ជាបន្តបន្ទាប់ គឺមានការបែកធ្លាយចេញនូវរូបរាងគំរូរបស់ទូរស័ព្ទស្មាតហ្វូនរបស់ក្រុមហ៊ុន OnePlus ជំនាន់ទី 5 គឺ OnePlus 5 ហើយកាលពីម្សិលមិញនេះយើងក៏បានឃើញគំរូរូបរាងផ្នែកខាងក្រោយនៃទូរស័ព្ទជំនាន់ថ្មីនេះហើយដែរគឺវាមានកាមេរ៉ាក្រោយពីរគ្រាប់ អំពូលភ្លើង LED មួយគ្រាប់ និងមានខ្សែអង់តែន (Antenna) ដូចជំនាន់ OnePlus 3 និង 3T ដែរ។ ផ្ទុយនឹងរូបភាពគំរូដែលបែកធ្លាយកាលពីថ្ងៃម្សិលនេះ ដោយថ្ងៃនេះយើងទទួលបានរូបភាពគំរូថ្មីនៃ OnePlus 5 ចំនួនពីរសន្លឹកដែលបានបង្ហាញពីផ្នែកខាងក្រោម និងផ្នែកខាងខ្នងរបស់វា។
តាមរូបភាពគំរូទាំងពីរសន្លឹកនេះយើងសង្កេតឃើញថាទូរស័ព្ទស្មាតហ្វូន OnePlus ជំនាន់ទី 5 នេះហាក់ដូចជាក្រុមហ៊ុនព្យាយាមលប់បំបាត់រន្ធដោតកាសខ្នាត 3.5mm headphone jack ដូចអ្វីដែលក្រុមហ៊ុន Apple បានធ្វើនៅលើ iPhone 7 និង HTC បានធ្វើវានៅលើ HTC U11 ដែលបានប្រកាសចេញកាលពីប៉ុន្មានថ្ងៃនេះដែរ។ ប៉ុន្តែគេមិនទាន់ជឿជាក់ទៅលើរូបភាពគំរូថ្មីនេះនៅឡើយទេ ហើយគេសន្និដ្ឋានថា OnePlus នឹងនៅតែរក្សារន្ធដោតកាសនេះសម្រាប់ហ្វែនរបស់ខ្លួនដដែលដោយគ្រាន់តែប្តូរវាទៅដាក់នៅផ្នែកខាងលើទូរស័ព្ទវិញដោយទុកផ្នែកខាងក្រោមនេះប្រើសម្រាប់រន្ធបំពងសំឡេងប្រភេទស្តេរ៉េអូ (stereo speaker) ក៏ថាបាន។
ចំនុចដែលប្លែកមួយទៀតនោះត្រង់ថាសម្រាប់ខ្សែកាត់ទទឹងតួរ (Antenna) នៅជិតគែមលើក្រោមគឺមិនឃើញមានទេគឺមានផ្ទៃលាតតែម្តង ហើយកាមេរ៉ាភ្លោះត្រូវបានរចនាបែបបញ្ឈរស្របបណ្តោយតួរខ្លួនរួមជាមួយអំពូលភ្លើង LED flash ចំនួនពីរគ្រាប់នៅចំកណ្តាលនៃកាមេរ៉ាទាំងពីរ ហើយនៅក្រោមកាមេរ៉ាគឺជាស្លាកសញ្ញាឡូហ្គោរបស់ OnePlus។ តាមរយះរូបភាពគំរូរបស់ OnePlus 5 ដែលបានបែកធ្លាយជាបន្តបន្ទាប់មកនេះឃើញថាពួកវាសុទ្ធតែមានចំនុចគួរឲ្យចាប់អាម្មរណ៍ និងទាក់ទាញខុសៗគ្នាច្រើនពិសេសរូបគំរូចុងក្រោយនេះរឹតតែធ្វើឲ្យយើងចង់ឃើងវាបង្ហាញខ្លួនឆាប់ៗនេះណាស់ ព្រោះចង់ដឹងថាតើ OnePlus 5 ពិតជាគ្មានរន្ធដោតកាស គ្មានខ្សែអង់តែន និងមានកាមេរ៉ាភ្លោះប្រើកែវលែនបញ្ឈរ និងមានអំពូល LED flash ពីរគ្រាប់នៅចំកណ្តាលកាមេរ៉ាទាំងពីរពិតមែនអត់៕