ថ្មីៗនេះ ក្រុមហ៊ុនផលិតរថយន្ត Ford កំពុងតែនាំយកនូវកម្មវិធី Android Auto និង Apple CarPlay software សម្រាប់ទ្រទ្រង់នៅលើរថយន្តស៊េរីឆ្នាំ 2016 របស់ខ្លួនដោយភ្ជាប់ជាមួយមុខងារ SYNC 3 ហើយការអាប់ឌែតនេះ គឺពិតជាងាយស្រួលមែនក្នុងការទាញយក (Downloading) នូវកម្មវិធីនេះចេញពី owner.ford.com និងការតម្លើងវានៅលើ USB drive (លោកអ្នកអាចធ្វើការអាប់ឌែតបានតាមរយៈការប្រើប្រាស់ Wi-Fi ឬលោកអ្នកយកឡានទៅកាន់កន្លែងលក់ចែកចាយរបស់ក្រុមហ៊ុន) ។ ការអាប់ឌែតនេះនឹងដំណើរការនៅលើរថយន្តប្រមាណជា 800,000 គ្រឿង។
ការចូលទៅដំណើរការទៅលើកម្មវិធី Android Auto និង Apple CarPlay អាចធ្វើឱ្យប្រព័ន្ធ Infotainment នៅលើរថយន្ត Ford កាន់តែទាន់សម័យទំនើប និងប្រកបដោយផាសុកភាពបំផុតក្នុងការប្រើប្រាស់។ នេះគឺជាមុខងារដ៏អស្ចារ្យមួយដែលលោកអ្នកមិនចាំបាច់ទិញរថយន្តថ្មីនោះទេដើម្បីអាចដំណើរការកម្មវិធីទាំងនេះបាន។
ការទាញយកកម្មវិធី Android Auto ពិតជាងាយស្រួលខ្លាំងណាស់ នៅក្នុងការអាប់ឌែត ហើយការដំណើរការកម្មវិធី CarPlay ក៏ទាមទារត្រឹមតែការ Upgrade តាមរយៈ USB នៅលើរថយន្តរបស់អ្នក។ នេះគឺជាកម្មវិធីដំបូងបំផុតដែលទទួលបានការអាប់ឌែតនៅលើរថយន្ត Ford ។ វានៅមានកម្មវិធីថ្មីចំនួន 400 ទៀតដែលក្រុមវិស្វករកំពុងអភិវឌ្ឍបន្ត។ សរុបមក ការអាប់ឌែតទៅលើរថយន្តគឺជារឿងថ្មីមួយទៀតនៅក្នុងក្រុមហ៊ុនផលិតរថយន្តទូទាំងពិភពលោក ហើយយើងសង្ឃឹមថាក្រុមហ៊ុនផលិតរថយន្តជាច្រើនទៀតនឹងធ្វើការអាប់ឌែតទៅលើ Software របស់ខ្លួនផងដែរ៕