Galaxy Note 8 ទំនងមិនមែនជាស្មាតហ្វូនដំបូងបំផុតរបស់ក្រុមហ៊ុនបច្ចេកវិទ្យា Samsung នោះទេ ដែលភ្ជាប់ជាមួយនឹងប្រព័ន្ធកាមេរ៉ាភ្លោះនោះ។ ក្រុមហ៊ុន Samsung មានគម្រោងក្នុងការតេស្តទៅលើស្មាតហ្វូនកាមេរ៉ាភ្លោះនេះជាមុនសិននៅលើទីផ្សារ។ ព័ត៌មានបែកធ្លាយចុងក្រោយបំផុតបំពាក់ថា ក្រុមហ៊ុន Samsung កំពុងតែផលិតនូវស្មាតហ្វូ Galaxy C ដែលភ្ជាប់ជាមួយនឹងប្រព័ន្ធកាមេរ៉ាភ្លោះមុនពេលចាប់ផ្តើមផលិត Galaxy Note 8។
នៅថ្ងៃអង្គារនេះ រូបភាពនៃសម្បកទូរស័ព្ទថ្មីនេះ ជាច្រើនសន្លឹកបន្តចែកចាយនៅលើអនឡាញ។ រូបភាពទាំងនេះ ក៏ចែកចាយនៅលើបណ្តាញសង្គម Twitter ផងដែរ ហើយអះអាងថានេះគឺជាសម្បកទូរស័ព្ទរបស់ស្មាតហ្វូន Galaxy C10 ដែលជាស្មាតហ្វូនថ្នាក់កណ្តាលរបស់ក្រុមហ៊ុន Samsung ។ លក្ខណៈដែលគួរឱ្យកត់សម្គាល់នៅលើសម្បកទូរស័ព្ទនេះគឺវាជាប្រភេទប្លាស្ទិក និងភ្ជាប់ជាមួយនឹងប្រព័ន្ធកាមេរ៉ាភ្លោះរួមជាមួយនឹងប៊ូតុង Bixby ផងដែរ។
នៅក្នុងសម្បកទូរស័ព្ទនេះមានប្រឡោះធំដែលគេអះអាងថានេះគឺជាកន្លែងសម្រាប់ដាក់កាមេរ៉ាភ្លោះនៅលើស្មាតហ្វូន Galaxy C10 ។ វាក៏មានប៊តុងសម្រាប់មុខងារ Bixby ផងដែរនៅលើស្មាតហ្វូនស៊េរីថ្មីនេះ។ វានៅមិនទាន់មានព័ត៌មានលម្អិតផ្សេងទៀតនោះទេពាក់ព័ន្ធជាមួយនឹងស្មាតហ្វូនស៊េរីថ្មីនេះ។ ក្រុមហ៊ុន Samsung ពិតជាមានគម្រោងក្នុងការបង្ហាញស្មាតហ្វូនស៊េរីថ្មីដែលបំពាក់ប្រព័ន្ធកាមេរ៉ាភ្លោះជាក់ជាមិនខាន។ វានៅមិនទាន់មានការបញ្ជាក់ថា Galaxy Note 8 នឹងបំពាក់នូវប្រព័ន្ធកាមេរ៉ាភ្លោះដែរ ឬក៏អត់នោះទេ។
កាលពីសប្តាហ៍មុននេះ វាមានរបាយការណ៍មួយបញ្ជាក់ថា ក្រុមហ៊ុន Samsung កំពុងតែពង្រីកនូវស្មាតហ្វូនស៊េរី Galaxy C របស់ខ្លួននៅក្នុងឆ្នាំនេះ ជាមួយនឹងការបង្ហាញវត្តមានរបស់ស្មាតហ្វូន Galaxy C10 និង Galaxy C10 Plus ។ ស្មាតហ្វូនទាំងពីរនេះ នឹងភ្ជាប់មកជាមួយនឹងលេខកូដ SM-C9100 និង SM-C9150/9158 នេះបើតាមការបញ្ជាក់របស់ SamMobile ។ ស្មាតហ្វូនទាំងពីរនេះ ជាប្រភេទស្មាតហ្វូនថ្នាក់កណ្តាលដែលមានមុខងារ និងលក្ខណៈសម្បត្តិខ្លាំងគួរសមដែរពិសេសទៅលើប្រព័ន្ធកាមេរ៉ាភ្លោះ និងមុខងារ Bixby នេះ។
កាលពីពេលមុននេះ មនុស្សជាច្រើនគិតថាក្រុមហ៊ុន Samsung នឹងបំពាក់នូវប្រព័ន្ធកាមេរ៉ាភ្លោះនៅលើស្មាតហ្វូនស៊េរីថ្មី Galaxy S8 របស់ខ្លួន ប៉ុន្តែនៅថ្ងៃសម្ពោធគឺស្មាតហ្វូននេះ មានកាមេរ៉ាតែមួយប៉ុណ្ណោះ។ ក្រោយមកទៀត យើងលឺដំណឹងថា ក្រុមហ៊ុន Samsung នឹងបំពាក់ប្រព័ន្ធកាមេរ៉ាភ្លោះនេះ នៅលើ Galaxy Note 8 ប៉ុន្តែក្រុមហ៊ុនត្រូវធ្វើការពិសោធន៍នៅលើទីផ្សារជាមុនសិន។ ដូចនេះក្រុមហ៊ុន Samsung នឹងជ្រើសរើសយកស្មាតហ្វូន Galaxy C10 ដើម្បីបំពាក់នូវប្រព័ន្ធកាមេរ៉ាភ្លោះរបស់ខ្លួនមុនពេលវាមានវត្តមានទៅលើត្រកូល S Series និង Note Series ។ ថ្មីៗនេះ អ្នកវិភាគជាច្រើននៅកូរ៉េខាងត្បូងអះអាងថា ប្រព័ន្ធកាមេរ៉ាភ្លោះដែលបំពាក់នៅលើ Galaxy Note 8 គឺមួយជាប្រភេទ Wide-Angle Lens ទំហំ 12 MP និងមួយទៀតជាប្រភេទ Telephoto Lens ទំហំ 13 MP ។ អ្នកឃ្លាំមើលក្រុមហ៊ុនឧស្សាហកម្មនេះក៏បញ្ជាក់ផងដែរថា កាមេរ៉ានេះអាចមានសមត្ថភាពក្នុងការប្រើប្រាស់ 3x optical zoom ធំជាង optical zoom របស់ iPhone 7 Plus ៕
