ដូចអ្វីដែលយើងបានរំពឹងទុកពិតមែន ស្មាតហ្វូនស៊េរីថ្មី Samsung Galaxy S8 ប្រកាសបង្ហាញវត្តមានជាផ្លូវការនៅក្នុងប្រទេសចិន។ ស្មាតហ្វូនស៊េរីទំនើបនេះ ប្រារព្ធធ្វើឡើងនៅក្នុងព្រឹត្តិការណ៍ពិសេសមួយកាលពីម្សិលមិញនៅក្នុងមហោស្រព Great Wall Theater (ដែលមានទីតាំងស្ថិតនៅក្រោមមហាកំផែង)។ ក្រុមហ៊ុនបច្ចេកវិទ្យាយក្សកូរ៉េខាងត្បូងបញ្ជាក់នៅក្នុងប្លុករបស់ខ្លួនថា “វាគ្មិនរបស់យើងនៅល្ងាចមិញនេះ ប្រកាសរួចហើយអំពីការសហការគ្នាជាមួយនឹងសេវាកម្មផ្នែកហ្គេម និងវីដេអូជាច្រើនដូចជា Tencent និង iQiyi សម្រាប់រៀបចំជាអត្ថប្រយោជន៍ពេញលេញសម្រាប់អេក្រង់ Infinity Display របស់ស្មាតហ្វូន Galaxy S8។
ក្រុមហ៊ុនបច្ចេកវិទ្យា Samsung ពិភាក្សាអំពីភាពជាដៃគូរជាមួយនឹងបណ្តាញសង្គម Weibo ដែលជាវេបសាយប្លុកពេញនិយមខ្លាំងជាងគេបំផុតនៅក្នុងប្រទេសចិន និងកម្មវិធី WPS Office ដែលផ្តល់ឱកាសអោយអ្នកប្រើប្រាស់អាចប្រើកាមេរ៉ា Gear 360 និង Samsung DeX ។” ស្មាតហ្វូនស៊េរីថ្មីនេះ នឹងដាក់លក់ជាផ្លូវការនៅក្នុងប្រទេសចិនចាប់ផ្តើមពីថ្ងៃទី 25 ខែឧសភាខាងមុខនេះ។ សម្រាប់តម្លៃរបស់ស្មាតហ្វូននេះ នៅមិនទាន់បញ្ជាក់ឱ្យដឹងនៅឡើយទេ៕