ថ្ងៃនេះ សារព័ត៌មាន Reuters បានរាយការណ៍ថា ក្រុមហ៊ុន Samsung មានគម្រោងក្នុងការបង្ហាញនូវវត្តមានរបស់ហ្វាប់ប្លេត Galaxy Note ស៊េរីថ្មីនៅក្នុងព្រឹតិ្តការណ៍ពិសេសមួយនៅចុងខែសីហាខាងមុខនេះ។ ហ្វាប់ប្លេតស៊េរីថ្មីនេះ អាចនឹងមានរូបរាងស្រដៀងគ្នាទៅនឹងស្មាតហ្វូនស៊េរីថ្មី Galaxy S8 ដែរគ្រាន់តែទំហំរបស់វាខ្ពស់ជាងស្មាតហ្វូន Galaxy S8+ ដែលមានអេក្រង់ទំហំដល់ទៅ 6.2 អ៊ីងទៅហើយនោះ។ ហ្វាប់ប្លេត Galaxy Note ស៊េរីថ្មីនេះនឹងបំពាក់នូវប្រព័ន្ធកាមេរ៉ាភ្លោះដែលដូចគ្នា ទៅនឹងកាមេរ៉ាដែលលោកអ្នកធ្លាប់ឃើញនៅលើវត្តមានរបស់ទូរស័ព្ទ iPhone 7 Plus របស់ក្រុមហ៊ុនបច្ចេកវិទ្យា Apple និងស្មាតហ្វូនស៊េរីថ្មីជាច្រើនទៀត ដែលមានវត្តមាននៅលើទីផ្សារនោះ។
គួរបញ្ជាក់ថា ស្មាតហ្វូនស៊េរីថ្មី Galaxy S8 ត្រូវបានក្រុមហ៊ុនបង្ហាញនៅក្នុងខែមិនា ដោយភ្ជាប់ជាមួយអេក្រង់ Infinity Display របស់ក្រុមហ៊ុន Samsung (អេក្រង់ថ្មីដែលស្ទើរតែមានទំហំពេញផ្ទៃខាងមុខរបស់ស្មាតហ្វូន) ដែលគឺជាលក្ខណៈពិសេសមួយ ដែលមានការទាក់ទាញរួមជាមួយនឹងការប្រើប្រាស់កញ្ចក់នៅខាងមុខ និងខាងក្រោយដែលគេរំពឹងថា ហ្វាប់ប្លេត Galaxy Note 8 នឹងប្រើប្រាស់ការរចនាកញ្ចក់អេក្រង់បែបនេះផងដែរ។ ការប្រើប្រាស់ឈ្មោះ "Galaxy Note 8" គឺបន្ទាប់ពីហ្វាប់ប្លេត Galaxy Note 7 ប្រកាសបង្ហាញខ្លួនកាលពីឆ្នាំមុនដែលទទួលរងនូវបញ្ហាផ្ទុះថ្មបណ្តាលអោយក្រុមហ៊ុន Samsung បានប្រកាសប្រមូលពីទីផ្សារពិភពលោកវិញដល់ទៅ 2 ដង។ វាគឺជាការខកចិត្តដ៏ធំមួយរបស់ក្រុមហ៊ុនបច្ចេកវិទ្យា Samsung ព្រោះថាហ្វាប់ប្លេត Galaxy Note ទទួលបានការចាប់អារម្មណ៍ខ្លាំងមិនខុសពីស៊េរីត្រកូល Galaxy S នោះទេ។
រហូតមកដល់ពេលនេះ ក្រុមហ៊ុន Samsung នៅតែរក្សានូវម៉ាកយីហោឈ្មោះ Galaxy Note នេះដដែល ហើយកន្លងមកនេះ គឺមានរូបភាពជាច្រើនបង្ហោះដោយ The Leaker ដែលបានធ្វើការអះអាងថា ក្រុមហ៊ុន Samsung ពិតជាកំពុងតែធ្វើការទៅលើហ្វាប់ប្លេត Galaxy Note 8 ពិតប្រាកដមែន។ រូបភាពទាំងនោះ បានបង្ហាញថា ហ្វាប់ប្លេតនេះ ពិតជាមានរូបរាងដូចគ្នាបេះបិទទៅនឹងការរចនារូបរាងដូចទៅនឹង Galaxy S8 ប៉ុន្តែគ្រាន់តែវាមានប្រព័ន្ធកាមេរ៉ាភ្លោះនៅផ្នែកខាងក្រោយប៉ុណ្ណោះ។ The Leaker បានរាយការណ៍បន្ថែមទៀតថា ក្រុមហ៊ុន Samsung ក៏អភិវឌ្ឍទៅលើបច្ចេកវិទ្យា advanced pressure-sensitive សម្រាប់អេក្រង់ OLED Displays របស់ខ្លួនផងដែរ ដូចនេះ យើងអាចនឹងទទួលបាននូវមុខងារ Force Touch (ដូចគ្នាទៅនឹងមុខងាររបស់ iPhone) នៅលើហ្វាប់ប្លេត Galaxy Note 8 ផងដែរ៕