អ្នកប្រហែលជាយល់ឃើញថាការទិញផលិតផលរបស់ក្រុមហ៊ុន Apple ដូចជាឆ្នាំងសាកថ្ម ឬខ្សែកាសមកពីក្រុមហ៊ុនលក់ទំនិញ Amazon មានន័យថាអ្នកនឹងទទួលបាននូវផលិតផលពិតប្រាកដនោះ អ្នកប្រហែលជាអាចយល់ខុសហើយ។ បើយោងតាមពាក្យបណ្តឹងដែលប្តឹងដោយក្រុមហ៊ុនផលិត iPhone បានឱ្យដឹងថា 90% នៃផលិតផលគ្រឿងបន្លាស់របស់ក្រុមហ៊ុន Apple ដែលបានរកឃើញលក់រាយនៅក្នុងគេហទំព័រមួយនេះគឺជាផលិតផលក្លែងក្លាយបើទោះបីជាវាមានស្លាកសញ្ញាឡូហ្គោពិតប្រាកដក៏ដោយ។ ក្រុមហ៊ុន Apple បានរាយការណ៍ថាក្រុមហ៊ុនរបស់ខ្លួនបានប្តឹងក្រុមហ៊ុន Mobile Star LLC ដែលមានទីតាំងនៅក្នុងទឹកដីសហរដ្ឋអាមេរិចដែលបានរំលោភទៅលើនិមិត្តសញ្ញាពាណិជ្ជកម្មនៃផលិតផលរបស់ខ្លួន ហើយក្រុមហ៊ុនមួយនេះត្រូវបានចោទប្រកាន់ទៅលើការលក់ទំនិញក្លែងក្លាយដោយប្រើប្រាស់ស្លាកសញ្ញាឡូហ្គោរបស់ក្រុមហ៊ុន Apple នឹងរូបភាពផលិតផលជាច្រើននៅក្នុងបញ្ជីទំនិញរបស់ខ្លួន។
ក្រុមហ៊ុន Apple បានបញ្ជាក់នៅក្នុងបណ្តឹងនេះថា នៅក្នុងឆ្នាំនេះ ក្រុមហ៊ុនរបស់ខ្លួនបានទិញផលិតផលម៉ាកយីហោ Apple ជាង 100 ផលិតផលពីក្រុមហ៊ុន Amazon ដូចជាទូរស័ព្ទ iPhone, ផលិតផលឆ្នាំងសាកថាមពលរបស់ Apple និងខ្សែកាសជាដើម ហើយក្នុងចំណោមផលិតផលទាំងនោះគឺ 90% ហើយដែលជាផលិតផលក្លែងក្លាយ។ ក្រុមហ៊ុន Mobile Star ត្រូវបានគេរាយការណ៍ថានឹងទទួលខុសត្រូវទៅលើបញ្ហាផលិតផលជាច្រើនទាំងអស់នេះ។ ការទិញផលិតផលមួយក្នុងចំណោមផលិតផលក្លែងក្លាយទាំងនោះមិនគ្រាន់តែមានន័យថាអ្នកប្រើប្រាស់នូវផលិតផលមិនសុទ្ធនោះទេ ហើយអ្នកអាចប្រឈមមុខទៅនឹងហានិភ័យថែមទៀត។ ក្រុមហ៊ុន Apple និយាយថា ក្រុមហ៊ុនផលិតផលិតផលក្លែងក្លាយនេះមិនបានប្រើប្រាស់នូវស្តង់ដារពេញលេញនោះទេ ហើយវាអាចផ្តល់នូវកម្លាំងភ្លើងមិនគ្រប់ដែលបណ្តាលឱ្យឆេះបាន ឬឆក់ខ្សែភ្លើងដែលអាចបណ្តាលឱ្យមនុស្សស្លាប់បានផងដែរ។
ក្រុមហ៊ុន Apple បានអះអាងថាកេរ្តរ៍ឈ្មោះនៃក្រុមហ៊ុនរបស់ខ្លួនត្រូវរងការខូចខាតនៅពេលដែលអតិថិជនជាច្រើនទិញផលិតផលក្លែងក្លាយទាំងអស់នោះ។ ក្រុមហ៊ុនមួយនេះនៅតែស្វែងរកដីកាការពារខ្លួនប្រឆាំងជាមួយនឹងក្រុមហ៊ុន Mobile Star ដែលលួចលក់នូវផលិតផលទំនិញក្លែងក្លាយជាច្រើន ទាមទារឱ្យមានការកំទេចចោលនូវផលិតផលក្លែងក្លាយទាំងអស់នោះ ការទាមទារទឹកប្រាក់ 150,000 ដុល្លារទៅលើការរំលោភកម្មសិទ្ធិបញ្ញា និងការបង់ប្រាក់ 2 លានផោនសម្រាប់ការរំលោភប្រើប្រាស់ផ្លាកយីហោរបស់ក្រុមហ៊ុន។ នៅពេលដែលក្រុមហ៊ុន Apple បានជូនដំណឹងទៅកាន់ក្រុមហ៊ុន Amazon អំពីផលិតផលក្លែងក្លាយរបស់ក្រុមហ៊ុន Mobile Star ក្រុមហ៊ុនលក់រាយដ៏ធំបំផុតមួយនេះបានប្រគល់នូវស្តុកទាំងអស់ដែលបានទិញពីក្រុមហ៊ុនមួយនេះ។ ក្រុមហ៊ុន Amazon បញ្ជាក់ថា “យើងមិនអាចអត់អោនបានទេចំពោះការលក់បន្លំផលិតផលក្លែងក្លាយនៅលើគេហទំព័ររបស់យើង។ យើងធ្វើការយ៉ាងជិតស្និទ្ធិជាមួយនឹងក្រុមហ៊ុនផលិតជាច្រើន និងក្រុមហ៊ុនម៉ាកល្បីៗជាច្រើនដែលកំពុងបន្តរការប្រព្រឹត្តិខុសបែបនេះ”៕