker ចង្អុលបង្ហាញថា លោកចង់ឱ្យក្រុមហ៊ុនបច្ចេកវិទ្យា Samsung ត្រឡប់មកតាំងពិពរណ៍នៅក្នុងព្រឹត្តិការណ៍ IFA វិញបន្ទាប់ពីក្រុមហ៊ុនមួយនេះចាប់ផ្តើមប្រកាសបង្ហាញនូវហ្វាប់ប្លេតស៊េរីថ្មីត្រកូល Note របស់ខ្លួនមុននេះ នៅក្នុងខែសីហា ហើយប្តូរទីតាំងទៅទីក្រុងញូវយ៉ក។ រវាងហ្វាប់ប្លេត Galaxy Note ស៊េរីដំបូង និងហ្វាប់ប្លេត Galaxy Note 4 ក្រុមហ៊ុន Samsung ចេញសេចក្តីប្រកាសរបស់ខ្លួនក្នុងការប្រារព្ធធ្វើនៅក្នុងទីក្រុងប៊ែកឡាំងដែលមានរយៈពេលមួយថ្ងៃ ឬពីរថ្ងៃមុនព្រឹត្តិការណ៍តាំងពិពរណ៍ IFA។
លោក Heithecker និយាយបន្ថែមទៀតថា ក្រុមហ៊ុនបច្ចេកវិទ្យា Samsung នឹងធ្វើបទបង្ហាញធំបំផុតនៅក្នុងព្រឹត្តិការណ៍តាំងពិពរណ៍នៅក្នុងឆ្នាំនេះ ប៉ុន្តែយើងនៅមិនទាន់ដឹងថា តើនោះគឺជាការដាក់បង្ហាញហ្វាប់ប្លេត Galaxy Note ទូរទស្សន៍ឆ្លាតវៃ Smart TVs ឬម៉ាស៊ីនបោកសម្លៀកបំពាក់នោះ។ គួរបញ្ជាក់ផងដែរថា ហ្វាប់ប្លេត Galaxy Note 8 ត្រូវគេជឿជាក់ថា នឹងមានរូបរាងធំជាងទំហំរបស់ស្មាតហ្វូនត្រកូល Galaxy S8 ហើយវាថែមទាំងមានប្រព័ន្ធស្កែនក្រយ៉ៅដៃ (Fingerprint Scanner) នៅក្រោមកញ្ចក់ និងប្រព័ន្ធកាមេរ៉ាភ្លោះ (Dual-Camera)៕