បន្ទាប់ពីក្រុមហ៊ុន Apple បានជ្រើសរើសក្រុមហ៊ុនផ្គត់ផ្គង់ទៅលើសមាសភាគរបស់ខ្លួនកាលពីថ្មីៗនេះ គោលដៅរបស់ក្រុមហ៊ុន គឺមិនត្រឹមតែផ្តល់អោយ Apple អាចធានាបានថានិងមានការផ្គង់ផ្គង់ការផលិតទ្រង់ទ្រាយធំដ៏ច្រើនលើសលប់ប៉ុណ្ណោះទេ គឺសមាសភាគនៃអ្នកផលិតទាំងអស់នោះ ត្រូវតែផលិតនូវផលិតផលប្រកបដោយគុណភាព ដែលក្រុមហ៊ុនបានត្រៀមរួចរាល់ជាស្រេចសម្រាប់ដាក់ដំណើរការនៅលើទូរស័ព្ទ iPhone ស៊េរីថ្មីរបស់ខ្លួន។ បើតាមការដឹងនោះ គឺថា នេះមិនមែនជារឿងតូចតាចនោះទេ នៅក្នុងការសម្រេចឱ្យបានលទ្ធផលល្អសម្រាប់ក្រុមហ៊ុនផ្គត់ផ្គង់ជាច្រើន ពិសេសក្រុមហ៊ុន Foxconn តែម្តង។ ហើយក៏សូមបញ្ជាក់ថា នៅក្នុងឆ្នាំនេះ ក្រុមហ៊ុន Apple ក៏មានគម្រោងនៅក្នុងការសម្ពោធទូរស័ព្ទ iPhone 8 ដែលប្រើប្រាស់អេក្រង់ OLED ផងដែរ។
ជាមួយគ្នានេះ Asian Review ដែលជាផ្នែកមួយរបស់គេហទំព័រ Nikkei បានរាយការណ៍ថា ក្រុមហ៊ុនផ្គត់ផ្គង់ជាច្រើនកំពុងតែញាប់ដៃញាប់ជើងយ់ាងខ្លាំង នៅក្នុងការផលិតនូវសមាសភាគថ្មីៗជាច្រើន ដើម្បីផ្គត់ផ្គង់ឱ្យទាន់ពេលវេលា ខណៈក្រុមហ៊ុន Apple ក៏បានបញ្ជាទិញនូវបន្ទះអេក្រង់ OLED រាប់លានសន្លឹកពីក្រុមហ៊ុន Samsung ផងដែរ។ ពេលនេះ ការផលិត Motherboard ថ្មី ដែលមានទំហំតូចកំពុងតែជួបបញ្ហា ពីព្រោះ វាពិបាកក្នុងការផលិតដោយសារតែការផ្តោតទៅលើគុណភាព និងភាពត្រឹមត្រូវ។ ចំនែក Board សម្រាប់ wireless charging ត្រូវគេរាយការណ៍ថា មានការកើនឡើងកម្តៅខ្លាំងពេក នេះបើយោងទៅតាមលោក Sean Kao អ្នកវិភាគនៅ IDC ។ “វាមានការរចនារូបរាងថ្មីសម្រាប់ការបង្កើតនូវសៀគ្វី Board ដែលមានទំហំតូចជាងមុន ប៉ុន្តែផ្តល់នូវសក្តានុពលខ្លាំងទៅលើថាមពលថ្មសម្រាប់ទូរស័ព្ទ iPhone ថ្មីនេះ ម្យ៉ាងទៀត វាក៏នៅតែមានបញ្ហាគុណភាពមួយចំនួនផងដែរ ដើម្បីសម្រេចបាននូវការផលិតដោយរលូននោះ។”
សម្រាប់ដំណើរការនៃការផលិតអេក្រង់ OLEDs របស់ក្រុមហ៊ុន Samsung វិញ ការផលិតរបស់ពួកគេសន្មត់ថា មិនទាន់ជួបការលំបាកអ្វីនោះទេ។ ក្រុមហ៊ុន Apple ធ្លាប់និយាយថា ក្រុមហ៊ុនបញ្ជាកម្មង់ទិញអេក្រង់ OLED គុណភាពខ្ពស់ចំនួន 70 ទៅ 90 លានសន្លឹកពីក្រុមហ៊ុនបច្ចេកវិទ្យានៅកូរ៉េ ប៉ុន្តែការសម្រេចឱ្យទាន់ពេលវេលានៅតែជាបញ្ហាដោយសារតែអេក្រង់នោះ អាចទៅដល់រោងចក្រ Foxconn នៅចុងខែមិថុនា ឬនៅក្នុងខែកក្កដា។ សរុបមក ការព្យាករណ៍ទៅលើកាលបរិច្ឆេទនៃការសម្ភោធទូរស័ព្ទ iPhone 8 ប្រហែលជាធ្វើនៅក្នុងខែវិច្ឆិកា ឬនៅចុងខែតុលា។ យ៉ាងណាមិញ យើងនៅតែសង្ឃឹមថា ទូរស័ព្ទស៊េរីថ្មីនេះ នឹងប្រកាសសម្ពោធជាផ្លូវការនៅក្នុងព្រឹត្តិការណ៍ខែកញ្ញាដូចការគ្រោងទុក ៕