Google គឺជាក្រុមហ៊ុនរុករកតាមប្រព័ន្ធអ៊ីនធើណែត (Internet Search Engine) ដ៏ធំបំផុតរបស់ពិភពលោក មិនតែប៉ុណ្ណោះ ក្រុមហ៊ុនយក្សខាងរុករកមួយនេះបានបង្កើតសមត្ថផលបច្ចេកវិទ្យាជាច្រើនសម្រាប់មនុស្សជាតិប្រើប្រាស់ដែលក្នុងនោះយើងសង្កេតឃើញមានផលិតផលបច្ចេកវិទ្យាធំៗចំនួនពីររបស់ Google ដែលទទួលបានប្រជាប្រិយភាពខ្លាំងបំផុតក្នុងរយះពេលជិតដប់ឆ្នាំមកនេះនោះ គឺប្រតិបត្តិការ Android សម្រាប់ប្រើនៅលើទូរស័ព្ទស្មាតហ្វូន និងមួយទៀតគឺប្រតិបត្តិការ Android Wear សម្រាប់ប្រើនៅលើនាឡិកាដៃឆ្លាតវៃដែលទើបរីកសុះសាយនៅរយះពេលពីរបីឆ្នាំចុងក្រោយមកនេះ។
ចំពោះកម្មវិធី និងហ្គេមដែលបានភ្ជាប់មកជាមួយប្រតិបត្តិការ Android Phone គឺមានច្រើនសម្បូរបែបរាប់រយពាន់លាន ដែលអាចធ្វើការទាញយកមកដំឡើងពីក្នុងខ្លាំងទំនិញ Google Play Store ដែលមានទាំងគិត និងមិនគិតលុយ។ ហើយថ្មីៗ យោងតាមការប្រកាសរបស់ក្រុមហ៊ុន Google បានប្រកាសថាកាលពីឆ្នាំ2016មានកម្មវិធីជាង 82 ពាន់លានកម្មវិធីត្រូវបានដោនឡូដចេញពី Play Store ដែលតួរលេខនេះ គឺមានការកើនឡើងពីចំនួន 65 ពាន់ លាន ដែលបានដំឡើងកាលពីឆ្នាំ 2015 ដែលរបាយការណ៍បានចេញផ្សាយ។
ការប្រកាសនេះ បានធ្វើឡើងដោយសហស្ថាបនិកជាន់ខ្ពស់នៃក្រុមវិស្វករផលិតប្រតិបត្តិការ Android លោក Dave Burke នៅថ្ងៃសន្និសិត”Google I/O”ប្រចាំឆ្នាំ។ ជាងនេះទៅទៀតលោក Burke ក៏បាននិយាយពីប្រតិបត្តិការ Android Wear ផងដែរថា ជាការពិតណាស់បច្ចុប្បន្ននេះមានក្រុមហ៊ុនសរុប 24 ក្រុមហ៊ុនដែលបានប្រើប្រាស់ទំរង់ប្រតិបត្តិការនាឡិកាដៃឆ្លាតវៃ “wearable platform” របស់ក្រុមហ៊ុន Google។ ស្ថាបនិករូបនេះក៏បានប្រកាសផងដែរពីប្រត្តិបត្តិការ Android Auto ដែលជាទំរង់ប្រតិបត្តិការថ្មី “infotainment platform” របស់ Google សម្រាប់ប្រើជាមួយរថយន្ត ដែលវានឹងបញ្ចេញដាក់ឲ្យប្រើប្រាស់ក្នុងពេលឆាប់ៗនេះ ជាមួយរថយន្តម៉ាក Audi៕