អ្នកទម្លាយនៅលើអនឡាញ SlashLeaks ទើបតែបង្ហោះរូបភាពមួយសន្លឹក ដែលជាពុម្ពគំរូសម្រាប់ប្រើប្រាស់ក្នុងការផលិតទូរស័ព្ទ iPhone ស៊េរីឆ្នាំ 2017 ។ នៅក្នុងរូបភាពនេះ បង្ហាញអំពីទូរស័ព្ទ iPhone បីស៊េរីម៉ូដែលផ្សេងគ្នាគឺ Apple iPhone 7s, Apple iPhone 7s Plus និង iPhone 8 ។ រូបភាពទាំងនេះ ក៏បង្ហាញអំពីទំហំរបស់ទូរស័ព្ទ iPhone នីមួយៗធៀបគ្នាផងដែរ។ ទូរស័ព្ទ Apple iPhone 7s នឹងមានរូបរាងតូចជាងគេក្នុងចំណោម 3 ស៊េរីនេះ ហើយវាបំពាក់នូវកាមរ៉ាតែមួយប៉ុណ្ណោះ។
ឥឡូវនេះ លោកអ្នកប្រហែលជារំពឹងថា ទូរស័ព្ទ Apple iPhone 8 ដែលល្បីជាមួយនឹងពាក្យចចាមអារ៉ាមអេក្រង់ 5.8 អ៊ីងនឹងមានអេក្រង់ធំជាងគេទាំងអស់។ ប៉ុន្តែបើតាមរូបភាពនេះបង្ហាញថា វាមានទំហំធំជាងតែបន្តិចប៉ុណ្ណោះបើធៀបជាមួយនឹង iPhone 7s ។ តើក្រុមហ៊ុន Apple ច្នៃបែបណាទៅ? ទូរស័ព្ទ iPhone 8 នឹងប្រើប្រាស់អេក្រង់ Edge-to-Edge Display និងមានស៊ុមព័ទ្ធអេក្រង់កាន់តែតូចស្តើង។ អេក្រង់ទំហំត្រឹមតែ 5.15 អ៊ីងប៉ុណ្ណោះរបស់ iPhone 8 ដែលអាចបញ្ជាបាន ចំនែកកន្លែងផ្សេងទៀតប្រហែលប្រើប្រាស់សម្រាប់បច្ចេកវិទ្យាTouch ID បង្កប់នៅក្រោមអេក្រង់តែម្តង។ នេះហើយដែលជាកត្តាធ្វើឱ្យក្រុមហ៊ុន Apple ចំណាយពេលវេលាយូរក្នុងការបង្កើតទូរស័ព្ទស៊េរីថ្មីនេះ។ យ៉ាងណាមិញ ក្រុមហ៊ុន Apple ក៏មានគម្រោង “B” ផងដែរក្នុងការដាក់ប៊ូតុង Touch ID នេះទៅផ្នែកខាងក្រោយនៃទូរស័ព្ទវិញ។
នៅលើពុម្ពគំរូនេះក៏បង្ហាញផងដែរអំពីបច្ចេកវិទ្យាអេក្រង់ភ្លោះបញ្ឈររបស់ទូរស័ព្ទ iPhone 8 ។ ចំនែកកាមេរ៉ាភ្លោះរបស់ Apple iPhone 7s គឺនៅផ្តេកដដែលដូចអ្វីដែលលោកអ្នកធ្លាប់មើលឃើញនៅលើទូរស័ព្ទ iPhone 7 Plus រួចមកហើយ។ ទន្ទឹមនឹងនេះផងដែរ SlashLeaks ក៏បង្ហោះនូវរូបភាពផ្នែកខាងក្រោយមួយសន្លឹកទៀតរបស់ទូរស័ព្ទ iPhone 8 ហើយវាពិតជាមានកាមេរ៉ាភ្លោះបញ្ឈរពិតប្រាកដមែន។ យោងតាមការបញ្ជាក់របស់ Morgan Stanley ទូរស័ព្ទ iPhone 2017 ទាំងបីស៊េរីម៉ូដែលនេះ នឹងដាក់លក់នៅក្នុងពេលណាមួយចុងខែកញ្ញាឆ្នាំនេះ។ តម្លៃរបស់ទូរស័ព្ទ iPhone 8 គឺច្រើនជាង 1000 ដុល្លារអាមេរិច៕
