OUKITEL U22 គឺជាស្មាតហ្វូនស៊េរីថ្មីចុងក្រោយបំផុតរបស់ក្រុមហ៊ុនបច្ចេកវិទ្យា OUKITEL ប៉ុន្តែស្មាតហ្វូនស៊េរីថ្មីនេះ នៅមិនទាន់ដាក់លក់នៅលើទីផ្សារនៅឡើយទេ។ អ្វីដែលកាន់តែច្បាស់នោះគឺថា ស្មាតហ្វូនថ្មីនេះ ផ្តោតសំខាន់ខ្លាំងទៅលើប្រព័ន្ធកាមេរ៉ារបស់វា។ នេះគឺដោយសារតែស្មាតហ្វូន OUKITEL U22 មិនមែនភ្ជាប់ជាមួយប្រព័ន្ធកាមេរ៉ាពីរ ឬ 3 នោះទេ ប៉ុន្តែស្មាតហ្វូននេះបំពាក់នូវប្រព័ន្ធកាមេរ៉ាដល់ទៅ 4 ។ ប្រព័ន្ធកាមេរ៉ាភ្លោះស្ថិតនៅផ្នែកខាងក្រោយគឺមានការពេញនិយមខ្លាំងនៅលើទីផ្សារ ហើយផ្នែកខាងមុខរបស់ស្មាតហ្វូននេះក៏ភ្ជាប់នូវប្រព័ន្ធកាមេរ៉ាភ្លោះផងដែរ។
ក្រៅពីប្រព័ន្ធកាមេរ៉ានេះ ក្រុមហ៊ុនOUKITEL ធានាដល់អតិថិជនទៀតថា ស្មាតហ្វូនស៊េរីថ្មីនេះ OUKITEL U22 គឺមានសមត្ថភាពលើសពីការថតរូប។ ថ្មីៗនេះ ក្រុមហ៊ុន OUKITEL បញ្ចេញនូវវីដេអូថ្មីមួយដែលផ្តល់នូវបទពិសោធន៍កាន់តែអស្ចារ្យសម្រាប់ការលេងហ្គេម។ នៅក្នុងការតេស្តទៅលើវីដេអូនេះ គេសង្កេតឃើញថាស្មាតហ្វូន OUKITEL U22 នេះ អាចដំណើរការហ្គេមធំៗបានដោយគ្មានបញ្ហារអាក់រអួល ឬយឺតយ៉ាវអ្វីនោះទេ។ ហ្គេមពីរដែលលេងនៅលើស្មាតហ្វូនស៊េរីថ្មីនេះ គឺហ្គេម KOF 97OL និងហ្គេម Clash of Clans ។ ហ្គេមទាំងពីរនេះ មានក្រាហ្វិកធំដែលត្រូវការកម្លាំង CPU និង GPU ខ្លាំង ប៉ុន្តែវាដំណើរការយ៉ាងរលូននៅលើស្មាតហ្វូននេះ។ ស្មាតហ្វូន OUKITEL U22 ភ្ជាប់ជាមួយរ៉េមផ្ទុកទិន្នន័យបណ្តោះអាសន្នទំហំ 2GB ម៉េមូរីក្នុងម៉ាស៊ីនទំហំ 16GB និងដំណរការដោយបន្ទះឈីប MediaTek MT6580A quad-core SoC ថែមទៀត។ បន្ថែមពីនេះទៀត ស្មាតហ្វូននេះ អាចភ្ជាប់ជាមួយម៉េមូរីខាងក្រៅប្រភេទ microSD បានទំហំដល់ទៅ 32GB ហើយវាប្រើប្រាស់ស៊ីមប្រភេទ 3G ទ្រទ្រង់នៅទ្វីបអ៊ឺរ៉ុប និងអាមេរិកថែមទៀត។
ស្មាតហ្វូន OUKITEL U22 នឹងចាប់ផ្តើមការកម្មង់ទិញមុន (Pre-order) ចាប់ពីថ្ងៃទី 26 ខែមិថុនាខាងមុខនេះ។ ស្មាតហ្វូននេះ នឹងដាក់លក់នៅលើគេហទំព័រលក់រាយអនឡាញ ជាច្រើន ហើយក្រុមហ៊ុន OUKITEL ក៏នឹងធ្វើកម្មវិធី Flash SALE (ការលក់មុន) សម្រាប់ស្មាតហ្វូន OUKITEL U22 របស់ខ្លួននៅថ្ងៃកម្មង់ទិញមុននេះ ផងដែរ។ ក្រុមហ៊ុន OUKITEL នៅមិនទាន់ប្រកាសបង្ហាញអំពីតម្លៃរបស់ស្មាតហ្វូននេះ នៅឡើយទេ ប៉ុន្តែយើងសង្ឃឹមថាឆាប់ៗនេះ តម្លៃរបស់វា នឹងទម្លាយអោយដឹងជាក់ជាមិនខាន៕
សូមទស្សនាវីដេអូនៃការតេស្តហ្គេមនៅលើស្មាតហ្វូន OUKITEL U22 ទាំងអស់គ្នា៖
