យើងបានដឹងមួយរយៈពេលនេះរួចមកហើយថា ក្រុមហ៊ុន Lenovo កំពុងតែសម្លឹងមើលក្នុងការផ្លាស់ប្តូរយុទ្ធសាស្រ្តអាជីវកម្មស្មាតហ្វូនរបស់ខ្លួន ឬវិធីដែលក្រុមហ៊ុនសាងកេរ្តិ៍ឈ្មោះរបស់ម៉ាកយីហោ ស្របពេលនាពេលបច្ចុប្បន្ននេះ ក្រុមហ៊ុនបច្ចេកវិទ្យាមួយនេះកំពុងតែដំណើរការលក់ក្រោមឈ្មោះក្រុមហ៊ុនផ្សេងៗគ្នាដូចជា Moto, Lenovo និង ZUK Mobile ។ រហូតមកទល់ពេលនេះ វាបង្ហាញយ៉ាងច្បាស់ថា ការផ្លាស់ប្តូរផ្ទៃក្នុងមួយចំនួនបានធ្វើឱ្យក្រុមហ៊ុនក្មេងខ្ចីជាងគេបំផុតត្រៀមខ្លួនបិទទ្វារទាំងស្រុងតែម្តង។
ក្រុមហ៊ុន ZUK ចាប់ផ្តើមប្រឡូកនៅក្នុងទីផ្សារអាជីវកម្មស្មាតហ្វូនមានរយៈពេលតិចជាង 2 ឆ្នាំតែប៉ុណ្ណោះ ហើយក្រុមហ៊ុននេះ បញ្ចេញស្មាតហ្វូនបានត្រឹមតែ 5 គ្រឿង ហើយស្មាតហ្វូនស៊េរីថ្មីចុងក្រោយគេដែលបង្ហាញខ្លួននៅឆ្នាំមុននោះគឺម៉ូដែល ZUK Edge ។ ការផ្លាស់ប្តូរនេះ អាចពាក់ព័ន្ធទៅនឹងរឿងបញ្ហាហិរញ្ញវត្ថុ ខណៈពេលដែលអាជីវកម្មស្មាតហ្វូនរបស់ក្រុមហ៊ុននេះដំណើរការល្អនៅក្នុងទីផ្សារនៃប្រទេសចិន។
ដំណឹងនេះបានមកពីការសន្ទនាគ្នានៅលើវេទិកាផ្សព្វផ្សាយសង្គមនៃកម្មវិធី Weibo របស់ប្រទេសចិន ដែលបង្ហាញយ៉ាងច្បាស់ថា ក្រុមហ៊ុន ZUK នឹងមិនបន្តដំណើរការអាជីវកម្មស្មាតហ្វូនរបស់ខ្លួនទៀតនោះទេ។ ទោះជាយ៉ាងណាក៏ដោយ រឿងមួយដែលយើងដឹងច្បាស់នោះគឺថា ZUI Android UI ត្រូវបានគេបញ្ជាក់ថានឹងដាក់ឱ្យប្រើប្រាស់នៅលើស្មាតហ្វូនរបស់ក្រុមហ៊ុន Moto ប៉ុន្តែនៅក្នុងប្រទេសចិនតែប៉ុណ្ណោះ។
