HMD Global ដែលជាក្រុមហ៊ុនបង្កើតស្មាតហ្វូន Android របស់ក្រុមហ៊ុន NOKIA បានប្រកាសថា លោក Arto Nummela លាលែងចេញពីតំណែងជានាយកប្រតិបត្តិ CEO របស់ក្រុមហ៊ុននេះហើយ ដែលការប្រកាសនេះធ្វើឡើងមួយថ្ងៃមុនក្រុមហ៊ុន HMD បង្ហាញស្មាតហ្វូនស៊េរីថ្មី NOKIA 8។ ក្រុមហ៊ុន HMD Global បាននិយាយថា ការចាកចេញរបស់លោក Nummela ពីក្រុមហ៊ុនគឺជាកិច្ចព្រមព្រៀងរវាងលោក Nummela និងក្រុមប្រឹក្សាភិបាលរបស់ក្រុមហ៊ុន។ លោក Sam Chin អគ្គនាយករបស់ក្រុមហ៊ុន HMD Global និយាយថា “លោក Arto Nummela ដើរតួយ៉ាងសំខាន់ក្នុងការបង្កើតប្រតិបត្តិការរបស់ក្រុមហ៊ុន HMD Global ការកសាងក្រុមការងារ និងការបង្ហាញនូវផលិតផលតំបូងជាច្រើនរបស់យើង។
នៅក្នុងនាមជាក្រុមប្រឹក្សាភិបាលទាំងមូល ខ្ញុំពិតជាអរគុណទៅដល់លោក Arto ចំពោះការរួមចំណែករបស់គាត់ ហើយយើងសូមជូនពរគាត់អោយជោគជ័យសម្រាប់អនាគតរបស់គាត់។” ក្រុមហ៊ុន HMD ក៏បានតែងតាំងលោក Florian Seiche ជានាយកប្រតិបត្តិស្តីទី CEO របស់ក្រុមហ៊ុនដែលទើបនិងរីកលូតលាស់មួយនេះ។ សូមជំរាបថា លោក Florian Seiche ក៏ជាប្រធានគ្រប់គ្រងនៅក្រុមហ៊ុន HMD Global ចាប់តាំងពីចាប់ផ្តើមក្រុមហ៊ុននេះមកម្ល៉េះ។ មុនពេលដែលលោកបានមកធ្វើការនៅក្នុងក្រុមហ៊ុន HMD Global លោក Seiche ធ្លាក់ធ្វើការនៅក្រុមហ៊ុន Microsoft, Nokia, HTC និង Siemens ។
ការចាកចេញរបស់លោក Nummela ពីនាយកប្រតិបត្តិរបស់ CEO របស់ក្រុមហ៊ុន HMD ហាក់ដូចជាមានការសម្ងាត់ណាស់ ព្រោះក្រុមហ៊ុន HMD មិនបានផ្តល់នូវព័ត៌ មានលម្អិតជាក់លាក់ណាមួយ អំពីហេតុផលដែលគាត់ចាកចេញនោះទេ។ កាលពីឆ្នាំមុននេះ លោក Nummela បានចូលរួមជាមួយនឹងក្រុមហ៊ុន HMD ក្រោយពេលដែលលោកធ្វើការជាង 10 ឆ្នាំនៅក្រុមហ៊ុន Nokia រួចមក។ លោកក៏ធ្លាប់ធ្វើការនៅក្រុមហ៊ុនជាច្រើនទៀតដូចជា Microsoft, HTC និង Orange ជាដើមនេះ បើតាមការបញ្ជាក់របស់ Android Authority ។
លោក Nummela ត្រូវបានគេសរសើរចំពោះការដើរតួនាទីយ៉ាងសំខាន់ក្នុងការកសាងម៉ាកយីហោ Nokia ឡើងវិញ។ ក្រោមការដឹកនាំរបស់លោក ក្រុមហ៊ុន HMD Global បានបង្ហាញស្មាតហ្វូន Android ចំនួន 3 ធំៗគឺ Nokia 3, Nokia 5, Nokia 6 ហើយនិងទូរស័ព្ទ Nokia 3310 (2017)ផងដែរ។ សម្រាប់ផែនការអនាគតរបស់គាត់ក៏នៅមិនច្បាស់ដែរ។ ការចាកចេញរបស់លោក Nummela ពីនាយកប្រតិបត្តិ CEO របស់ក្រុមហ៊ុន HMD Global វានៅមិនទាន់ច្បាស់នោះទេថា ការចាកចេញរបស់លោកអាចប៉ះពាល់ទៅដល់គោលដៅ ឬមានការផ្លាស់ប្តូរយ៉ាងណាសម្រាប់យុទ្ធសាស្រ្តនៃម៉ាកយីហោស្មាតហ្វូន Nokia Android នោះ។ ទោះជាយ៉ាងណាក៏ដោយ វាហាក់ដូចជាលឿនមែនទែន នៅក្នុងការប្រកាសអំពីការចាកចេញរបស់លោកនោះ៕
