ដើម្បីអបអរនូវព្រឹត្តិការណ៍នៃការប្រកាសបង្ហាញវត្តមានរបស់ស្មាតហ្វូនស៊េរីថ្មីចុងក្រោយបំផុតរបស់ខ្លួននោះ ក្រុមហ៊ុន OnePlus បានប្រារព្ធធ្វើនូវព្រឹត្តិការណ៍ Pop-Up របស់ខ្លួនជាច្រើននៅជុំវិញពិភពលោក ដើម្បីផ្តល់ឱកាសអោយអ្នកគាំទ្ររបស់ខ្លួនទិញ យកនូវស្មាតហ្វូនស៊េរីថ្មី OnePlus 5 អោយបានមុនគេ។ ជាក់ស្តែង នេះមិនមែនជាយុទ្ធសាស្រ្តអ្វីដែលថ្មីនោះទេ ប៉ុន្តែវា គឺជាយុទ្ធសាស្ត្រមួយដែលពេញនិយមបំផុតសម្រាប់ធ្វើយ៉ាងណាអោយស្មាតហ្វូនស៊េរីថ្មីនេះ ទៅដល់ដៃអ្នកប្រើប្រាស់បានលឿនជាជាងការកម្មង់ទិញនៅលើអនឡាញ ហើយត្រូវរង់ចាំការដឹកជញ្ជូនទៀតនោះ។ សម្រាប់តម្លៃលក់របស់ស្មាតហ្វូន OnePlus 5 គឺភ្ជាប់ទៅនឹងប្រអប់ ហើយប្រសិនបើលោកអ្នកពិនិត្យមើលទៅលើលក្ខណៈសម្បត្តិរបស់ស្មាតហ្វូននេះ ពិតជាគួរអោយចាប់អារម្មណ៍ខ្លាំងមែនទែន។
ក្រុមហ៊ុន OnePlus ប្រារពន្ធនូវព្រឹត្តិការណ៍ Pop-Up នេះនៅក្នុងទីក្រុងញ៉ូវយ៉កស្ថិតនៅកន្លែងលក់ការ៉េមមួយ ។ មនុស្សដំបូងបំផុតដែលមកឈរតម្រង់ជួរនៅទីនេះមានឈ្មោះថា Christopher រស់នៅក្នុងទីក្រុងញ៉ូវយ៉ក បានប្រាប់ថា គាត់មកដល់ទីនេះ នៅវេលាម៉ោង 9:00AM ហើយគាត់ត្រូវរង់ចាំដោយសារតែព្រឹត្តិការណ៍នេះប្រារព្ធធ្វើឡើងជាផ្លូវការនៅវេលាម៉ោង 7:00 PM ។ វាពិតជាគួរអោយចាប់អារម្មណ៍ខ្លាំងមែនទែន នៅពេលដែលក្រុមហ៊ុន OnePlus អាចទាក់ទាញនូវមនុស្សជាច្រើនចូលរួមនៅក្នុងព្រឹត្តិការណ៍របស់ខ្លួនក្នុងទីក្រុងញ៉ូវយ៉កនេះ ហើយនឹងព្រឹត្តិការណ៍ Pop-Up ជាច្រើនទៀតនៅជុំវិញពិភពលោក នៅក្នុងការប្រកាសចេញស្មាតហ្វូនស៊េរីថ្មីចុងក្រោយនេះ។ ចាប់តាំងពីយុទ្ធសាស្រ្តរបស់ក្រុមហ៊ុន OnePlus ផ្តោតទៅលើការលក់អនឡាញនោះ គេសង្កេតឃើញថា ស្មាតហ្វូនរបស់ក្រុមហ៊ុននេះ អាចរកទិញបាននៅតាមហាងលក់រាយជាច្រើនផងដែរ។
នៅពេលដែលហាងការ៉េម Magnum បើកទ្វារភ្លាម អតិថិជនចាប់ផ្តើមដើរចូលមកនឹងទទួលបានស្មាតហ្វូន OnePlus 5 ជាមួយនឹងកាបូបយួរខាងក្រោយដ៏ស្រស់ស្អាតជាកាដូផងដែរ។ បន្ថែមពីនេះទៀត អតិថិជនអាចញ៉ាំការ៉េមដែលពួកគេពេញចិត្តបាន។ នៅខាងក្នុងហាងការ៉េមនេះ អតិថិជនមានឱកាសធ្វើតេស្តទៅលើស្មាតហ្វូនស៊េរីថ្មីនេះសិន មុនពេលពួកគេសម្រេចចិត្តទិញស្មាតហ្វូនស៊េរីថ្មីនេះ។ ព្រឹត្តិការណ៍ Pop-up របស់ក្រុមហ៊ុន OnePlus ធ្វើនៅទីក្រុងសំខាន់ៗជាច្រើននៅជុំវិញពិភពលោកដែលពិតជាជួយពង្រីកនូវកេរ្តិ៍ឈ្មោះរបស់ក្រុមហ៊ុន OnePlus ។ តោះទស្សនាវីដេអូទាំងអស់គ្នា៕