ឃើញថាពីមួយឆ្នាំទៅមួយឆ្នាំវិស័យឧស្សាហកម្មទូរស័ព្ទប្រភេទស្មាតហ្វូនមានការរីកចម្រើនខ្លាំងគួរឲ្យកត់សំគាល់ក្នុងនោះមានទាំងរូបរាង រចនាបថ ទំហំវិមាត្រ អេក្រង់ កាមេរ៉ា កំលាំងម៉ាស៊ីន ថ្ម ទំហំផ្ទុកទិន្នន័យ និងបច្ចេកវិទ្យាប្រើប្រាស់កាន់តែទំនើបអាចបំពេញតម្រូវការប្រើប្រាស់ទូទៅប្រចាំថ្ងៃបានយ៉ាងទូលំទូលាយបំផុត។ ដោយឡែកសម្រាប់ក្រុមហ៊ុនដែលកំពុងមានសន្ទុះទីផ្សារខ្លាំងក្នុងវិស័យឧស្សាហកម្មទូរស័ព្ទស្មាតហ្វូនបច្ចុប្បន្នមានដូចជា Samsung, Apple, Huawei, Xioami, LG, SONY, Meizu, OPPO…ដែលក្រុមហ៊ុនទាំងនេះកំពុងប្រគូតប្រជែងគ្នាយ៉ាងក្តៅគគុកក្នុងទីផ្សារមួយនេះ។ ងាកមកទីផ្សារក្នុងប្រទេសចិនវិញមានក្រុមហ៊ុនពីរដែលកំពុងមានសន្ទុះទីផ្សារខ្លាំងជាងគេក្នុងតំបន់គឺ Huawei និង Xioami។
មូលហេតុសំខាន់ដែលក្រុមហ៊ុនទាំងពីរនេះ ទទួលបានការចាប់អារម្មណ៍ខ្លាំង និងមានទីផ្សារឈានមុខគេក្នុងតំបន់ដោយសារតែពួកគេបានបញ្ចេញផលិតទូរស័ព្ទស្មាតហ្វូនស៊េរីថ្មីខ្លាំងទំនើបដូចជា Huawei ទើបតែបានបញ្ចេញកំពូលទូរស័ព្ទស្មាតហ្វូនកាមេរ៉ាភ្លោះ P9 & P9 Plus និង Xioami បានប្រលែងចេញ Xioami Mi5 & Mi Max ដែលកំពុងទទួលបានការចាប់អារម្មណ៍ខ្លាំងព្រមទាំងកំពុងតែលក់ដាក់បានចំនួនច្រើនហួសពីការរំពឹងទុករបស់ក្រុមហ៊ុនទៅទៀត។ ហើយអ្វីដែលកាន់តែធ្វើឲ្យមានការចាប់អារម្មណ៍ខ្លាំងជាងនេះទៅទៀតនោះសម្រាប់ខណះពេលនេះគឺមានព័ត៌មានលេចលឺចេញពីកូរ៉េខាងត្បូងដែលបានលើកឡើងថា ទៅថ្ងៃខាងមុខក្រុមហ៊ុន Huawei និង Xioami នឹងផលិតចេញទូរស័ព្ទស្មាតហ្វូនជំនាន់ថ្មីរបស់ពួកគេដែលបំពាក់ដោយអេក្រង់កោងប្រភេទកញ្ចក់អេក្រង់ Flexible OLED ឬ AMOLED ដែលកញ្ចក់អេក្រង់ប្រភេទនេះនឹងផ្គត់ផ្គង់ដោយក្រុមហ៊ុនយក្សកូរ៉េខាងត្បូង Samsung និង LG។
ព្រភពខាងលើបន្តថា នេះអាចជាយុទ្ធសាស្ត្រទីផ្សារថ្មីទៀតរបស់ក្រុមហ៊ុនចិនទាំងពីរនេះដើម្បីវាយទម្លុះឆ្លងទៅកាន់ភាពជោគជ័យកាន់តែខ្លាំងក្នុងទីផ្សារទូរស័ព្ទស្មាតហ្វូននាពេលអនាគត។ ប៉ុន្តែគេមិនទាន់ដឹងថាទូរស័ព្ទស្មាតហ្វូនបំពាក់អេក្រង់ Flexible OLED ឬ AMOLED របស់ក្រុមហ៊ុនធំរបស់ចិនទាំងពីរនេះប្រកាសចេញនៅពេលណានោះទេ តែគេសន្និដ្ឋានថានៅជិតដំណាច់ឆ្នាំនេះ។ គួរបញ្ចក់ផងដែលថាសម្រាប់ទីផ្សារផ្គត់ផ្គងកញ្ចក់អេក្រង់សម្រាប់ឧបករណ៍អេឡិចត្រូនិកធំជាងគេក្នុងពិភពលោកគឺក្រុមហ៊ុនកូរ៉េខាងត្បូង Samsung ដែលផលិតកញ្ចក់ប្រភេទ Super AMOLED និង LG ផលិតកញ្ចក់អេក្រង់ប្រភេទ OLED៕