ឆ្នាំនេះ LG បានស្តារមុខមាត់ទីផ្សារស្មាតហ្វូនរបស់ខ្លួនឡើងវិញមានមួយកម្រិតក្រោយពីបានប្រកាសចេញកំពូលស្មាតហ្វូន LG G6 ដែលមានរចនាបថរូបរាងថ្មី ប្រើប្រាស់បច្ចេកវិទ្យាអេក្រង់ថ្មីដែលមានកម្រិត aspect ratio ខ្ពស់រហូតដល់ទៅ 18:9 និងជាស្មាតហ្វូនដំបូងគេរបស់ខ្លួនដែលបំពាក់មុខងារការពារជ្រាបទឹក។ ហើយថ្មីនេះៗក្រុមហ៊ុនបច្ចេកវិទ្យាលំដាប់ថ្នាក់ពិភពលោករបស់កូរ៉េខាងត្បូងមួយនេះបានប្រកាសចេញទូរស័ព្ទស្មាតហ្វូនធន់មធ្យមដែលមានការរចនារូបរាង និងប្រើប្រាស់បច្ចេកវិទ្យាអេក្រង់ស្រដៀងគ្នាទៅនឹង LG G6 ដែរនោះគឺ LG Q6 Series ដែលមានចំនួនដល់ទៅបីស៊េរី។
យ៉ាងណាមិញក្នុងរយះពេលប៉ុន្មានខែមកនេះមានលេចលឺព័ត៌មានចចាមអារាមជាច្រើនបានចុះផ្សាយពីកំពូលទូរស័ព្ទជំនាន់ទីបីក្នុងស្រឡាយ LG V នោះគឺ LG V30 ដែលថាវានឹងបង្ហាញវត្តមាននៅឆ្នាំនេះ។ ឥលូវនេះព័ត៌មាននេះមានចេញពន្លឺពិតជាបណ្តើរៗហើយព្រោះថា LG ពិតជាបានត្រៀមប្រកាសចេញកំពូលទូរស័ព្ទស្មាតហ្វូនទីពីររបស់ខ្លួនក្នុងឆ្នាំ 2017 នេះមែន។ បើតាមលោក Evan Blass ដែលគេស្គាល់ច្បាស់ថាជាម្ចាស់គណនីធ្វីស្ទ័រឈ្មោះថា @evleaks បានបង្ហើបអោយដឹងថា LG នឹងប្រកាសចេញកំពូលស្មាតហ្វូន LG V30 នៅថ្ងៃទី 31 ខែសីហាក្នុងព្រឹត្តិការណ៍ពិពណ៌ផលិតផលបច្ចេកវិទ្យា IFA2017 នៅទីក្រុងប៉ែកឡាំងប្រទេសអាល្លឺម៉ង់។
ហើយបើយោងតាមរូប teaser ដែលបញ្ចេញដោយ LG សម្រាប់ការមកដល់នៃព្រឹតិ្តការណ៍នេះមិនបានបង្ហាញអ្វីច្រើននោះទេគ្រាន់តែនៅរូបភាពនេះយើងសង្កេតឃើញនៅខាងឆ្វេងគឺមាននិមិត្តសញ្ញាអក្សរ “V” ដែលបានបញ្ជាក់យ៉ាងច្បាស់ថា LG ពិតជាបង្ហាញចេញនូវកំពូលស្មាតហ្វូន LG V30 នេះប្រាកដមែន។ ក្នុងវេលានេះ LG មិនបានបង្ហាញអ្វីឡើយទាក់ទងនឹងកំពូលស្មាតហ្វូនអេក្រង់ពីរជំនាន់ទីបីរបស់ខ្លួន ក៏ប៉ុន្តែបើតាមការបែកធ្លាយព័ត៌មានមួយចំនួនបានបង្ហើបថា “LG V30 នឹងមិនដូចជំនាន់ LG V10 និងV20 នោះឡើយពោលគឺវានឹងមានការផ្លាស់ប្តូររចនាបថរូបរាង ហើយក៏អាចនិងបំបាត់អេក្រង់ទីពីរចោលផងដែរ។
ចំពោះអេក្រង់របស់វាអាចនឹងប្រើប្រាស់អេក្រង់ OLED ដែលមានទំហំ 6.0 អ៊ីងមានគែមអេក្រង់ស្តើងដូច G6, បំពាក់ប្រព័ន្ធកាមេរ៉ាក្រោយភ្លោះ, ប្រព័ន្ធស្កែនក្រយ៉ៅម្រាមដៃស្ថិតនៅខាងក្រោយ, ប្រើប្រាស់រន្ធដោត USB-C, រក្សារន្ធដោតកាសខ្នាត 3.5 មម ហើយក៏នឹងបំពាក់នៅបច្ចេកវិទ្យាការពារទឹកផងដែរ៕