តាមទំលាប់របស់ក្រុមហ៊ុនបិតាបច្ចេកវិទ្យា Apple តែងតែប្រកាសចេញស្មាតហ្វូនជំនាន់ថ្មីរបស់ខ្លួននៅខែកញ្ញា (ចាប់ផ្តើមពីជំនាន់ iPhone 5) ហើយឆ្នាំនេះក៏មិនខុសពីឆ្នាំកន្លងៗទៅនោះទេដោយក្រុមហ៊ុនគ្រោងបញ្ចេញទូរស័ព្ទស្មាតហ្វូនជំនាន់ថ្មីរបស់ខ្លួនស៊េរី iPhone 7 នៅខែកញ្ញាខាងមុខ នេះបើយោងតាមព័ត៌មានចចាមអារាមនានាដែលបានចុះផ្សាយកន្លងមក។
សម្រាប់ថ្ងៃនេះយើងក៏បានឃើញចេលចេញនៅរូបភាព render ថ្មីទាក់ទងនឹង Case សម្រាប់ iPhone 7 & 7 Plus ដែលជាគំរូ Case របស់ក្រុមហ៊ុនផលិតឈ្មោះថា “Olixar”។ មានរបាយការណ៍គួរឲ្យទុកចិត្តមួយបានឲ្យដឹងថា Olixar Case នេះផលិតឡើងសម្រាប់ iPhone ជំនាន់ថ្មី iPhone 7 របស់ Apple ដែលកំពូលស្មាតហ្វូនជំនាន់ទី7 នេះនឹងមានកម្រាស់កាន់តែស្តើងជាងជំនាន់មុនគឺកម្រាស់ 6 មម ខណះដែលមានពាក្យចចាមអារាមជាច្រើនបានលើកឡើងប្រហាក់ប្រហែលគ្នាថា iPhone 7 Plus នឹងបំពាក់កាមេរ៉ាក្រោយចំនួនពីរគ្រាប់ (Dual Camera) ហើយពួកវាក៏នឹងបំពាក់មកជាមួយមុខងារ Smart Connector ដែលផ្តល់ភាពងាយស្រួលក្នុងការតភ្ជាប់ទៅកាន់ឧបករណ៍ដ៏ទៃដូចពពួក iPad Pro ដែរ។
Olixar នឹងដាក់លក់ Case ស៊េរីថ្មីសម្រាប់ iPhone7 & 7 Plus នេះមួយតម្លៃ £6.99 ប្រហែល 7.8 ដុល្លារអាមេរិក។ តើលោកអ្នកយល់យ៉ាងណាសម្រាប់ព័ត៌មានដែលថា iPhone 7 Plus នឹងបំពាក់កាមេរ៉ាពីរគ្រាប់នៅផ្នែកខាងក្រោយ ប៉ុន្តែសម្រាប់ក្រុមការងារពិភពអេឡិចត្រូនិកក៏យល់ឃើញដូចព័ត៌មានខាងលើនេះដែរព្រោះថាបច្ចុប្បន្នមានក្រុមហ៊ុនពីរដែលបានបញ្ចេញកំពូលស្មាតហ្វូនដែលមានកាមេរ៉ាពីរគ្រាប់រួចមកហើយគឺLG (G5) និង Huawei (P9) ដែលកំពុងតែទទួលបានការចាប់អារម្មណ៍ខ្លាំងពីសំណាក់អ្នកប្រើប្រាស់ពិសេសអ្នកដែលចូលចិត្តថតរូបតាមរយះទូរស័ព្ទដៃ។ ហើយបើ iPhone 7 Plus បំពាក់កាមេរ៉ាពីរគ្រាប់ពិតមែននោះ 7 Plus គឺជាសករាជថ្មីនៃកំពូលទូរស័ព្ទស្មាតហ្វូន iPhone របស់ Apple ជាក់ជាមិនខាន៕