ស្មាតហ្វូនជំនាន់ថ្មីរបស់ SONY ម៉ូដែល Xperia XZ Premium ត្រូវបានបង្ហាញវត្តមានជាផ្លូវការណ៍ប៉ុន្មានខែមកហើយ គឺចាប់តាំងពីកំឡុងខែកុម្ភះមកម្ល៉េះ ក៏ប៉ុន្តែទូរស័ព្ទជំនាន់ថ្មីមួយនេះ ហាក់មិនទាន់មកចេញចរាចរណ៍លក់ទូលំទូលាយនៅឡើយទេក្នុងទីផ្សារ ជាពិសេសទីផ្សារនៅក្នុងបណ្តាប្រទេសសហភាពអឺរ៉ុបតែម្តង។ ដោយឡែកសម្រាប់ពេលនេះដែរ ក្រុមហ៊ុនបច្ចេកវិទ្យាដ៏ធំរបស់ជប៉ុនមួយនេះ គឺបានចាប់ផ្តើមទទួលយកការបញ្ជាទិញមុនជាផ្លូវការណ៍សម្រាប់ទូរស័ទ្ទម៉ូដែល Sony Xperia XZ Premium នេះហើយក្នុងទីផ្សាររបស់អឺរ៉ុប។
ទូរស័ព្ទជំនាន់ថ្មីមួយនេះ ត្រូវបានក្រុមហ៊ុនរាយនៅក្នុងបញ្ចី Xperia Store ដែលវាត្រូវបានដាក់លក់ក្នុងតម្លៃប្រមាណ 649£ សម្រាប់ទីផ្សាររបស់ចក្រភពអង់គ្លេស និង €749 ក្នុងទីផ្សារអឺរ៉ុបដីគោក។ ចំពោះពណ៌ ដែលត្រូវដាក់លក់ក្នុងទីផ្សាររបស់អឺរ៉ុប គឺពណ៌ខ្មៅទឹកសមុទ្រ (Deepsea Black) និងពណ៌ប្រផេះក្រម៉ៅ (Luminous Chrome)។ SONY ក៏មានការផ្តល់ជូនបន្ថែមសម្រាប់ការបញ្ជាទិញមុនសម្រាប់ទីផ្សារក្នុងទ្វីបអឺរ៉ុបនេះផងដែរ។
សម្រាប់អតិថិជននៅប្រទេសអាល្លឺម៉ង់ ដែលបានបញ្ជាទិញមុននឹងទទួលបានកាសស្តាប់ស៊េរី Sony MDR-100ABN មួយដែលមានតម្លៃប្រមាណ €299 ចំនែកសម្រាប់អតិថិជនក្នុងចក្រភពអង់គ្លេសវិញ ក៏នឹងទទួលបានកាសស្តាប់ស៊េរី Sony MDR-NC750 ដែលមានតម្លៃប្រមាណ £60 ផងដែរ។ ហើយការបន្ថែមជូននេះនឹងបន្តរហូតដល់ថ្ងៃទី 31 ខែឧសភានេះ ហើយសម្រាប់ការដឹកជញ្ចូនមកដល់ដៃអ្នកដែលបញ្ជាទិញនឹងចាប់ផ្តើមនៅដើមខែក្រោយនេះតែម្តង (មិថុនា)៕
