ក្រុមហ៊ុន Vivo កំពុងតែត្រៀមខ្លួនក្នុងការប្រកាសបង្ហាញស្មាតហ្វូនស៊េរីថ្មីចំនួន 2 ម៉ូដែលនៅក្នុងសប្តាហ៍ទី 1 នៃខែកក្កដាខាងមុខនេះ នោះគឺ Vivo X9s និង Vivo X9s Plus ។ ថ្មីៗនេះ ក្រុមហ៊ុន Vivo ក៏បង្ហាញនូវរូបភាព Teaser ថ្មីនៃ ការសម្ពោធស្មាតហ្វូនស៊េរីថ្មីនេះ ទៅកាន់អតិថិជនរបស់ខ្លួន ដើម្បីមកចូលរួមក្នុងព្រឹត្តិការណ៍ប្រកាសសម្ពោធស្មាតហ្វូននេះ នៅថ្ងៃទី 6 ខែកក្កដា តែទោះជាយ៉ាងណាក្រុមហ៊ុននេះ នៅមិនទាន់បញ្ជាក់អំពីកាលបរិច្ឆេទនៃការដាក់លក់ និងតម្លៃនៅឡើយទេ។ សម្រាប់លក្ខណៈសម្បត្តិ Hardware របស់ស្មាតហ្វូនស៊េរីថ្មី Vivo X9s នៅមិនទាន់ប្រកាសនៅឡើយទេ ប៉ុន្តែមុននេះរបាយការណ៍មួយបញ្ជាក់ថា ស្មាតហ្វូន Vivo X9s Plus ត្រូវបានទម្លាយលក្ខណៈសម្បត្តិនៅលើ TENAA របស់ប្រទេសចិន។
យោងតាមព័ត៌មានលម្អិតដែលទម្លាយដោយ TENAA កាលពីខែឧសភាបានអោយដឹងថា ស្មាតហ្វូនស៊េរីថ្មី Vivo X9s Plus ភ្ជាប់ជាមួយនឹងអេក្រង់ទំហំ 5.85 អ៊ីងកម្រិតភាពច្បាស់ 1920 x 1080 ភិចសែល ហើយល្បឿននៃបន្ទះឈីបរបស់វាគឺដល់ទៅ 1.95GHz ។ ស្មាតហ្វូននេះ បំពាក់នូវរ៉េមផ្ទុកទិន្នន័យទំហំ 4GB ម៉េមូរីក្នុងម៉ាស៊ីនទំហំ 64GB ប្រព័ន្ធកាមេរ៉ាភ្លោះខាងក្រោយទំហំ 20MP + 8MP ភ្ជាប់ជាមួយមុខងារ DoF (depth-of-field) effects កាមេរ៉ាខាងមុខទំហំ 16MP ថាមពលថ្មខ្លាំងកម្លាំង 3,920mAh ហើយថែមទាំងដំណើរការប្រព័ន្ធប្រតិបត្តិការ Android 7.1.1 Nougat ថែមទៀត។ បន្ថែមពីនេះទៀត ស្មាតហ្វូននេះទ្រទ្រង់នូវប្រព័ន្ធ VoLTE (Voice over LTE), TD-LTE និងការទ្រទ្រង់ FD-LTE support, Bluetooth connectivity ពិសេសការរចនារូបរាងស្រោបពីលោហធាតុថែមទៀត។
នៅក្នុងពេលនេះ វានៅមិនទាន់ច្បាស់នោះទេដែលថាស្មាតហ្វូនស៊េរីថ្មី Vivo X9s នឹងផ្តល់នូវលក្ខណៈសម្បតិ្តអ្វីខ្លះបើធៀបជាមួយនឹងស្មាតហ្វូន X9s Plus ប៉ុន្តែយើងអាចប៉ាន់ស្មាតហ្វូនថាទំហំអេក្រង់របស់វានឹងតូចជាង X9s Plus ចំនែកបន្ទះឈីបក៏មានកម្លាំងខ្សោយ ហើយថាមពលថ្មក៏មានទំហំតូចជាងផងដែរ។ ប្រព័ន្ធកាមេរ៉ារបស់ស្មាតហ្វូន X9s អាចនឹងដូចគ្នាទៅនឹងស្មាតហ្វូន X9s Plus ដែរហើយប្រព័ន្ធប្រតិបត្តិការក៏ Android ជំនាន់ដូចគ្នាផងដែរ។ សម្រាប់ព័ត៌មានលម្អិតរបស់ស្មាតហ្វូនស៊េរីថ្មីទាំងពីរនេះនឹងបង្ហាញខ្លួននៅសប្តាហ៍ទីមួយក្នុងខែក្រោយនេះហើយ៕
