កាលពីចុងខែមុននេះ ក្រុមហ៊ុន Samsung បានធ្វើការប្រកាសបង្ហាញនូវនាឡិកាស្មាតវ៉ច Gear S3 នៅក្នុងព្រឹត្តិការណ៍ IFA ប៉ុន្តែនាឡិកាស៊េរីថ្មីចុងក្រោយរបស់ក្រុមហ៊ុនមួយនេះ នៅតែមិនទាន់បានដាក់ លក់នៅគ្រប់ទីកន្លែងនោះទេ។ ពេលនេះ របាយការណ៍ថ្មីមួយ របស់ប្រទេសកូរ៉េខាងត្បូងបានអះអាងថា អ្វីគ្រប់យ៉ាងនឹងត្រូវផ្លាស់ប្តូរនៅក្នុងរយៈពេលត្រឹមតែ 1 ខែ។
នាឡិកាស្មាតវ៉ច Gear S3 ត្រៀមខ្លួនក្នុងការបង្ហាញនៅចុងខែតុលាខាងមុខនេះ នៅក្នុងទីផ្សារជាច្រើនកន្លែង។ ក្រុមហ៊ុន Samsung បានបង្ហាញពីទំនុកចិត្តយ៉ាងខ្លាំងទៅលើនាឡិកាស្មាតវ៉ចស៊េរីថ្មីរបស់ខ្លួន ខណៈ ពេលដែលក្រុមហ៊ុនដៃគូប្រកួតប្រជែង Apple ទើបតែប្រកាសបង្ហាញនូវនាឡិកាស្មាតវ៉ចស៊េរីថ្មីរបស់ខ្លួនផងដែរ។
ជាក់ស្តែង ក្រុមហ៊ុន Samsung បានលើកឡើងពីគោលដៅនៃការលក់នាឡិកាស្មាតវ៉ច Gear S3 បានរហូតដល់ទៅ 60% បើធ្វើការប្រៀបធៀបជាមួយនឹងនាឡិកាស្មាតវ៉ច និងខ្សែដៃរក្សាសុខភាពដែលបានដាក់លក់កាលពីឆ្នាំមុន។ សម្រាប់តួរលេខពិតប្រាកដនោះ វាមានន័យថាក្រុមហ៊ុនមួយនេះ ត្រូវធ្វើការដាក់លក់នូវនាឡិកាស្មាតវ៉ច Gear S3 រហូតដល់ទៅ 5 លានគ្រឿង ប៉ុន្តែមិនទាន់ដឹងរយៈពេលប៉ុន្មាននោះទេ ប្រហែលនេះ ជាការលក់របស់វាហើយ។ សម្រាប់ឯកសារកាលពីឆ្នាំមុន ក្រុមហ៊ុន Samsung សម្រេចការលក់នាឡិកាស្មាតវ៉ចរបស់ខ្លួនបានត្រឹមតែ 3.1 លានគ្រឿងតែប៉ុណ្ណោះ។
នាឡិកាឆ្លាតវៃ Gear S3 បង្ហាញខ្លួនជាមួយនឹងទម្រង់ Classic ឬ Frontier ហើយថែមទាំងបំពាក់នូវប្រព័ន្ធបច្ចេកវិទ្យា 4G LTE ថែមទៀតផង។ បើនិយាយពីតម្លៃរបស់វាប្រហែលជាក្បែរ 400 អ៊ឺរ៉ូហើយ៕
