Xiaomi ទើបតែបានប្រកាសចេញកំពូលស្មាតហ្វូនរបស់ខ្លួនចំនួនពីរស៊េរីកាលពីថ្ងៃទី 25 ខែ តុលា 2016 កន្លងទៅថ្មីៗនេះមាន Xiaomi Mi Note 2 និង Mi Mix។ ហើយពេលនេះក្រុមហ៊ុនល្បីល្បាញរបស់ចិនក្នុងការផលិត និងចែកចាយស្មាតហ្វូនដែលមានតម្លៃធូរថ្លៃមួយនេះបានប្រកាសចេញស្មាតហ្វូនថ្នាក់កណ្តាលស៊េរីថ្មីចំនួនបីស៊េរីបន្ថែមទៀតគឺ Xiaomi Redmi 4A, Redmi 4 និង Redmi 4 Prime បន្ទាប់ពីលេចលឺព័ត៌មានចចាមរ៉ាមអស់រយះពេលជាច្រើនខែកន្លងមក។
ស្មាតហ្វូនថ្នាក់កណ្តាលទាំងបីស៊េរីនេះផលិតឡើងគឺតម្រូវតាមសេចក្តីត្រូវការនៃអ្នកប្រើប្រាស់ជាមួយជម្រើសផ្សេងៗគ្នារួមទាំងមានតម្លៃថោកសមរម្យសឹងមិនគួរឲ្យជឿ។
1-Xiaomi Redmi 4A
ស្មាតហ្វូនស៊េរីថ្មីដំបូងនេះនឹងត្រូវចេញលក់ជាផ្លូវការណ៍ក្នុងទីផ្សារប្រទេសចិននៅថ្ងៃទី 11 ខែវិច្ឆិកានេះដែលមានតម្លៃប្រមាណ 499 យ័នឬប្រហែលតែ 74 ដុល្លារអាមេរិកប៉ុណ្ណោះ។ ធូរថ្លៃមែនទែនតែម្តង។ Xiaomi Redmi 4A ត្រួវបានផលិតឡើងដោយមានតួរជាលោហះយ៉ាងប្រណីតមានភាពរឹងមាំស្រស់ស្អាត និងក្រាលដោយកញ្ចក់អេក្រង់ទំហំ 5.0” ដែលអាចបង្ហាញរូបភាពបានក្នុងកម្រិត HD ឬ 720 x 1280 ភិចសែល។ ស្មាតហ្វូនមួយនេះប្រតិបត្តិការទូទៅលើបន្ទះឈីប Qualcomm Snapdragon 425 មានអង្គគណនា Quad-Core Cortex-A53 ល្បឿន 1.4GHz, រ៉េមទំហំ 2GB, អង្គក្រាហ្វិក Adreno 308, ម៉េមូរីក្នុងម៉ាស៊ីនទំហំ 16GB អាចបន្ថែមបានក្រៅបានត្រង់ទ្រនាប់ស៊ីមទីពីរប្រភេទ Hybrid Slot និងមានថ្មទំហំ 3,120 mAh។ ជាមួយគ្នានេះដែរ Redmi 4A ត្រូវបាន Xioami ដាក់ឲ្យដំណើរការជាមួយប្រតិបត្តិការ Android Marshmallow v6.0 និងស្រោបដោយផ្ទៃអ៊ីនធើហ្វេស MIUI 8.0។ ចំនែកកាមេរ៉ាសម្រាប់ថតរូប-វីដេអូខាងក្រោយបានទំហំ 13 មេហ្គាភិចសែលជាមួយអំពូលភ្លើងជំនួយមួយគ្រាប់ (Single LED Flash) និងខាងមុខមានទំហំ 5.0 មេហ្គាភិចសែលសម្រាប់ថតសែលហ្វី។ ប៉ុន្តែគួរឲ្យស្តាយសម្រាប់ Xioami Red 4A ដោយវាមិនមានភ្ជាប់នូវទ្រនាប់ស្កែនក្រយ៉ៅម្រាមដៃនោះទេ។
2-Xiaomi Redmi 4
