បើរំលឹកទៅដល់ខែធ្នូឆ្នាំ 2014 វិញ ក្រុមហ៊ុន Samsung បានប្រកាសនូវរ៉េម LPDDR4 DRAM ទំហំ 4GB ដែលបានបំពាក់ដាក់ឱ្យប្រើប្រាស់នៅលើទូរស័ព្ទ និងថេប្លេតជាច្រើននៅពេលបច្ចុប្បន្ន។ ស្របពេលជាមួយគ្នានេះដែរ សព្វថ្ងៃនេះ ទូរស័ព្ទស៊េរីទំនើបកំពូលជាច្រើនក៏បានបំពាក់នូវរ៉េមទំហំរហូតទៅដល់ 6GB ។ នៅថ្ងៃនេះ ក្រុមហ៊ុន Samsung បានចាប់ផ្តើមមួយកម្រិតទៀតហើយដោយធ្វើការប្រកាសនូវរ៉េម LPDDR4 DRAM ទំហំដល់ទៅ 8GB ដែលវាពិតជាអស្ចារ្យមែនទែន។
រ៉េម DRAM ប្រើប្រាស់នូវម៉េមូរីឈីប 4 នៃបន្ទះ LPDDR4 16GB ដែលបានបំពាក់នៅលើឈីបស៊េរីថ្មីចុងក្រោយទំហំ 10nm ។ រ៉េម LPDDR4 ទំហំ 8GB នេះ អាចដំណើរការនៅក្នុងល្បឿន 4266 Mbps ដែលមានល្បឿនលឿនជាងមុនទ្វេរដងបើប្រៀបធៀបជាមួយនឹងបច្ចេកវិទ្យារបស់ DDR4 ដែលដំណើរការនៅលើកុំព្យូទ័រលើតុនោះ។ ខណៈពេលដែលរ៉េម LPDDR4 DRAM ទំហំ 8GB នឹងដាក់ប្រើប្រាស់នៅលើថេប្លេតស៊េរីថ្មីចុងក្រោយដែលផ្តល់នូវគុណភាពរូបភាពវីដេអូកម្រិតខ្ពស់ដល់ទៅ 4K ដំណើរការរលូនដូចលោកអ្នកមើលឃើញនៅលើកុំព្យូទ័រយួរដៃ ជាពិសេសវាមានសមត្ថភាពក្នុងការទ្រទ្រង់នូវ Virtual Machine ថែមទៀត។ នៅក្នុងការប្រើប្រាស់ថាមពលស្មើរគ្នា រ៉េមថ្មីនេះ មានសមត្ថភាពលើស Samsung 20 nm LPDDR4 DRAM 4GB ដល់ទៅពីរដង។
លោក Joo Sun Choi ដែលជាអនុប្រធាននាយកប្រតិបត្តិនៃផ្នែកលក់ម៉េមូរី និងផ្នែកទីផ្សាររបស់ក្រុមហ៊ុន Samsung Electronics និយាយថា ការបង្កើតនូវរ៉េម DRAM ដ៏ខ្លាំងក្លាសម្រាប់ទូរស័ព្ទទំហំ 8GB នឹងផ្តល់នូវសមត្ថភាពកាន់តែខ្លាំងប្រសើរជាងមុនសម្រាប់ទូរស័ព្ទស៊េរីទំនើបជាច្រើននៅជុំវិញពិភពលោក។ យើងនឹងបន្តរផ្តល់នូវដំណោះស្រាយម៉េមូរីកម្រិតខ្ពស់បំផុតដែលផ្តល់នូវគុណប្រយោជន៍យ៉ាងច្រើន និងបំពេញតម្រូវការជាច្រើនរបស់ទូរស័ព្ទទំនើបថ្មីៗ ដែលប្រើប្រាស់នូវកាមេរ៉ាភ្លោះ ការទ្រទ្រង់នូវវីដេអូកម្រិត 4K និងបច្ចេកវិទ្យា VR ថែមទៀតផង ។ នៅក្នុងសេចក្តីប្រកាសរបស់ខ្លួននៅថ្ងៃនេះ ក្រុមហ៊ុន Samsung មិនបាននិយាយពីពេលណាដែលរ៉េម DRAM ថ្មីនេះដាក់ឱ្យប្រើប្រាស់នៅកាន់ក្រុមហ៊ុនផលិតទូរស័ព្ទជាច្រើននៅឡើយទេ៕
