ពេលនេះ ក្រុមហ៊ុន Apple និង Samsung បានត្រលប់មកវិញហើយដែលរឿងនេះ ក្រុមហ៊ុនទាំងពីរមានជម្លោះជាមួយគ្នាតាំងពី 2 ឆ្នាំមុនមកម្ល៉េះ។ សហព័ន្ធតុលាការឧទ្ធរណ៍បានកាត់ក្តីរឿងប៉ាតង់នៅក្នុងខែឧសភា ឆ្នាំ 2014 ដែលឱ្យក្រុមហ៊ុន Apple ឈ្នះក្តី ហើយក្រុមហ៊ុន Samsung ត្រូវធ្វើការបង់ប្រាក់ 120 លានដុល្លារអាមេរិចដោយរំលោភប្រើប្រាស់ប៉ាតង់មួយចំនួនពិតមែន។ បើយោងតាមប្រភពពី Wall Street Journal សហព័ន្ធតុលាការឧទ្ធរណ៍បានសម្រេចសាលក្រមឱ្យក្រុមហ៊ុន Apple ក្រោមការដឹកនាំរបស់លោក Tim Cook ទាមទារបានទឹកប្រាក់ 119.6 លានដុល្លារអាមេរិចនៅក្នុងជម្លោះប៉ាតង់ជាមួយនឹងក្រុមហ៊ុន Samsung ដែលត្រូវបានលុបចោលដោយបណ្តឹងឧទ្ធរណ៍របស់សហរដ្ឋអាមេរិចនៅក្នុងខែកុម្ភៈមក។
ប៉ាតង់សំខាន់ 3 របស់ក្រុមហ៊ុន Apple បំពាក់នៅលើទូរស័ព្ទមានដូចជា Slide-to-unlock, Autocorrect និង Quick Links ។ នៅក្នុងសាលក្រមនេះ តុលាការបាននិយាយថា វាមានភស្តុតាងជាច្រើនដែលអះអាងថាក្រុមហ៊ុន Samsung ពិតជារំលោភប៉ាតង់របស់ក្រុមហ៊ុន Apple ពិតមែន។ ការកាត់ក្តីនេះមិនមែនឈ្នះជាឯកច្ឆ័ន្ទនោះទេដោយសារតែចៅក្រម 3 នាក់ក្នុងចំណោមចៅក្រម 11 នាក់ដែលមិនពេញចិត្តជាមួយនឹងជ័យជំនះរបស់ក្រុមហ៊ុន Apple នោះទេ។ យ៉ាងណាមិញ ការកាត់ក្តីរបស់ចៅក្រមសាលាឧទ្ធរណ៍ភាគច្រើនយល់ឃើញថា ចៅក្រមទាំង ៣ នាក់នោះមិនបានអនុវត្តន៍តាមការកំណត់របស់តុលាការកំពូលអាមេរិចដែលពិនិត្យបង្ហាញពីភស្តុតាងនោះទេ។
ដោយសារតែមានចៅក្រម ៣ នាក់បានធ្វើការជំទាស់ទៅនឹងការជំនុំជម្រះនេះ សហព័ន្ធតុលាការឧទ្ធរណ៍បានសម្រេចចិត្តទៅលើសាលក្រមនេះបន្ថែមថា ក្រុមហ៊ុន Apple ក៏ត្រូវបង់ប្រាក់ឱ្យក្រុមហ៊ុន Samsung ក្នុងទឹកប្រាក់ចចំនួន 158,400 ដុល្លារអាមេរិចដោយសារតែក្រុមហ៊ុននេះបានរំលោភក្នុងការប្រើប្រាស់នូវប៉ាតង់ Video និង Gallery របស់ក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូងនេះ។ មកទល់ពេលនេះ ក្រុមហ៊ុន Apple និងក្រុមហ៊ុន Samsung នៅមិនទាន់បានចេញអត្ថាធិប្បាយទៅលើការសម្រេចចិត្តរបស់តុលាការទៅលើជម្លោះប៉ាតង់ដ៏រ៉ាំរ៉ៃរបស់ពួកគេនៅឡើយទេ៕