ក្រុមហ៊ុនបច្ចេកវិទ្យាអេឡិចត្រូនិកយក្សចំនួនពីរ នៅក្នុងប្រទេសកូរ៉េខាងត្បូងក្រុមហ៊ុន Samsung និងក្រុមហ៊ុន LG មានគោលដៅក្នុងការប្រើប្រាស់យុទ្ធសាស្រ្តផ្សេងៗពីគ្នា នៅក្នុងការលក់ទូរទស្សន៍ឆ្លាតវៃ UHD TV នៅក្នុងទីផ្សារក្នុងឆ្នាំនេះ។ ក្រុមហ៊ុន Samsung បានពង្រីកនូវការលក់ទូរទស្សន៍ Ultra-Premium QLED ជាមួយនឹងបន្ទះអេក្រង់ទំហំ 88 អ៊ីញ ខណៈពេលដែលក្រុមហ៊ុន LG ផ្តោតទៅលើការលក់ទូរទស្សន៍ស៊េរីថ្មីកម្រិត 4K ចំនួន 3 ម៉ូដែល ហើយអ្វីដែលកាន់តែពិសេសនោះ នៅក្នុងឆមាសទី 2 នៃឆ្នាំនេះវាមានការទស្សន៍ទាយថា វាមានការប្រកួតប្រជែងចំណែកទីផ្សារខ្លាំងនៅលើទូរទស្សន៍ UHD TV ។
Samsung Q9 គឹជាទូរទស្សន៍ QLED TV ទំហំ 88 អ៊ីញ ត្រូវបានគេដឹងថា នឹងប្រកាសដាក់លក់នៅចុងខែសីហាខាងមុខនេះ។ សូមចងចាំផងដែរថា អេក្រង់ QLED ប្រើប្រាស់នូវបច្ចេកវិទ្យា quantum dot technology ដែលមានសមត្ថភាពក្នុងការបង្ហាញនូវពណ៌កូល័ររស់រវើក (vibrant Colors) និងកម្រិតពន្លឺភ្លឺច្បាស់បំផុត ខណៈពេលដែលទូរទស្សន៍ធម្មតាមានកម្រិតពន្លឺខ្ពស់ប៉ុន្តែមិនមានពណ៌កូល័រ (Vibrant Colors) នោះទេ។ នេះគឺជាអេក្រង់ទូរទស្សន៍ទំហំធំបំផុតរបស់ក្រុមហ៊ុន Samsung ដែលធ្លាប់ផលិតមក ខណៈពេលដែលអេក្រង់ធំបំផុតជំនាន់មុនរបស់ទូរទស្សន៍ UHD TV មានទំហំដល់ទៅ 75 អ៊ីញ។
ក្រុមហ៊ុន Samsung បានបញ្ជាក់ថា អតិថិជនជាច្រើនឥឡូវនេះ គឺកំពុងតែត្រូវការម៉ូដែលទូរទស្សន៍ដែលមានអេក្រង់ធំ និងមានច្រើនជម្រើសក្នុងការជ្រើសរើស។ លក្ខណៈស្ទាយ៍របស់ទូរទស្សន៍នេះគឺជាប្រភេទ Frame-Type TV ហើយតម្លៃរបស់វាគឺប្រហែលជា 1 លានវ៉ុនប្រហែលជា $13,366 ។ នៅក្នុងយុទ្ធសាស្រ្តផ្នែកទីផ្សារ ក្រុមហ៊ុន LG ប្រកាសបង្ហាញនូវទូរទស្សន៍ម៉ូដែល 4K ចំនួន 3 ស៊េរីម៉ូដែលទៀតផងដែរគឺត្រកូល UJ6200 ដែលមានតម្លៃថោកជាងទូរទស្សន៍ UJ6600 គ្រោងនឹងប្រកាសបង្ហាញនៅដើមខែសីហាខាងមុខនេះ។ ទូរទស្សន៍នេះ មានអេក្រង់ទំហំ 43 អ៊ីញ 49 អ៊ីញ និង 55 អ៊ីញដែលទ្រទ្រង់កម្រិតភាពច្បាស់ 4K TV ។ សម្រាប់ទូរទស្សន៍អេក្រង់ 43 អ៊ីញមានតម្លៃតិចជាង 1 លានវ៉ុនប្រហែលជា $891 ។
អ្នកវិភាគម្នាក់និយាយថា ទីផ្សាររបស់ទូរទស្សន៍កំពុងតែឈានដល់ចំណុចកំពូល ដូចនេះ ក្រុមហ៊ុន Samsung និង LG គឺជាជម្រើសតែមួយគត់ដែលអ្នកប្រើប្រាស់អាចជ្រើសរើសបាន។ ក្រុមហ៊ុន Samsung កំពុងតែមានចំណែកទីផ្សារធំបំផុតឈានមុខគេផ្នែកទូរទស្សន៍នៅក្នុងពិភពលោកជាច្រើនឆ្នាំមកហើយ ឥឡូវនេះក្រុមហ៊ុន Samsung ក៏ប្រកាសបង្ហាញនូវទូរទស្សន៍ Samsung Q9 ដែលអាចប្រកួតប្រជែងជាមួយទូរទស្សន៍ LG Signature OLED TV W ទំហំ 77 អ៊ីញដែលប្រកាសដាក់លក់កាលពីខែមុននេះ៕
