ស្មាតហ្វូនស៊េរីថ្មី Samsung Galaxy S8 និង Galaxy S8+ របស់ក្រុមហ៊ុន Samsung កំពុងតែមានដំណើរការលក់យ៉ាងល្អនៅលើទីផ្សារពិភពលោក។ មិនទាន់គ្រប់មួយខែផងក្រោយពេលសម្ភោធន៍ដាក់លក់ជាផ្លូវការនៅថ្ងៃទី 21 ខែមេសា ការលក់ស្មាតហ្វូនត្រកូល Galaxy S8 ជាសកលត្រូវគេរាយការណ៍ថា មានចំនួនលើសពី 5 លានគ្រឿង។ ក្រុមហ៊ុន Samsung មិនបានផ្តល់តួរលេខលម្អិតនៃចំនួននៃការលក់នេះទេ ប៉ុន្តែបុគ្គលិកធ្វើការនៅក្រុមហ៊ុននេះ ប្រាប់សារព័ត៌មាន The Investor ថា ការលក់ស្មាតហ្វូនត្រកូល Galaxy S8 គឺដំណើរការយ៉ាងល្អនៅជុំវិញពិភពលោក ហើយវាមានចំនួនលើសពី 5 លានគ្រឿង រួចមកហើយ។ ចំនួននៃការលក់នេះ គឺសំដៅទៅលើការលក់ស្មាតហ្វូន Galaxy S8 និង Galaxy S8+ ទាំងពីរស៊េរីម៉ូដែល។
គួរបញ្ជាក់ផងដែរថា ក្រុមហ៊ុន Samsung ធ្លាប់បានបញ្ជាក់រួចមកហើយថា ក្រុមហ៊ុន គ្រោងនិងនាំចេញស្មាតហ្វូនស៊េរីថ្មីត្រកូល Galaxy S8 របស់ខ្លួនទៅកាន់ប្រទេសចំនួន 120 ផ្សេងគ្នានៅចុងខែនេះ ដែលក្នុងនោះ ក៏មានប្រទេសចិនផងដែរ។ ការពង្រីកវិសាលភាពនៃការលក់នេះ នឹងធ្វើឱ្យការលក់មានការកើនឡើងខ្លាំងជាបន្តទៀត ហើយតួរលេខនៃការលក់របស់ Galaxy S8 អាចនឹងប្រហាក់ប្រហែលទៅនឹងការទស្សន៍ទាយរបស់ក្រុមអ្នកវិភាគ។ ក្រុមអ្នកវិភាគទស្សន៍ទាយថា ក្រុមហ៊ុន Samsung អាចលក់ស្មាតហ្វូន Galaxy S8 និង Galaxy S8+ របស់ខ្លួនបានចំនួន 20 លានគ្រឿង នៅចុងត្រីមាសទី 2 នេះ ហើយចប់ឆ្នាំនេះ ក្រុមហ៊ុន អាចនិងលក់ស្មាតហ្វូនស៊េរីថ្មីនេះ អោយបានចំនួន 50 លានគ្រឿង ទៅ 60 លានគ្រឿង។
កាលពីខែមីនា លោក Ming-Chi Kuo ដែលជាអ្នកវិភាគដ៏ល្បីឈ្មោះរបស់ក្រុមហ៊ុន KGI ទស្សន៍ទាយថា ការនាំចេញស្មាតហ្វូន Galaxy 8 នៅក្នុងឆ្នាំ 2017 នេះ មានចំនួនត្រឹមតែ 40 លានគ្រឿង ទៅ 45 លានគ្រឿងតែប៉ុណ្ណោះ ដែលមានន័យថាវាមានចំនួនតិចជាងការនាំចេញស្មាតហ្វូន Galaxy S7 នៅក្នុងឆ្នាំ 2016 មានចំនួនដល់ទៅ 52 លានគ្រឿង។ ប៉ុន្តែប៉ុន្មានថ្ងៃក្រោយពេលស្មាតហ្វូន Galaxy S8 បានបង្ហាញខ្លួនជាផ្លូវការនៅលើទីផ្សារ អ្នកវិភាគម្នាក់ទៀតឈ្មោះថា Lee Jae-Yoon របស់ក្រុមហ៊ុន Yuanta Securities បានទស្សន៍ទាយថា ក្រុមហ៊ុន Samsung អាចលក់ស្មាតហ្វូន Galaxy S8 ប្រហែលជា 50.4 លានគ្រឿងនៅក្នុងឆ្នាំ 2017 នេះ។ ឥឡូវនេះមិន ទាន់ដល់មួយខែផង ចំនួននៃការលក់ស្មាតហ្វូន Galaxy S8 មានចំនួនលើសពី 5 លានគ្រឿង ដែលមានន័យថា ត្រឹមតែការលក់ចំនួន 50 លានគ្រឿងនោះ ក្រុមហ៊ុន Samsung ពិតជាអាចធ្វើបាន៕
