មកទល់ពេលនេះ មនុស្សជាច្រើនតែងគិតទៅដល់សំណួរដ៏សំខាន់មួយ ដែលពេញនិយមបំផុតគឺ “តើស្មាតហ្វូនស៊េរីថ្មីនេះកោងឬទេ?” ប៉ុន្តែអ្វីដែលពួកគេកំពុងតែគិតនេះ គឺខុសហើយ! សំណួរដែលសំខាន់ជាងនេះនោះ គឺថា “តើនឹងមានអ្វីកើតឡើងនៅពេលដាក់ស្មាតហ្វូននេះ ទៅក្នុងខ្លាញ់ក្តៅនោះ?” ស្មាតហ្វូនស៊េរីថ្មី Galaxy S8 ត្រូវជ្រលក់ចូលទៅក្នុងម្សៅបំពងហើយដាក់ចូលទៅក្នុងម៉ាស៊ីនបំពងអេឡិចត្រូនិក (ខ្លាញ់កំពុងតែពុះនៅក្នុងកម្រិត 200 អង្សារសេ)។ ស្មាតហ្វូននេះត្រូវដាក់បំពងនៅក្នុងរយៈពេលដល់ទៅ 60 វិនាទី ដូចអ្វីដែលលោកអ្នកនឹងទស្សនានៅក្នុងវីដេអូខាងក្រោមនេះ។
ក្រោយការបំពងនៅក្នុងខ្លាញ់ក្តៅរយៈពេលមួយនាទីរួចមក ស្មាតហ្វូន Galaxy S8 នៅតែដំណើរការបានដូចធម្មតា។ យ៉ាងណាមិញ ផ្នែកខ្លះ នៃស្មាតហ្វូនស៊េរីថ្មីនេះ ក៏មានការខូចខាតខ្លះដែរ ពិសេសនៅលើអេក្រង់ និងប្រព័ន្ធស្កែនក្រយ៉ោដៃផ្នែកខាងក្រោយ។ ស្មាតហ្វូន Galaxy S8 នៅតែរោទិ៍បានធម្មតា ក្រោយពេលវាស្រង់ចេញពីខ្លាញ់ក្តៅនេះទើបតែ 2/3 វិនាទីប៉ុណ្ណោះ។ ដូចនេះ ប្រសិនបើលោកអ្នកនៅមិនទាន់តេស្តរបៀបនេះនោះទេ យើងឃើញថា ស្មាតហ្វូន Galaxy S8 នេះ ពិតជាអស្ចារ្យខ្លាំងណាស់៕
