រហូតមកទល់ពេលនេះ លោកអ្នកប្រហែលជាលឺដំណឹងពាក្យចចាមអារ៉ាមជាច្រើន អំពីប្រព័ន្ធស្កែនក្រយ៉ៅដៃ (Fingerprint Scanner) របស់ទូរស័ព្ទស៊េរីថ្មី iPhone 8 ដែលក្រុមហ៊ុន Apple អាចនឹងបំពាក់នូវប្រព័ន្ធស្កែនក្រយ៉ៅដៃនេះបង្កប់នៅក្រោមអេក្រង់ ជាជាងការប្រើប្រាស់វានៅលើប៊ូតុង Home Key របស់ខ្លួន។ តែពេលនេះ ក្រុមហ៊ុន Vivo របស់ចិនប្រហែលជាធ្វើរឿងនេះ មុនក្រុមហ៊ុន Apple ហើយទៅលើប្រព័ន្ធស្កែនក្រយ៉ោដៃបង្កប់ក្រោមអេក្រង់នេះ។ Vivo គឺជាក្រុមហ៊ុនផលិតស្មាតហ្វូនស្ថិតនៅក្រោមការគ្រប់គ្រងរបស់ក្រុមហ៊ុន OnePlus ។ Vivo នៅក្នុងប្រទេសចិន គឺទទួលបានការពេញនិយមខ្លាំង ហើយក្រុមហ៊ុននេះ បានកាន់កាប់ ចំណែកទីផ្សារស្មាតហ្វូនដល់ទៅ 17% ថែមទៀត។ Vivo មិនផ្តោទៅលើការផលិតស្មាតហ្វូនថ្នាក់ខ្ពស់នោះទេ ប៉ុន្តែក្រុមហ៊ុនផ្តោតទៅលើការផលិតស្មាតហ្វូនថ្នាក់កណ្តាល ដែលបំពាក់នូវលក្ខណៈសម្បត្តិមិនធម្មតា ការរចនារូបរាងកាន់តែស្រស់ស្អាត និងតម្លៃសមរម្យថែមទៀត។
អ្វីៗអាចនឹងមានការផ្លាស់ប្តូរ ហើយគេរំពឹងថា ក្រុមហ៊ុន Vivo ពិតជាបង្ហាញនូវវត្តមានស្មាតហ្វូនស៊េរីថ្មីរបស់ខ្លួនបំពាក់នូវប្រព័ន្ធស្កែនក្រយ៉ៅដៃបង្កប់ក្រោមអេក្រង់នៅសប្តាហ៍ក្រោយនេះ។ មានព័ត៌មានមួយបានបញ្ចេញ Teaser ផ្លូវការរបស់ក្រុមហ៊ុន Vivo ដោយបង្ហាញថា នៅក្នុងព្រឹត្តិការណ៍តាំងពិពរណ៍ Mobile World Congress ឆ្នាំនេះនៅសៀងហៃ នឹងចាប់ផ្តើមនៅថ្ងៃទី 28 ខែមិថុនា (វានៅមានព្រឹត្តិការណ៍តាំងពិពរណ៍ MWC ជាច្រើនទៀត) ។ នៅក្នុងរូបភាព Teaser នេះ យើងអាចមើលឃើញអំពីប្រព័ន្ធស្កែនក្រយ៉ៅដៃកាត់នូវអេក្រង់រួមជាមួយនឹងពាក្យថា “Unlock the future” ជាភាសាចិន និងអង់គ្លេស។
ព័តមានខាងលើ អាចនិងមានន័យផ្សេងទៀតទៅលើពាក្យនេះ ហើយក៏ប្រហែលជាមិនទាក់ទងទៅនិងប្រព័ន្ធស្កែនក្រយ៉ៅដៃបង្កប់ក្រោមអេក្រង់ផងដែរ ប៉ុន្តែ កាលពីសប្តាហ៍មុននេះ មានវីដេអូមួយបង្ហាញនៅលើបណ្តាញសង្គម Weibo នៅក្នុងប្រទេសចិនថា ស្មាតហ្វូនស៊េរីថ្មីនេះ និងភ្ជាប់ជាមួយបច្ចេកវិទ្យាថ្មីនេះ ហើយវានៅសល់ពេលមិនយូរប៉ុន្មានទេ ដែលស្មាតហ្វូនស៊េរីថ្មីនេះ និងបង្ហាញវត្តមាននៅសប្តាហ៍ក្រោយនោះ៕