សម្រាប់ Redmi 4 នឹងត្រូវបញ្ចេញដាក់លក់នៅទីផ្សារប្រទេសចិននៅថ្ងៃចន្ទ័សប្តាហ៍ក្រោយត្រូវនឹងថ្ងៃទី 07 វិច្ឆិកា ខាងមុខនេះដែលមានតម្លៃប្រមាណ 699 យ័ន ឬប្រហែល 104 ដុល្លារអាមេរិកជាមួយជម្រើសបីពណ៌គឺទឹកមាស ទឹកប្រាក់ និងពណ៌ប្រផេះ។ ស្មាតហ្វូនមួយនេះមានគុណសម្បត្តិរាងគ្រាន់បើជាង Redmi 4A បន្តិចដូចជាវាបានបំពាក់នូវទ្រនាប់ស្កែនក្រយ៉ៅម្រាមដៃ និងមានថ្មធំទំហំ 4,100mAh។ Redmin 4 មានតួរស្រោបដោយលោហះ និងក្រាលដោយកញ្ចក់អេក្រង់ទំហំ 5.0” ប្រភេទ IPS LCD អាចបង្ហាញរូបភាពបានក្នុងទំហំ HD ស្រោបដោយកញ្ចក់ការពារ 2.5D, ប្រើបន្ទះឈីប Qualcomm Snapdragon 430, មានអង្គគណនាប្រភេទ Octa-Core Cortex-A53 ល្បឿន 1.4GHz,ទ្រទ្រង់បានជាមួយប្លូធូស v4.1, រ៉េមទំហំ 2GB, ប្រើក្រាហ្វិកពពួក Adreno 505, ម៉េមូរីក្នុងម៉ាស៊ីនទំហំ 16GB អាចបន្ថែមម៉េមូរីក្រៅបាន និងដំណើរការដោយ Android Marshmallow v6.0 និងស្រោបដោយផ្ទៃអ៊ីនធើហ្វេស MIUI8.0។ សម្រាប់កាមេរ៉ាថតរូប-វីដេអូផ្នែកខាងក្រោយមានទំហំ 13 មេហ្គាភិចសែល អមដោយអំពូល LED Flash ពីរគ្រាប់ និងខាងមុខទំហំ 5.0 មេហ្គាភិចសែលដូច Redmi 4A ដែរ។
3-Xiaomi Redmi 4 Prime
ម៉ូដែលចុងក្រោយនេះមានសមត្ថភាពប្រើខ្លាំងជាងម៉ូដែលទាំងពីរខាងលើដោយវាត្រូវបានក្រុមហ៊ុនបំពាក់នូវបន្ទះឈីប Qualcomm ជំនាន់ Snapdragon 625 ដែលមានអង្គគណនាប្រភេទ Octa-Core Cortex-A53 ល្បឿនប្រតិបត្តិការ 2.0GHz ជាមួយរ៉េមទំហំ 3GB, ប្រើក្រាហ្វិកពពួក Adreno 506 និងមានម៉េមូរីក្នុងម៉ាស៊ីនស្រាប់ទំហំ 32GB ហើយក៏អាចបន្ថែមម៉េមូរីក្រៅបានផងដែរ។ Redmi 4 Prime បំពាក់ជាមួយកញ្ចក់អេក្រង់ទំហំ 5.0” ប្រភេទ IPS LCD ដែលអាចទ្រទ្រង់ការបង្ហាញរូបភាពក្នុងកម្រិត Full-HD ឬ 1080x1920 ភិចសែល។ ចំនែកកាមេរ៉ាថតរូបមានទំហំ 13 មេហ្គាភិចសែលដូច Redmi 4 ដែរ ប៉ុន្តែវាភ្ជាប់ដោយអំពូល LED Flash ប្រភេទ Dual-tone Dual-LED Flash ដែលអាចចាប់រូបភាពបានលឿនចំគោលដៅ និងច្បាស់ល្អជាង។ ចំនុចពិសេសៗក្រៅពីនេះដូចជាប្រព័ន្ធប្រិតបត្តិការ កំលាំងថាមពលថ្ម ទ្រនាប់ស្កែនក្រយ៉ៅម្រាមដៃជាដើមគឺដូចគ្នាជាមួយម៉ូដែល Redmi 4 ដែរ។ Xiaomi Redmi 4 Prime បានដាក់ឲ្យធ្វើការកក់ជាមុនបានចាប់ពីថ្ងៃប្រកាសចេញនេះទៅ និងចេញលក់ជាផ្លូវការណ៍នៅថ្ងៃដំណាលគ្នាជាមួយ Redmi 4 ដែរ ហើយវាតម្លៃប្រមាណ 899 យ័ន ឬប្រហែល 133 ដុល្លារអាមេរិក។ ប៉ុន្តែសម្រាប់ចេញលក់ក្នុងទីផ្សារសកលក្រុមហ៊ុន Xioami មិនទាន់ប្រកាសឲ្យដឹងនៅឡើយទេក្នុងពេលនេះ៕
