ក្រុមហ៊ុនគ្រឿងអេឡិចត្រូនិកតៃវ៉ាន់ បានរៀបចំព្រឹត្តិការណ៍ខួបលើកទី 20 របស់ខ្លួន ហើយក្រុមហ៊ុន HTC ក៏ទើបតែបញ្ចេញវីដេអូនិយាយអំពីរបកគំហើញបច្ចេកវិទ្យារបស់ខ្លួនដែលឆ្លងកាត់រយៈពេល 20 ឆ្នាំនេះ ផងដែរ។ ក្រុមហ៊ុន HTC បញ្ចេញនូវស្មាតហ្វូនស៊េរីថ្មី HTC U11 ដែលទទួលបានពិន្ទុខ្ពស់ទៅលើប្រព័ន្ធកាមេរ៉ារបស់វានៅលើ DxOMark និងការប្រើប្រាស់មុខងារ Shortcut របស់វាផងដែរ។ ក្រុមហ៊ុនបច្ចេកវិទ្យា HTC របស់តៃវ៉ាន់នេះ តែងតែនាំយកនូវបច្ចេកវិទ្យាឈានមុខគេនៅក្នុងពិភព Android ហើយនៅក្នុងខួបលើកទី 20 របស់ក្រុមហ៊ុន HTC ក៏បញ្ចេញនូវវីដេអូដែលបង្ហាញអំពីវត្តមានរបស់ស្មាតហ្វូនដំបូង និងការវិវត្តន៍របស់វានៅក្នុងរយៈពេល 20 ឆ្នាំនេះ។
សូមជំរាបថា ក្រុមហ៊ុន HTC គឺជាក្រុមហ៊ុនដំបូងបំផុតដែលនាំយកស្មាតហ្វូន 3G ចូលទៅក្នុងទីផ្សារ ហើយក្រុមហ៊ុននេះក៏នាំយកនូវស្មាតហ្វូនមុនគេបំផុតដំណើរការប្រព័ន្ធប្រតិបត្តិការ GPS ។ ស្មាតហ្វូនទាំងនេះ ប្រើប្រាស់ Windows OS ជាក់ស្តែងនៅក្នុងឆ្នាំ 2008 ក្រុមហ៊ុន HTC នាំយកនូវស្មាតហ្វូនមុនគេបំផុតដំណើរការប្រព័ន្ធប្រតិបត្តិការ Android ឈ្មោះថា HTC Dream ដែលនៅអាមេរិចគេហៅថា T-Mobile G1 ។ វត្តមានជាបន្តទៀតរបស់ស្មាតហ្វូននេះគឺ HTC One ដែលមានការរចនារូបរាងពិតជាស្រស់ស្អាតមែនទែន។
ប៉ុន្តែចូលមកដល់ឆ្នាំ 2013 ក្រុមហ៊ុន HTC ចាប់ផ្តើមប្រកួតប្រជែងនៅលើទីផ្សារ និងការច្នៃប្រឌិតខ្ពស់ទៅលើស្មាតហ្វូនស៊េរីថ្មីរបស់ខ្លួនក្នុងរបត់ទីផ្សារ Android ។ ក្រុមហ៊ុនចាប់ផ្តើមផលិតនូវឧបករណ៍ HTC Vive សម្រាប់ប្រើប្រាស់បច្ចេកវិទ្យាថ្មីនៅក្នុងប៉ុន្មានឆ្នាំចុងក្រោយនេះ ដើម្បីអាចនាំមុខក្រុមហ៊ុន Samsung, Apple និងក្រុមហ៊ុនជាច្រើនទៀតនៅចិន។ យ៉ាងណាមិញ នៅក្នុងវីដេអូនេះក្រុមហ៊ុន HTC និយាយថា “យើងនៅតែច្នៃប្រឌិតបន្តទៀត យើងមិនមែននៅស្ងៀមស្ងាត់ យើងមានការប្រកួតប្រជែងខ្លាំង យើងគឺមានវត្តមានពិតមែន។ យើងនៅតែរក្សានូវរបកគំហើញថ្មីរបស់យើងជានិច្ច។”