រូបភាពថ្មីៗជាច្រើនរបស់ស្មាតហ្វូនស៊េរីថ្មី Samsung Galaxy Note 8 បានបង្ហោះចូលទៅក្នុងប្លុកបណ្តាញសង្គម Weibo នៅក្នុងប្រទេសចិន។ វីដេអូរបស់ស្មាតហ្វូនស៊េរីថ្មី Galaxy Note 8 ក៏ទើបតែបង្ហោះនៅលើបណ្តាញសង្គមដែលបង្ហាញអំពីរូបរាងរបស់វាតូចជាងទំហំរបស់ស្មាតហ្វូន Samsung Galaxy S7 edge ។ តាមរយៈរូបភាពនៅក្នុងវីដេអូនេះ យើងអាចមើលឃើញយ៉ាងច្បាស់ថា ស្មាតហ្វូននេះនឹងមានប្រព័ន្ធកាមេរ៉ាភ្លោះបញ្ឈរនៅផ្នែកខាងក្រោយ ហើយវាភ្ជាប់ជាមួយនឹងភ្លើង LED Flash ភ្លោះនៅក្រោមថែមទៀត។
អ្វីដែលកាន់តែពិសេសជាងនេះទៀតនោះ ប្រព័ន្ធស្កែនក្រយ៉ៅដៃ (Fingerprint Scanner) ប្រហែលជាប្តូរទៅដាក់នៅផ្នែកខាងក្រោយ ឬនៅផ្នែកខាងមុខដែរ។ នេះមានន័យថា ក្រុមហ៊ុនបច្ចេកវិទ្យា Samsung ក៏បានជុសជុលទៅលើបញ្ហាមួយចំនួនដើម្បីធ្វើយ៉ាងណាអាចអោយប្រព័ន្ធស្កែនក្រយ៉ៅដៃនេះស្ថិតនៅក្រោមកញ្ចក់អេក្រង់បាន។ សម្រាប់ស្មាតហ្វូនជំនាន់ថ្មី Samsung Galaxy S8/Galaxy S8+ ក្រុមហ៊ុនបច្ចេកវិទ្យា Samsung បំពាក់នូវប្រព័ន្ធស្កែនក្រយ៉ៅដៃ (Fingerprint Scanner) ស្ថិតនៅផ្នែកខាងក្រោយជាប់កាមេរ៉ាខាងក្រោយតែម្តង ដោយសារតែក្រុមហ៊ុនបច្ចេកវិទ្យា Samsung នៅមិនទាន់អាចបង្កប់នូវប្រព័ន្ធស្កែនក្រយ៉ៅដៃក្រោមអេក្រង់បាន។
គេរំពឹងថា ស្មាតហ្វូន Galaxy Note 8 នឹងមានអេក្រង់ទំហំ 6.3 អ៊ីងដំណើរការជាមួយបន្ទះឈីប Snapdragon 835 នៅក្នុងសហរដ្ឋអាមេរិច និងបន្ទះឈីប Exynos 8895 SoC នៅគ្រប់ទីផ្សារជាច្រើនទៀត។ ជាក់ស្តែង ស្មាតហ្វូននេះក៏ភ្ជាប់ជាមួយនឹងប៊ិក S Pen ផងដែរ។ Galaxy Note 8 នឹងមានថាមពលថ្មទំហំ 3700mAh ហើយវាអាចនឹងប្រកាសបង្ហាញខ្លួននៅថ្ងៃទី 1 ដល់ទី 6 ក្នុងខែកញ្ញាក្នុងព្រឹត្តិការណ៍ 2017 IFA show ក្នុងទីក្រុង Berlin ។ នៅដើមឆ្នាំនេះ វាមានពាក្យចចាមអារ៉ាមជាច្រើនអំពីស្មាតហ្វូនជំនាន់ថ្មី Galaxy Note 8 ដែលជាស្មាតហ្វូនដំបូងបំផុតរបស់ក្រុមហ៊ុន Samsung ដែលបំពាក់ប្រព័ន្ធកាមេរ៉ាភ្លោះនោះ។ ប៉ុន្តែថ្មីៗនេះ ស្មាតហ្វូនជំនាន់ថ្មីដែលនឹងដំណើរការប្រព័ន្ធកាមេរ៉ាភ្លោះនោះគឺ Samsung Galaxy C10 ។ វត្តមានរបស់ស្មាតហ្វូន Galaxy C10 នឹងបង្ហាញខ្លួនមុនការសម្ពោធស្មាតហ្វូន Galaxy Note 8 ៕
