រហូតមកដល់ពេលនេះ នៅសល់តែរយៈពេលប្រមាណជា 4 ខែទៀតប៉ុណ្ណោះ មុនពេលដែលទូរស័ព្ទស៊េរីថ្មី iPhone និងប្រកាសបង្ហាញខ្លួនក្នុងឆ្នាំនេះ។ ប៉ុន្តែអ្វីដែលគួរអោយចាបអារម្មណ៍នោះ គឺ ក្រុមហ៊ុន Apple បានបញ្ជាទិញបន្ទះអេក្រង់សម្រាប់ទូរស័ព្ទ iPhone ស៊េរីថ្មីរបស់ខ្លួនរួចរាល់ហើយ។ របាយការណ៍ក្តៅៗថ្មីមួយពី The Bell បានបញ្ជាក់ថា ក្រុមហ៊ុន Apple និង Samsung បានចុះហត្ថលេខាទៅលើកិច្ចព្រមព្រៀងសម្រាប់ការនាំចេញនូវបន្ទះអេក្រង់ OLED ចំនួន 180 លាន បន្ទះសម្រាប់ប្រើប្រាស់នៅលើទូរស័ព្ទ iPhone ស៊េរីថ្មីរបស់ Apple ក្នុងឆ្នាំ 2018 នេះ ដែលមានឈ្មោះថា iPhone 9 ។ ចំនួននេះ គឺច្រើនជាងទ្វេរដង បើធៀបជាមួយនឹងបន្ទះអេក្រង់ដែលក្រុមហ៊ុន Samsung ផ្គត់ផ្គង់ទៅកាន់ក្រុមហ៊ុន Apple ក្នុងឆ្នាំ 2017 នេះ។ លោក Tim Cook ធ្លាប់និយាយថា ទូរស័ព្ទស៊េរីថ្មី iPhone អេក្រង់ OLED យ៉ាងតិចណាស់មួយម៉ូដែលនឹងបង្ហាញខ្លួននៅឆ្នាំនេះ។
យោងតាមព័តមានដដែលនេះ នៅតែបានអះអាងថា កិច្ចព្រមព្រៀងរយៈពេល 2 ឆ្នាំនៃក្រុមហ៊ុនទាំងពីរនេះ បានធ្វើឡើងរួចរាល់ហើយ។ យ៉ាងណាមិញ របាយការណ៍ជាច្រើនមុននេះ មិនទាន់បានបញ្ជាក់អំពីចំនួនជាក់លាក់នៃបន្ទះអេក្រង់ OLED ដែលក្រុមហ៊ុន Samsung យល់ព្រមក្នុងការផលិតសម្រាប់ទូរស័ព្ទ iPhone នៅក្នុងឆ្នាំ 2018 នេះទេ ដូចច្នេះ ពេលនេះ យើងបានដឹងអំពីចំនួនជាក់លាក់នៃកិច្ចព្រមព្រៀងនៃការផលិតនេះ។ ជាក់ស្តែង ទូរស័ព្ទ iPhone 9 ដែលត្រូវគេរំពឹងថា នឹងបង្ហាញខ្លួននៅឆ្នាំក្រោយនោះ ពិតជាមានអេក្រង់ OLED ពីរប្រភេទផ្សេងគ្នាគឺមួយទំហំ 5.28 អ៊ីង និងមួយទៀតទំហំ 6.46 អ៊ីង។ ប្រសិនបើក្រុមហ៊ុន Apple ពិតជាមានគម្រោងក្នុងការបញ្ឈប់ការប្រើប្រាស់អេក្រង់ LCD នៅលើទូរស័ព្ទរបស់ខ្លួនចាប់ពីឆ្នាំក្រោយពិតមែននោះ ចំនួននៃការកម្មង់ទិញពីក្រុមហ៊ុន Samsung ពិតជាអាចស៊ីគ្នាទៅនឹងចំនួននៃការលក់របស់ក្រុមហ៊ុនបច្ចេកវិទ្យា Apple ជាក់ជាមិនខាន។
គួរបញ្ជាក់ផងដែរថា នេះគ្រាន់តែជារបាយការណ៍ថ្មីតែប៉ុណ្ណោះពាក់ព័ន្ធទៅនឹងទូរស័ព្ទ iPhone 9 ដូចនេះ យើងត្រូវរង់ចាំមើលគម្រោងជាច្រើនទៀតរបស់ក្រុមហ៊ុន Apple ក្រោយការបញ្ចេញទូរស័ព្ទ iPhone ស៊េរីថ្មីនៅឆ្នាំនេះ។ ប្រព័ន្ធផ្សព្វផ្សាយនៅកូរ៉េដកស្រង់សម្តីចេញពីជនអនាមិក ដែលនិយាយនៅលើកិច្ចព្រមព្រៀងនេះ ថា “ក្រុមហ៊ុនបច្ចេកវិទ្យាយក្សទាំងពីរពិតជាចុះកិច្ចព្រមព្រៀងគ្នាពិតមែនទៅលើអេក្រង់ និងលក្ខខ័ណ្ឌមួយចំនួន។ សម្រាប់ព័ត៌មានលម្អិតដូចជាការរចនាទៅលើអេក្រង់ និងមុខងារជាច្រើនទៀតអាចនឹងត្រូវផ្លាស់ប្តូរអាស្រ័យទៅលើការអភិវឌ្ឍទូរស័ព្ទជំនាន់ថ្មីនេះ៕”