បន្ទះឈីបកម្រិតមធ្យមរបស់ Qualcomm ស៊េរី Snapdragon 435 និង Snapdragon 625 គឺវាមានសមត្ថភាពគ្រប់គ្រាន់សម្រាប់ឲ្យយើងប្រើប្រាស់កម្មវិធីបានរលូនល្អនៅលើទូរស័ព្ទ និងឧបករណ៍ថាបប្លែតថ្នាក់មធ្យមដែលយើងកំពុងប្រើរាល់ថ្ងៃ ហើយនៅថ្ងៃនេះ ផ្ទាល់ក្រុមហ៊ុនដ៏មានឥទ្ធិពលលើវិស័យផលិតបន្ទះឈីបក្នុងពិភពលោកមួយនេះបានប្រកាសចេញឈីបស៊េរីថ្មីមួយទៀតក្នុងស្រឡាយ 4 Series របស់ខ្លួនគឺ Snapdragon 450។ ឈីបស៊េរីថ្មីនេះប្រើប្រាស់ CPU ប្រភេទ Cortex-A53 ដែលមាន 8-Core ល្បឿនប្រតិបត្តិការលឿនជាងស៊េរី Snapdragon 435 ប្រមាណ 25% និងប្រើប្រាស់ GPU ស៊េរី Adreno 506 ល្បឿនដំណើរការហ្គេមលឿនជាងមុន 25%។
Snapdragon 450 គឺជាឈីបដំបូងក្នុងស្រឡាយរបស់វាដែលមានខ្នាតទំហំ 14 ណាណូម៉ែត្រ ប្រើប្រាស់ថាមពលថ្មតិចជាងមុខ 30% និងជួយបង្កើនថាមពលថ្មប្រើប្រាស់បានយូរជាងជំនាន់ Snapdragon 435 ប្រមាណ 4 ម៉ោង នេះ បើតាមការបញ្ជាក់ពីក្រុមហ៊ុនផ្ទាល់។ បន្ទះឈីបស៊េរីថ្មីនេះ មានលទ្ធភាពខ្ពស់អាចទ្រទ្រង់បានជាមួយប្រព័ន្ធកាមេរ៉ាភ្លោះដល់ទំហំ13MP+13MP, អាចថតវីដេអូកម្រិត 1080px ក្នុងល្បឿន 60fps, មានមុខងារ bokeh effects, អាចទ្រទ្រង់ការថតវីដេអូបានដល់កម្រិត 4K, ប្រើបានជាមួយរន្ធដោត USB ប្រភេទ USB Type-C និងទ្រទ្រង់បានជាមួយបច្ចេកវិទ្យាសាកថ្មល្បឿនលឿន Qualcomm Quick Charge 3.0 ដែលមានសមត្ថភាពសាកថាមពលថ្មពី 0 ទៅ 80% ប្រើពេលតែ 35 នាទី ហើយសម្រាប់សេវា Wi-Fi ក៏ចាប់បានខ្លាំង និងមានល្បឿនប្រើប្រាស់លឿនជាងជំនាន់មុខផងដែរ៕ ខាងក្រោមនេះគឺជាការប្រើធៀបគុណសម្បត្តិមួយចំនួនរបស់វាងបន្ទះឈីប Snapdragon 435, 450 និង 625។