ថ្ងៃនេះ មានរបាយការណ៍ថ្មីបានបង្ហាញថា Samsung Galaxy Note 7 ជំនាន់ថ្មី នឹងត្រូវក្រុមហ៊ុន Samsung ប្រកាសសម្ពោធបង្ហាញខ្លួននៅក្នុងប្រទេសកូរ៉េនៅចុងខែមិថុនាខាងមុខនេះហើយ។ បើតាមដឹង ក្រុមហ៊ុន Samsung គឺមានគម្រោងក្នុងការដាក់លក់សារជាថ្មីទៅលើហ្វាប់ប្លេតនេះឡើងវិញ ជាមួយនឹងថាមពលថ្មតូចជាងមុន និងតម្លៃទាបជាងមុនផងដែរ។ ហ្វាប់ ប្លេត Samsung Galaxy Note 7 គឺមានការពេញនិយមខ្លាំង នៅក្នុងចំណោមស្មាតហ្វូនជាច្រើនរបស់ក្រុមហ៊ុន Samsung ប៉ុន្តែគួរអោយសោកស្តាយ វាក៏មានបញ្ហាដោយសារហ្វាប់ប្លេតប៉ុន្មានគ្រឿង មានបញ្ហារហូតទាល់តែផ្ទុះ ដែលនេះបណ្តាលឱ្យមានការប្រកាសប្រមូលត្រឡប់មកវិញនូវហ្វាប់ប្លេត Galaxy Note7 មកវិញទាំងអស់ពីទីផ្សារនៅលើពិភពលោកតែម្តង។
កួរបញ្ជាក់ថា នៅកំឡុងពេលនោះ ក្រុមហ៊ុន Samsung បានព្យាយាមប្រើប្រាស់យុទ្ធសាស្រ្តខ្លាំងបំផុត ដើម្បីធានសុវត្តិភាព និងរក្សានូវបាននូវការលើកទឹកចិត្តដល់អតិថិជនរបស់ខ្លួន ដោយធ្វើយ៉ាងណាឱ្យម្ចាស់របស់ហ្វាប់ប្លេតស៊េរីថ្មី Galaxy Note 7 ផ្លាស់ប្តូរហ្វាប់ប្លេតរបស់ពួកគេ ជាមួយនឹងស្មាតហ្វូន Samsung Galaxy S7 edge ឬស្មាតហ្វូនផ្សេង ដែលមានតម្លៃប្រហាក់ប្រហែលគ្នា។ ហើយពេលនោះ ក៏មានអតិថិជនជាច្រើន បានទទួលយកការផ្លាស់ប្តូរនេះដោយសារ តែពួកគេភ័យព្រួយថាហ្វាប់ប្លេតរបស់ពួកគេអាចនឹងផ្ទុះនៅក្នុងហោប៉ៅរបស់ពួកគេ។
សូមជំរាបថា ការរចនារូបរាង និងលក្ខណៈសម្បត្តិរបស់ហ្វាប់ប្លេត Galaxy Note 7 ពិតជាស្រស់ស្អាត ដូចនេះ ក្រុមហ៊ុន Samsung ក៏រៀបចំខ្លួនក្នុងការប្រកាសសម្ពោធហ្វាប់ប្លេតនេះ សារជាថ្មីឡើងវិញ ដែលប្តូរទៅជាម៉ូដែលថ្មីឈ្មោះថា Samsung Galaxy Note 7R ដែលមានតម្លៃត្រឹមតែ 620 ដុល្លារប៉ុណ្ណោះ តម្លៃនេះមានការកាត់បន្ថយចំនួន 29% ។ បើតាមការបង្ហាញនៅក្នុងរបាការណ៍ថ្មីនេះ អោយដឹងថា ហ្វាប់ប្លេត Galaxy Note 7 ក្រុមហ៊ុន Samsung នឹងប្រើប្រាស់ថាមពលថ្មត្រឹមតែ 3200mAh តែប៉ុណ្ណោះ។ គោលដៅរបស់ក្រុមហ៊ុន Samsung នៅពេលនេះ គឺនាំយកនូវទឹកប្រាក់ដែលខ្លួនបាត់បង់ត្រឡប់មកវិញ។ ហ្វាប់ប្លេតនេះ ក្រុមហ៊ុន Samsung គ្រោងដាក់លក់នៅក្នុងទ្វីបអាស៊ី និងផ្នែកមួយចំនួននៅក្នុងទ្វីបអ៊ឺរ៉ុបតែប៉ុណ្ណោះ។ ដើម្បីចង់ដឹងកាន់តែច្បាស់នោះ សូមតាមដានជាមួយយើងខ្ញុំទាំងអស់គ្នា ថាតើរបាយការណ៍ដែលេចចេញថ្មីនេះ គឺវាពិតប្រាកដ ឬយ៉ាងណា?
