ថ្ងៃនេះ ព័ត៌មានបែកធ្លាយរូបភាព Renders មួយ ដែលត្រូវបានអះអាងថា ជារូបភាពពិតប្រាកដរបស់ហ្វាប់ប្លេតស៊េរីថ្មី Samsung Galaxy Note 8។ គណនី @OnLeaks អ្នកទម្លាយព័ត៌មានរបស់ស្មាតហ្វូនស៊េរីថ្មីចុងក្រោយគេបំផុត និងជាអ្នកសហការជាមួយនឹង 91mobiles បានទម្លាយនូវរូបភាពជាច្រើនសន្លឹកដ៏ស្រស់ស្អាតរបស់ហ្វាប់ប្លេត Samsung Galaxy Note 8 ។ នៅក្នុងការបែកធ្លាយនេះ មានទាំងវីដេអូ និងរូបភាពរបស់ហ្វាប់ប្លេតស៊េរីថ្មីនេះ ដែលត្រូវបាន គេអះអាងថា ជា Samsung Galaxy Note 8 វាមានរូបរាង 3D Renders ផ្អែកទៅលើ CADs នេះ បើយោងតាមការទម្លាយរបស់ @OnLeak។
អ្វីដែលធ្វើអោយអ្នកគាំទ្រមានការចាប់អារម្មណ៍នោះ គឺការរចនារូបរាងរបស់វា ប្លែកទាំងស្រុងពីម៉ូដែលកន្លងមក ដែលមិនត្រឹមតែមានរូបរាងក្រាស់នោះទេ ថែមទាំងមានភាពខុសគ្នាតែម្តងបើធៀបជាមួយនឹងស្មាតហ្វូន Galaxy S8 ។ ចំនែកការរចនារូបរាងផ្នែកខាងក្រោយវិញ គឺពិតជាពិសេសបំផុត ដោយសារតែមានកាមេរ៉ាភ្លោះ កាត់ទទឹង អមមកជាមួយនិងប៊ូតុងស្កែនក្រយ៉ៅដៃ។
មានពាក្យចចាមអារ៉ាមបាននិយាយអំពីប្រព័ន្ធកាមេរ៉ាភ្លោះតាំងពីដើមរហូតមកទល់ពេលនេះ ហើយប្រព័ន្ធស្កែនក្រយ៉ៅដៃ វិញក៏ដូចគ្នាដែរ គឺនឹងបំពាក់នៅជាប់ប្រព័ន្ធកាមេរ៉ាអមជាមួយនឹងភ្លើងអំពូល LED Flash ។ ហ្វាប់ប្លេតនេះ អាចនឹងមានអេក្រង់ទំហំ 6.3 អ៊ីង បើធៀបជាមួយនឹងស្មាតហ្វូន Galaxy S8+ មានអេក្រង់ទំហំ 6.2 អ៊ីង។ តាមរយៈរូបភាព Render ថ្មីនេះ ប្រព័ន្ធស្កែនក្រយ៉ៅដៃអាច នឹងដាក់នៅផ្នែកខាងក្រោយ ហើយការរចនារូបរាងកាមេរ៉ាភ្លោះវិញ ពិតជាប្លែកពីដៃគូដទៃ។ មានការជឿជាក់ថា គំរូចុងក្រោយបំផុត របស់ហ្វាប់ប្លេត Galaxy Note 8 នឹងមិនមែនមានរូបរាងដូចទាំងស្រុងជាមួយរូបភាព Renders ថ្មីនេះនោះទេ វាអាចនិងមានការប្រែប្រួលខ្លះ៕