ថ្មីៗនេះ ក្រុមហ៊ុន Huawei ប្រកាសថា នឹងនាំយកនូវទូរស័ព្ទ Huawei Mate 9 ស៊េរីថ្មីរបស់ខ្លយនដែលដំណើរការនូវប្រព័ន្ធប្រតិបត្តិការ Android ចូលទៅកាន់ទីផ្សារនៅក្នុងទឹកដីសហរដ្ឋអាមេរិច។ យ៉ាងណាមិញបើក្រឡេកទៅមើលទិដ្ឋភាពរួមនៃទីផ្សារមួយនេះ វាហាក់ដូចជា Huawei កំពុងតែប្រឈមមុខយ៉ាងខ្លាំងក្នុងការបញ្ចុះបញ្ចូលនូវក្រុមហ៊ុនចែកចាយធំៗ នៅក្នុងសហរដ្ឋអាមេរិចដើម្បីគាំទ្រទូរស័ព្ទនេះ ហើយវាពិតជាមានបញ្ហាច្រើនក្នុងកិច្ចការខំប្រឹងប្រែងរបស់ក្រុមហ៊ុន Huawei ក្នុងការជ្រៀតចូលទៅក្នុងទីផ្សារនៅក្នុងប្រទេសនេះ។
និយាយរួម ស្មាតហ្វូនច្រើនជាង 80% នៅក្នុងសហរដ្ឋអាមេរិច ត្រូវបានចែកចាយដោយក្រុមហ៊ុនទូរស័ព្ទបណ្តាញចល័តនៅក្នុងប្រទេសនេះដោយផ្ទាល់តែម្តង។ ក្រុមហ៊ុន Huawei បានក្លាយជាក្រុមហ៊ុនផលិតទូរស័ព្ទស្មាតហ្វូនធំបំផុតដែលជាប់ចំណាត់ថ្នាក់លេខ 3 នៅក្នុងពិភពលោកនៅក្នុងលក្ខខណ្ឌនៃការនាំចេញស្មាតហ្វូនបានច្រើនបន្ទាប់ពីក្រុមហ៊ុន Apple និង Samsung ។ ដៃគូជាច្រើនរបស់ក្រុមហ៊ុន Huawei ហាក់ដូចជាមានគំនិតល្អជាច្រើន ប៉ុន្តែក្រុមហ៊ុនចែកចាយធំៗ ជាច្រើននៅសហរដ្ឋអាមេរិច ហាក់បីដូចជាស្ទាក់ស្ទើរក្នុងការធ្វើការងារជាមួយនឹងក្រុមហ៊ុនផលិតទូរស័ព្ទមួយនេះ ព្រោះដោយសារតែម៉ាកយីហោនេះ ដូចជាថ្មីនៅឡើយក្នុងប្រទេសមួយនេះ ហើយវាក៏មានការព្រួយបារម្ភ ពាក់ព័ន្ធជាមួយនឹងបញ្ហាសុវត្ថិភាពជាមួយនឹងឧបករណ៍បណ្តាញរបស់ក្រុមហ៊ុន Huawei ផងដែរនេះ បើតាមការបញ្ជាក់របស់កាសែត Wall Street Journal ។
គួរបញ្ជាក់ថា ឆ្នាំ 2012 សភារបស់សហរដ្ឋអាមេរិច បានធ្វើការផ្តល់នូវអនុសាសន៍ដល់ ក្រុមហ៊ុនចែកចាយនានាថា មិនគួរប្រើប្រាស់នូវឧបករណ៍បណ្តាញរបស់ក្រុមហ៊ុន Huawei នោះទេ ព្រោះថា វាអាចជាមធ្យោបាយមួយសម្រាប់ប្រទេសចិនក្នុងការឈ្លបយកការណ៍ទៅលើពលរដ្ឋរបស់សហរដ្ឋអាមេរិច ក៏ប៉ុន្តែបញ្ហានេះ ត្រូវបានក្រុមហ៊ុន Huawei ធ្វើការបដិសេធយ៉ាងណាត់ ចំពោះការចោទប្រកាន់ទៅលើពួកគេ ប៉ុន្តែវា មិនអាចបញ្ឈប់នូវក្រុមហ៊ុនចែកចាយពីការព្រួយបារម្ភទៅលើការចារកម្មដោយរដ្ឋាភិបាលនៃទីក្រុងប៉េកាំងបាននោះទេ នេះបើយោងតាមការបញ្ជាក់របស់ Android Headlines ។
បន្ទះឈីបទូរស័ព្ទចល័តដែលត្រូវបានផលិតដោយក្រុមហ៊ុន Huawei នាពេលបច្ចុប្បន្ននេះក៏មិនបានគោរពតាមស្តង់ដារចល័តដែលប្រើប្រាស់ដោយក្រុមហ៊ុន Verizon និង Sprint នេះដែរ។ ប្រសិនបើក្រុមហ៊ុនព្យាយាមផ្លាស់ប្តូរនូវបន្ទះឈីបរបស់ខ្លួនឡើងវិញ វាប្រហែលជាមានតម្លៃខ្ពស់ពេក។ ក្រុមហ៊ុន T-Mobile វិញក៏កំពុងមានជម្លោះប៉ាតង់ជាមួយនឹងក្រុមហ៊ុន Huawei ហើយការបង្កើតនូវភាពជាដៃគូរវាងនៃក្រុមហ៊ុនទាំងពីរនេះហាក់ដូចជាមិនអាចទៅរួចបាននោះទេ។ ក្តីសង្ឃឹមដែលក្រុមហ៊ុននេះមានតែមួយគត់គឺជាមួយនឹងក្រុមហ៊ុន AT&T ដែលក្រុមហ៊ុន Huawei បានពិភាក្សាជាមួយរួចមកហើយ។ វានៅមិនទាន់មានការបញ្ជាក់ណាមួយទៅលើកិច្ចព្រមព្រៀងដែលកើតឡើងនៅរវាងក្រុមហ៊ុនទាំងពីរនេះទេ។
បើទោះបីជាមានបញ្ហាចំរ៉ូងចំរ៉ាស់ច្រើនយ៉ាងណាក៏ដោយ ក៏ក្រុមហ៊ុន Huawei នៅតែបន្តក្នុងការនាំយកនូវស្មាតហ្វូនស៊េរីថ្មី Huawei Mate 9 របស់ខ្លួនទៅកាន់សហរដ្ឋអាមេរិច។ ក្រុមហ៊ុននៅមិនទាន់បានបញ្ជាក់អំពីកាលបរិច្ឆេទនៅឡើយទេ ហើយវាក៏មិនទាន់បានកំណត់តម្លៃផងដែរសម្រាប់ទូរស័ព្ទនេះ។ ទូរស័ព្ទ Huawei Mate 9 នឹងដាក់លក់នៅក្នុងតម្លៃ 699 អ៊ឺរ៉ូនៅក្នុងទ្វីបអ៊ឺរ៉ុបដែលមានតម្លៃប្រហែលជា 760 ដុល្លារអាមេរិច។ ក្រុមហ៊ុន Huawei ប្រហែលជាអាចលក់នូវទូរស័ព្ទ Mate 9 តាមរយៈហាងលក់រាយ ដូចជានៅ Amazon, Best Buy និង Walmart នេះ បើតាមការបញ្ជាក់របស់ Digital Trends ។