ដើម្បីធ្វើការប្រគូតប្រជែងជាមួយក្រុមហ៊ុនផលិតស្មាតហ្វូនដទៃទៀត និងដើម្បីផ្គាប់ចិត្តអតិថិជនរបស់ខ្លួនពេលនេះ ក្រុមហ៊ុន Huawei បានបន្ថែមពណ៌ចំនួនពីរទៀតសម្រាប់គ្រួសារស្មាតហ្វូនប្រភេទហ្វាប់ប្លែត Huawei Mate 9 គឺពណ៌ក្រហម (Red Agate) និងខៀវទឹកសមុទ្រ (Blue Topaz)។ ដែលពីមុនហា្វប់ប្លែត Huawei Mate 9 នេះគឺមានចេញលក់តែពណ៌ស (Ceramic White), ទឹកមាស (Champagne Gold), ពណ៌ត្នោត (Mocha Brown), ទឹកប្រាក់ (Moonlight Silver), ខ្មៅ (Obsidian Black) និងប្រផេះ (Space Gray) តែប៉ុណ្ណោះ។ ហើយចំពោះពណ៌ថ្មីទាំងពីរនេះគឺមានតែសម្រាប់ម៉ូដែលបំពាក់រ៉េមទំហំ 4GB និងម៉េមូរីម៉ាស៊ីន 64GB តែប៉ុណ្ណោះ។
Mate 9 ពណ៌ក្រហម និងខៀវទឹកសមុទ្រនេះ គឺប្រកាសដាក់លក់នៅថ្ងៃទី 14 ឧសភា កាលពីចុងសប្តាហ៍នេះ នៅក្នុងទីផ្សារប្រទេសចិនជាមួយតម្លៃប្រមាណ 3,899 យ័នឬប្រហែល 564 ដុល្លារអាមេរិក។ ទោះជាយ៉ាងណា គេនៅមិនមានព័ត៌មានផ្លូវការណ៍ណាមួយបញ្ជាក់ថាហ្វាប់ប្លែត Mate 9 ពណ៌ថ្មីទាំងពីរនេះ អាចនឹងពាំនាំចេញដាក់លក់ក្នុងទីផ្សារពិភពលោក ឬក៏អត់ទេ ឬក៏ប្រហែលមានលក់សម្រាប់តែទីផ្សារប្រទេសចិនតែមួយប៉ុណ្ណោះឡើយ។ ក៏ប៉ុន្តែសំរាប់ពណ៌ក្រហមនេះ ត្រូវបានប្រជាជន ចិនចាត់ទុកថា ជាពណ៌នាំលាភនាំសំណាងល្អសម្រាប់ពួកគេ។ មួយវិញទៀតសម្រាប់ពណ៌ថ្មីរបស់ Mate 9 នេះ ត្រូវបានគេជឿជាក់ថា វានឹងជួយជម្រុញការលក់ស្មាតហ្វូនដែលមានអាយុកាលជិត 6 ខែមួយនេះ មានសន្ទុះ កើនឡើងសម្រាប់ទីផ្សារដើមកំណើតរបស់វាថែមទៀតផង៕