Xperia XZ Premium គឺជាស្មាតហ្វូនដំបូងបំផុតរបស់ក្រុមហ៊ុនបច្ចេកវិទ្យា Sony ដែលបំពាក់នូវបន្ទះឈីប Qualcomm Snapdragon 835 ដែល CPU នេះ គឺដូចគ្នាទៅហ្នឹងបន្ទះឈីបដែល Samsung ប្រើប្រាស់នៅលើស្មាតហ្វូនស៊េរីថ្មី Galaxy S8 និង Galaxy S8+ អញ្ចឹងដែរ ។ ទោះជាយ៉ាងណាក៏ដោយ ខុសគ្នាពីស្មាតហ្វូនរបស់ក្រុមហ៊ុន Samsung ស្មាតហ្វូន Xperia XZ Premium នៅមិនទាន់ដាក់លក់ជាផ្លូវការនៅឡើយទេ ប៉ុន្តែ វាអាចធ្វើការកម្មង់ទិញមុន (Pre-order) បាននៅក្នុងប្រទេសមួយចំនួននៅជុំវិញពិភពលោក។ ដូចអ្វីដែលយើងបានរាយការណ៍ប៉ុន្មានថ្ងៃមកនេះ ស្មាតហ្វូន Sony Xperia XZ Premium នឹងដាក់លក់ជាផ្លូវការនៅចុងខែឧសភានេះ ឬនៅដើមខែមិថុនា។
ប្រសិនបើលោកអ្នកចង់ដឹងអំពីសមត្ថភាពរបស់ស្មាតហ្វូនស៊េរីថ្មី Xperia XZ Premium ខ្លាំងកម្រិតណានោះ លោកអ្នកពិតជាអាចដឹងច្បាស់ហើយ ដោយសារតែស្មាតហ្វូនស៊េរីថ្មីរបស់ក្រុមហ៊ុន Sony នេះ ទើបតែធ្វើតេស្តរួចរាល់នៅលើ Geekbench មិនដឹងអ្នកណាម្នាក់នោះទេ ដែលបានធ្វើតេស្តទៅលើស្មាតហ្វូន Xperia XZ Premium នៅលើ Geekbench ដែលលទ្ធផលរបស់វា គឺដូចគ្នាទៅនឹងការសន្យារបស់ក្រុមហ៊ុន Sony ផងដែរ។ យើងនៅមិនទាន់ដឹងថា តើការធ្វើតេស្តនេះ មានប្រភពចេញពីក្រុមហ៊ុនលក់រាយ ឬឧបករណ៍គំរូនោះទេ។
បើទោះបីជាលទ្ធផលរបស់វា មិនលើសពីសមត្ថភាពរបស់ស្មាតហ្វូន Galaxy S8 និង Galaxy S8+ ក្តី ស្មាតហ្វូនរបស់ក្រុមហ៊ុន Sony ពិតជាមានសមត្ថភាពខ្លាំង។ ស្មាតហ្វូននេះ ទទួលបានពិន្ទុដល់ទៅ 1943 (Single Core) និងពិន្ទុ 5824 (Multi-core) នៅក្នុងការធ្វើតេស្តសាកល្បង។