កាលពីដើមឆ្នាំនេះ នៅក្នុងព្រឹត្តិការណ៍ MWC ក្រុមហ៊ុន HMD បានប្រកាសបង្ហាញចេញនូវទូរស័ព្ទស្មាតហ្វូន ដែលបានជ្រកនៅក្រោមស្លាកយីហោ Nokia និងដំណើរការដោយប្រតិបត្តិការ Android ចំនួនបីស៊េរីគឺ Nokia 3, Nokia 5 និង Nokia 6 ហើយក្នុងនោះ ក៏មានទូរស័ព្ទដៃធម្មតាមមួយទៀតផងដែរគឺ Nokia 3310 ស៊េរីឆ្នាំ 2017។ មិនតែប៉ុណ្ណោះ HMD ក៏បានសន្យាដែរថា នឹងពាំនាំទូរស័ព្ទបែប Premium Phone ជាច្រើនគ្រឿងបន្ថែមទៀតសម្រាប់ប្រគូតប្រជែងទីផ្សារនៅជិតដំណាច់ឆ្នាំ 2017 នេះ។
ហើយខណះពេលនេះ ក៏មានការបែកធ្លាយចេញនូវវីដេអូខ្លីបខ្លីមួយ ដែលបានបង្ហាញនូវទូរស័ព្ទស៊េរី Nokia ចំនួនបួនម៉ូដែលទៀត។ ក្នុងវីដេអូនេះ ហាក់ដូចជាក្រុមហ៊ុនមួយនេះ ចង់ធ្វើការប្រូម៉ូដ និងបង្ហាញចេញនូវទូរស័ព្ទចំនួន 4 ស៊េរី ហើយក្នុងនោះ មានពីរស៊េរីដូចជា Nokia 3 និង Nokia 5 ប៉ុន្តែសម្រាប់ពីរស៊េរីទៀត គឺមិនទាន់ច្បាស់ផ្លូវការណ៍នៅឡើយទេ។
ក៏ប៉ុន្តែទោះជាបែបនេះក្តី គេសង្កេតឃើញថា មួយម៉ូដែលក្នុងចំនោមពួកវាមើលទៅដូចជា Nokia 6 ប៉ុន្តវាខុសគ្នាត្រង់ចំនុចកាមេរ៉ាផ្នែកខាងក្រោយតែប៉ុណ្ណោះដូចនេះគេអាចសន្និដ្ឋានបានថាវាប្រហែលជា Nokia 7 និងមួយទៀតដែលមានបំពាក់កាមេរ៉ាក្រោយភ្លោះអាចជា Nokia 8។ វីដេអូនេះ ត្រូវបានរៀបចំផលិតឡើងដោយលោក Evan Blass ដែលជាអ្នកធ្វើការជិតស្និតជាមួយ Nokia អស់រយះពេលប៉ុន្មានឆ្នាំមកហើយ ហើយលោកបានបញ្ជាក់ថា វីដេអូនេះគឺជាការពិតសម្រាប់ទូរស័ព្ទ Nokia ជំនាន់ក្រោយ។
យ៉ាងណាមិញទូរស័ព្ទរបស់ Nokia នៅតែរក្សាទម្រង់រន្ធដោតកាស headphone jack ដដែល ដោយសារតែ Nokia សម្រេចចិត្ត មិនចង់ដើរតាមគូរប្រគួតរបស់ខ្លួន ដែលព្យាយាមលប់បំបាត់រន្ធដោតនេះ ចេញពីទូរស័ព្ទរបស់ពួកគេ។ ហើយនេះ គ្រាន់តែជាវីដេអូបង្ហាញពីរូបរាងនៃទូរស័ព្ទជំនាន់ថ្មីរបស់ Nokia តែប៉ុណ្ណោះ ដោយឡែកសម្រាប់គុណសម្បត្តិទូទៅនៃទូរស័ព្ទស្មាតហ្វូន Premium របស់ Nokia ដែលត្រៀមបង្ហាញខ្លួនប្រគួតប្រជែងទីផ្សារក្នុងឆមាសថ្មីនៅមិនទាន់បានទម្លាយនៅឡើយទេ ដូចនេះមានតែធ្វើការរងចាំបន្តិចសិនទម្រាំ HMD ធ្វើការប្រកាសចេញពួកវាជាផ្លូវការណ៍៕