ថ្មីៗនេះ ក្រុមហ៊ុនផលិតស្មាតហ្វូនរបស់ប្រទេសចិន Nubia បានចំណាយទឹកប្រាក់ 100 លានដុល្លារអាមេរិច នៅក្នុងការវិនិយោគទៅលើអាជីវកម្មស្មាតហ្វូននៅក្នុងប្រទេសឥណ្ឌា ដែលជាផ្នែកមួយនៃកិច្ចខិតខំប្រឹងប្រែងក្នុងការពង្រីកនូវប្រតិបត្តិការយ៉ាងទំលំទូលាយនៅក្នុងប្រទេសឥណ្ឌា និងបង្កើនអតិថិជនកាន់តែច្រើនឡើង។ លោក Eric Hu អ្នកគ្រប់គ្រងក្រុមហ៊ុន Nubia ប្រចាំប្រទេសឥណ្ឌា ត្រូវបានដកស្រង់សម្តីចេញពី Indo-Asian News Service ដោយបញ្ជាក់ថា ការវិនិយោគដ៏ធំនេះ គឺជាសញ្ញានៃការបង្កើតរោងចក្រផលិតស្មាតហ្វូននៅក្នុងប្រទេសឥណ្ឌាខណៈពេលដែលក្រុមហ៊ុន Nubia ទើបតែឈរជើងកាលពីឆ្នាំមុននេះ។ ចំណែកនៃទឹកប្រាក់វិនិយោគនេះក៏ជាផ្នែកមួយនៃការកសាងម៉ាកយីហោក្រុមហ៊ុន Nubia នៅក្នុងប្រទេសនេះ នេះបើតាមការបញ្ជាក់របស់លោក Hu ។ បន្ថែមពីនេះទៀត ក្រុមហ៊ុន នេះមានគម្រោងក្នុងការស្វែងរកបណ្តាញចែកចាយជាច្រើននៅក្នុងប្រទេសឥណ្ឌា និងបង្កើតហាង E-Store ផ្ទាល់ខ្លួនជាកន្លែងដែលអតិថិជនអាចស្វែងរកស្មាតហ្វូន និង Accessories ជាច្រើននៅក្នុងប្រទេសនេះ។ លោក Hu និយាយថា ក្រុមហ៊ុនរំពឹងថា ហាង Nubia Store អាចនឹងចាប់ផ្តើមប្រតិបត្តិការនៅចុងឆ្នាំនេះ។
ស្មាតហ្វូនជាច្រើនរបស់ក្រុមហ៊ុន Nubia ទទួលបានពេញនិយមបំផុតដោយសារតែកម្រិតគុណភាពនៃប្រព័ន្ធកាមេរ៉ា នេះហើយដែលជាក្តីសង្ឃឹមខ្ពស់សម្រាប់អនាគតរបស់ក្រុមហ៊ុននេះនៅក្នុងប្រទេសឥណ្ឌា។ អតិថិជននឹងទទួលនូវបទពិសោធន៍កាន់តែអស្ចារ្យនៅក្នុងការថតរូបកម្រិតខ្ពស់ (High-Quality) និងលក្ខណៈពិសេសជាច្រើនទៀត។ ឥឡូវនេះ ក្រុមហ៊ុន Nubia សន្យាថានឹងចែកចាយនូវបច្ចេកវិទ្យាកាមេរ៉ាល្អបំផុតសម្រាប់អ្នកប្រើប្រាស់នៅក្នុងប្រទេសឥណ្ឌា។ ក្រុមហ៊ុន នេះកំពុងខិតខំប្រឹងប្រែងយ៉ាងខ្លាំងក្នុងការក្លាយខ្លួនជាអ្នកដឹកនាំនៅក្នុងបច្ចេកវិទ្យាកាមេរ៉ាស្មាតហ្វូន ហើយថ្មីៗនេះក្រុមហ៊ុននេះ ក៏ទើបតែដាក់លក់ស្មាតហ្វូន Nubia N2 នៅក្នុងប្រទេសឥណ្ឌាភ្ជាប់ជាមួយនឹងកាមេរ៉ាដ៏មានអានុភាពដូចជាកាមេរ៉ាទំហំ 13 មេហ្គាភិចសែលបំពាក់មុខងារ Sony’s IMX258 sensor និង f/2.2 aperture ។ កាមេរ៉ាខាងមុខរបស់ស្មាតហ្វូននេះមានទំហំ 16 មេហ្គាភិចសែលភ្ជាប់ជាមួយនឹងមុខងារ Samsung’s 3P3ST sensor និង f/2.0 aperture រួមទាំង wide-angle lens កម្រិតដល់ទៅ 80 ដឺក្រេ។ ក្រុមហ៊ុនបច្ចេកវិទ្យានេះក៏បង្ហាញនូវស្មាតហ្វូនដ៏មានអានុភាពមួយទៀតនៅដើមខែនេះផងដែរក្នុងប្រទេសឥណ្ឌានោះគឺ Nubia M2 ។
នៅក្នុងការវិនិយោគរបស់ក្រុមហ៊ុន នេះនៅក្នុងប្រទេសឥណ្ឌា ក្រុមហ៊ុន Nubia នៅមានគម្រោងជាច្រើនទៀតក្នុងការបង្កើននូវម៉ាកយីហោរបស់ខ្លួនសម្រាប់ពេលអនាគតនៅក្នុងប្រទេសមួយនេះ។ អ្វីដែលកាន់តែពិសេសជាងនេះទៀតនោះ ក្រុមហ៊ុនបច្ចេកវិទ្យា Nubia នឹងប្រកាសបង្ហាញនូវស្មាតហ្វូនស៊េរីថ្មីចំនួន 5 ម៉ូដែលទៀតដែលមានតម្លៃផ្សេងៗគ្នា។ ក្រុមហ៊ុនបច្ចេកវិទ្យានេះមានគោលដៅក្នុងការដាក់លក់ស្មាតហ្វូនស៊េរីថ្មីរបស់ក្រុមហ៊ុននៅក្នុងទីក្រុងច្រើនជាង 60 នៅក្នុងប្រទេសឥណ្ឌាដើម្បីបំពេញតម្រូវការរបស់អ្នកប្រើប្រាស់នៅក្នុងប្រទេសឥណ្ឌា។ វាពិតជាគួរអោយចាប់អារម្មណ៍ខ្លាំងណាស់ដែលឥឡូវនេះក្រុមហ៊ុនបច្ចេកវិទ្យា Nubia មានគម្រោងក្នុងការប្រកួតប្រជែងជាមួយនឹងក្រុមហ៊ុនបច្ចេកវិទ្យាធំៗជាច្រើនទៀតនៅក្នុងប្រទេសឥណ្ឌានោះ៕