ក្រោយពីបានងាកចេញពីការប្រគូតប្រជែងក្នុងទីផ្សារស្មាតហ្វូនពេលនេះ ក្រុមហ៊ុនផលិតកម្មវិធីកុំព្យូទ័រយក្សរបស់អាមេរិក Microsoft បានហក់ចូកទៅក្នុងវិស័យផលិតកុំព្យូទ័រយូរដៃដោយជ្រកក្រោមស្លាកសញ្ញា “Microsoft Surface Laptop”។ យើងបានដឹងហើយថា “Surface” របស់ Microsoft គឺជាកុំព្យូទ័របន្ទះស្តើងកាត់ជាមួយឧបករណ៍ថេបប្លែត ដែលអាចអោយយើងប្រើប្រាស់ផ្តាច់ចេញជាថេបប្លែតក៏បាន និងប្រើដោយភ្ជាប់ជាមួយក្តារចុច (Key board) ក៏បាន។
ប៉ុន្តែពេលនេះ សម្រាប់ Surface Laptop ស៊េរីថ្មីដំបូងនេះវិញវាផលិតឡើងជាប្រភេទកុំព្យូទ័រយួរដៃសុទ្ធសាទ គឺមិនអាចផ្តាច់ចេញពីគ្នាបានឡើយតែយើងនៅតែអាចប្រើប្រាស់ចុចបញ្ជាលើផ្ទៃអេក្រង់របស់វាបានដដែល។ កុំព្យូទ័រយូដៃដំបូងរបស់ Microsoft នេះ មានតម្លៃ $999.00 ហើយក៏មានម៉ូដែលតម្លៃដល់ $ 2,199 ផងដែរ ទៅតាមសមត្ថភាពផ្នែករឹង និងកំលាំងម៉ាស៊ីនរបស់វា។ Surface Laptop នេះ មានកម្រាស់ស្តើងត្រឹមតែ 1.47 មីលីម៉ែត្រជាមួយទំងន់ស្រាលត្រឹមតែ 1.25 គីឡូក្រាមប៉ុណ្ណោះ ដូច្នេះ វាផ្តល់លក្ខណះងាយស្រួលក្នុងការទុកដាក់យកតាមខ្លួន។ ជាមួយកញ្ចក់អេក្រង់ថាច់ទំហំ 13.5”របស់វាគឺយើងអាចទស្សនានៅផ្ទាំងទស្សនីយភាពទូទៅបានក្នុងកម្រិត 2256x1504 ភិចសែល។
Surface Laptop ត្រូវបានភ្ជាប់ដំណើរការដោយស៊ីភីយូជំនាន់ទី 7 ស៊េរី Kaby Lake Processor របស់ Intel ដែលអាចឲ្យអ្នកប្រើប្រាស់ជ្រើសរើសបានតាមទំហំនៃការប្រើប្រាស់របស់ពួកគេដែលមានម៉ូដែលបំពាក់ស៊ីភីយូ Intel Core-i5 7200U ជាមួយរ៉េមទំហំ 4GB, ថាសរឹងសម្រាប់ផ្ទុកឯកសារទំហំ 128GB និងម៉ូដែលបំពាក់ស៊ីភីយូ Core-i7 ជាមួយរ៉េមទំហំ 16GB, ថាសរឹងសម្រាប់ផ្ទុកឯកសារទំហំ 512GB។
បន្ថែមពីនេះ វាក៏នៅមានភ្ជាប់មកជាមួយថ្មអាចកាន់បាន 14.5 ម៉ោង, មានរន្ធដោត USB3.0 មួយ (មិនមែនរន្ធ USB-C), mini Display Port មួយ និងជាពិសេសគឺវាប្រតិបត្តិការជាមួយ Windows 10 S ជំនាន់ថ្មីដែលមានប្រតិបត្តិការលឿនរហ័ស (Login User ប្រើពេលតែ 15 វិនាទីចំពោះការបើកដំណើរប្រើប្រាស់លើដំបូង)។ Microsoft នឹងបញ្ចេញលក់កុំព្យូទ័រ Surface Laptop ស៊េរីថ្មីនេះលើទីផ្សារនៅថ្ងៃទី 15 ខែ មិថុនា 2017 ខាងមុខនេះ៕