ឆ្នាំ 2017 នេះ ក្រុមហ៊ុនយក្សរបស់កូរ៉េ Samsung ធ្វើឲ្យដៃគូរបស់ខ្លួនមានការភ្ញាក់ផ្អើលយ៉ាងខ្លាំងជាមួយកំពូលស្មាតហ្វូនជំនាន់ថ្មី Galaxy S8 របស់ខ្លួនដែលបានធ្វើការរចនាឡើងកាន់តែមានភាពអស្ចារ្យ និងបច្ចេកវិទ្យាកាន់តែទំនើបគ្មានគូប្រៀប។ មិនត្រឹមតែផ្តោតសំខាន់ទៅលើកំពូលស្មាតហ្វូនរបស់ខ្លួនតែមួយមុខនោះទេ Samsung ក៏បានយកចិត្តទុកដាក់ខ្លាំងទៅលើស្មាតហ្វូតថ្នាក់កណ្តាលរបស់ខ្លួនផងដែរតួរយ៉ាងដូចជាក្រុមហ៊ុនបានបញ្ចេញស្រឡាយស្មាតហ្វូន Galaxy A ស៊េរី 2017 របស់ខ្លួនដែលមានការរចនារូបរាងបែបថ្មីដ៏សិចស៊ី និងទាក់ទាញបំផុតជាមួយការភ្ជាប់បន្ថែមនូវបច្ចេកវិទ្យាទំនើបៗមានជាអាថ៌ដូចជាបច្ចេកវិទ្យាការពារទឹកកម្រិត IP68 ដូចស្រឡាយ Galaxy S7 និង S8 ដែរ។
ទន្ទឹមនឹងនេះសម្រាប់ស្រឡាយទូរស័ព្ទស្មាតហ្វូនថ្នាក់បន្ទាប់ពី Galaxy A Series វិញគឺ Galaxy J Series ក៏ទទួលបានទីផ្សារខ្លាំងក្លាផងដែរក្នុងឆ្នាំ 2016។ ហើយពេលនេះក៏មានលេចចេញរបាយការណ៍ព័ត៌មានថ្មីមួយនិយាយអំពីជំនាន់ថ្មីគឺ Galaxy J Series 2017 មានដូចជា J7 (2017) និង J5 (2017)។ ស្មាតហ្វូនស៊េរីថ្មី 2017 ទាំងពីរអាចនឹងត្រូវបានក្រុមហ៊ុនធ្វើការបំពាក់នូវកាមេរ៉ាថតរូបសែលហ្វីធំរបស់ដល់ទៅ 13MP ជាមួយតួរខ្លួនផលិតពីលោហះ និងបំពាក់នូវបច្ចេកវិទ្យាស្កែនក្រយ៉ៅម្រាមដៃមកជាមួយទៀតផង។ ចំពោះស្មាតហ្វូន Galaxy J7 (2017) នឹងបង្កើនកម្រិតបង្ហាញរូបភាពវីដេអូធំជាងជំនាន់ 2016 ដែលអាចបង្ហាញបានដល់កម្រិត Full-HD (1080x1920px) នៅលើកញ្ចក់អេក្រង់ Super AMOLED ទំហំ 5.5” ហើយរ៉េមក៏មានទំហំធំជាងជំនាន់មុនផងដែរគឺបង្កើនដល់ទំហំ 3GB។
ជាមួយគ្នានេះ Galaxy J7 (2017) អាចប្រើប្រាស់ប្រព័ន្ធសេវា 4G LTE កម្រិត Cat6 ជាមួយមុខងារ VoLTE, ប្រព័ន្ធ VoWiFi, ប្រើបន្ទះឈីប Qualcomm ល្បឿន octa-core 1.6GHz,ថ្មកំលាំង 3,600mAh (ធំជាងជំនាន់មុន 300mAh) និងមានបច្ចេកវិទ្យាស្កែនក្រយ៉ៅម្រាមដៃ (Fingerprint sensor) ដែលជំនាន់ 2016 មិនមាន។ ងាកមកលក្ខណះសម្បត្តិរបស់ Galaxy J5 (2017) ដែលបានលេចលឺមកព្រមគ្នានេះវិញហាក់មិនសូវជាខុសគ្នានឹង J7 (2017) ប៉ុន្មានឡើយទាំងរូបរាង ការរចនា កំលាំងម៉ាស៊ីន ប្រព័ន្ធសេវាជាដើម ហើយអ្វីដែលជាចំនុចខុសគ្នានោះគឺវាទំហំអេក្រង់តូចជាងបន្តិចមានទំហំត្រឹមតែ 5.2”, ថ្មកំលាំង 3,000mAh និងមានរ៉េមទំហំ 2GB។
អ្វីដែលជាចំនុចចាប់អារម្មណ៍ដែលប្រភពបានបង្ហាញពេលនេះគឺស្មាតហ្វូនទាំងពីរនេះនឹងបំពាក់កាមេរ៉ាមុខទំហំ 13MP ដែលមានកម្រិត aperture f/1.9 អមដោយអំពូលភ្លើង LED Flash មួយគ្រាប់ទៀតផង ចំនែកកាមេរ៉ាក្រោយក៏មានទំហំ 13MP ដែរជាមួយកម្រិត aperture f/1.7។ បន្ថែមពីនេះស្មាតហ្វូនទាំងពីរនេះនឹងភ្ជាប់ដំណើរការដោយ Android Nougat ចេញពីរប្រអប់តែម្តង។ តាមព័ត៌មានបែកធ្លាយលើនេះបានបញ្ជាក់តម្លៃថា Samsung Galaxy J7(2017) នឹងមានតម្លៃប្រមាណ €339 និង Galaxy J5(2017) មានតម្លៃប្រមាណ €279។ ទោះជាយ៉ាងណាប្រភពព័ត៌មានមិនបានបង្ហើបពីកាលបរិច្ឆេទក្នុងថ្ងៃប្រកាសចេញនៃទូរស័ព្ទជំនាន់ថ្មី 2017 ទាំងពីរស៊េរីនេះនៅឡើយទេ៕