ក្រុមហ៊ុន Samsung នៅក្នុងប្រទេសឥណ្ឌាបានបញ្ជាក់ថា ក្រុមហ៊ុនរបស់ខ្លួនជឿជាក់ថា ភាពបរាជ័យរបស់ហ្វាប់ប្លេត Galaxy Note 7 មិនមានផលប៉ះពាល់អវិជ្ជមានទៅលើការលក់ស្មាតហ្វូនរបស់ខ្លួននោះទេ នៅត្រីមាសទី 4 ឆ្នាំ 2016 នេះ។ ជាការពិតណាស់ ក្រុមហ៊ុនមួយនេះ បានទម្លាយទៀតថា ការលក់នៅក្នុងឱកាសកម្មវិធីពិសេសៗជាច្រើនគឺដំណើរការតាមការរំពឹងទុកធម្មតា ហើយពួកគេថែមទាំងរំពឹងថានឹងមានកំណើនភាគហ៊ុនទីផ្សារកើនឡើងនៅក្នុងប្រទេសមួយនេះ។
លោក Manu Sharma ដែលជាអនុប្រធាន(ផ្នែកអាជីវកម្មទូរស័ព្ទ) របស់ក្រុមហ៊ុន Samsung India Electronics បាននិយាយថា “យើងបានធ្វើការផ្លាស់ប្តូរពីការកក់ទូរស័ព្ទ Galaxy Note 7 ទៅជាការជំនួសមកវិញនូវទូរស័ព្ទ Galaxy S7 និង S7 Edge វិញ។ ពួកយើងយល់អំពីភាពស្មោះត្រង់របស់អតិថិជនចំពោះយីហោមួយនេះ។ ពេលនេះ ការលក់កើនឡើងខ្លាំងចំពោះទូរស័ព្ទ S7 និង S7 Edge ។ ដោយសារតែស្មាតហ្វូនរបស់យើងមានច្រើន យើងជឿជាក់ថាការលក់របស់យើងនឹងកើនឡើង ហើយភាគហ៊ុនរបស់យើងនឹងកើនឡើងដូចគ្នានៅត្រីមាសនេះ។
វាពិតជាអស្ចារ្យមែនទែន ការលក់នៅក្នុងប្រទេសឥណ្ឌាសម្រាប់ទូរស័ព្ទ Galaxy S7 និង S7 Edge បានកើនឡើងទ្វេរដងចាប់តាំងពីក្រុមហ៊ុន Samsung ប្រកាសផ្អាកផលិតនូវហ្វាប់ប្លេត Galaxy Note 7 មក។ ក្រៅពីនេះ លោក Sharma ក៏បានទម្លាយទៀតថា ចាប់ពីពេលនេះតទភ ក្រុមហ៊ុននឹងលក់តែស្មាតហ្វូនដំណើរការប្រព័ន្ធ 4G តែប៉ុណ្ណោះនៅក្នុងប្រទេសឥណ្ឌា៕