កាលពីសប្តាហ៍មុននេះ យើងបានបង្ហាញលោកអ្នករួចមកហើយនូវវីដេអូពាណិជ្ជកម្មនៃផលិតផលថ្មីមួយរបស់ក្រុមហ៊ុនបច្ចេកវិទ្យា LG សម្រាប់ស្មាតហ្វូនស៊េរីថ្មី LG Q6។ ស្មាតហ្វូនស៊េរីថ្មីនេះ ត្រូវបានគេដឹងថា គឺជាប្រភេទ Mini ស្មាតហ្វូន នៃត្រកូល LG G6។ ស្មាតហ្វូនស៊េរីថ្មីនេះ ភ្ជាប់ជាមួយអេក្រង់ប្រភេទ Full Vision ទំហំ 5.5 អ៊ីង ខណៈពេលដែលស្មាតហ្វូន LG G6 មានអេក្រង់រហូតដល់ទៅ 5.7 អ៊ីង។ ស្មាតហ្វូនទាំងពីរនេះប្រើប្រាស់នូវ 18:9 aspect ratio ។
ស្មាតហ្វូន LG Q6 មាន 3 Version សម្រាប់ជ្រើសរើសគឺស្មាតហ្វូន LG Q6 Plus បំពាក់នូវរ៉េមផ្ទុកទិន្នន័យបណ្តោះអាសន្នទំហំ 4GB និងម៉េមូរីក្នុងម៉ាស៊ីនទំហំ 64GB និងស្មាតហ្វូន LG Q6 បំពាក់នូវរ៉េមផ្ទុកទិន្នន័យទំហំ 3GB និងម៉េមូរីក្នុងម៉ាស៊ីនទំហំ 32GB ខណៈពេលដែលស្មាតហ្វូន LG Q6α បំពាក់នូវរ៉េមផ្ទុកទិន្នន័យទំហំ 2GB និងម៉េមូរីក្នុងម៉ាស៊ីនទំហំ 16GB ។ ស្មាតហ្វូន LG G6 ដំណើរការបន្ទះឈីប Snapdragon 821 chipset ខណៈពេលដែលស្មាតហ្វូន LG Q6 បំពាក់នូវបន្ទះឈីប Snapdragon 435SoC។
ថ្មីៗនេះ ក្រុមហ៊ុន LG ក៏ប្រកាសបង្ហាញនូវវីដេអូផ្សព្វផ្សាយផលិតផលថ្មីមួយទៀតរបស់ស្មាតហ្វូន LG Q6 ដែលបង្ហាញអំពីមុខងារមួយក្នុងចំណោមមុខងារពិសេសៗ ជាច្រើនសម្រាប់អ្នកប្រើប្រាស់នៅលើស្មាតហ្វូននេះ។ ស្មាតហ្វូននេះ ប្រើប្រាស់នូវប្រព័ន្ធស្កែនមុខតាមរយៈកាមេរ៉ាមុខភ្ជាប់ជាមួយនឹងបច្ចេកវិទ្យា 3D សម្រាប់ស្កែននូវផ្ទៃមុខរបស់អ្នក ហើយវាអាចប្រើប្រាស់បានការងារជាច្រើនដូចគ្នាទៅនឹងប្រព័ន្ធស្កែនក្រយ៉ៅដៃផងដែរ។ ស្មាតហ្វូនស៊េរីថ្មីនេះភ្ជាប់ជាមួយនឹងអាលុយមីញ៉ូមប្រភេទ 7000 ប្រកបដោយភាពរឹងមាំ និងស្តើងងាយស្រួលប្រើប្រាស់ ស្មាតហ្វូន LG Q6 ស៊េរីថ្មីនេះ និងមានវត្តមាននៅកម្ពុជា នាពេលឆាប់ៗនេះហើយ៕