ទូរស័ព្ទស៊េរីថ្មីដែលនឹងបង្ហាញខ្លួននាពេលខាងមុខនោះគឺ Moto M ត្រូវបានទទួលស្គាល់គុណភាពដោយ TENAA នៅក្នុងខែសីហា ប៉ុន្តែវានៅតែមិនទាន់បានប្រកាសបង្ហាញខ្លួនជាផ្លូវការនៅឡើយទេ។ ប៉ុន្តែថ្មីៗនេះ យើងបានឃើញនូវរូបភាពយ៉ាងច្បាស់របស់ទូរស័ព្ទនេះដែលបានបែកធ្លាយកាន់នៅក្នុងប្រអប់ដៃរបស់មនុស្សម្នាក់នៅលើអនឡាញហើយ។ ទូរស័ព្ទ Moto M នឹងក្លាយជាផលិតផលដំបូងបំផុតរបស់ក្រុមហ៊ុន Motorola ដែលបំពាក់នូវបច្ចេកវិទ្យាស្កែនប្រយ៉ៅដៃស្ថិតនៅខាងក្រោយ។ វាថែមទាំងស្រោបដោយលោហធាតុមួយតួខ្លួនតែម្តង ហើយនៅផ្នែកខាងក្រោយនេះជាប្រភេទសម្បកកោងថែមទៀតផង។ ទូរស័ព្ទនេះប្រហែលជាមានអេក្រង់ទំហំ 5.5 អ៊ីងជាមួយនឹងថាមពលថ្មខ្លាំងដល់ទៅ 3,000mAh ។
ទូរស័ព្ទ Moto M អាចបំពាក់ជាមួយនឹងអង្គប្រតិបត្តិការ MT6750 របស់ក្រុមហ៊ុន MediaTek ដែលជាប្រភេទ CPU Octa-Core Cortex-A53 ដែលមានល្បឿន 1.9GHz រ៉េមសម្រាប់ផ្ទុកទិន្នន័យបណ្តោះអាសន្នទំហំ 3GB ឬ 4GB និងម៉េមូរីក្នុងម៉ាស៊ីនទំហំ 32GB ឬ 64GB ។ កាមេរ៉ាខាងក្រោយទំហំ 16 មេហ្គាភិចសែល ខណៈពេលដែលកាមេរ៉ាខាងមុខមានទំហំត្រឹមតែ 8 មេហ្គាភិចសែល។ ទូរស័ព្ទនេះទ្រទ្រង់នូវប្រព័ន្ធ 4G ហើយថែមទាំងដំណើរការនូវប្រព័ន្ធប្រតិបត្តិការ Android 6.0 Marshmallow ថែមទៀត។ វាមានវិមាត្រ 151 x 75 x 8 មីលីម៉ែត្រ។ ពាក្យចចាមអារ៉ាមនេះបានឱ្យដឹងថា ទូរស័ព្ទ Moto M នឹងធ្វើការប្រកាសនៅក្នុងពេលមួយនៅខែវិច្ឆិកាខាងមុខនេះ។ ប៉ុន្តែយើងនៅមិនទាន់បានដឹងអំពីទីផ្សារណាខ្លះដែលក្រុមហ៊ុនគ្រោងដាក់លក់ និងព័ត៌មានអំពីតម្លៃនៃទូរស័ព្ទនេះនោះទេ៕